主頁  > 理財  > 投資攻略 2013 年 07 月 09 日

為碟飯勢成水火 「冷面笑匠」火併「小辣椒」

胡孟青和黃國英都是近期人氣急升的名嘴,一個是股壇「小辣椒」,唔啱就鬧;一個搞棟篤笑,變身財經界「冷面笑匠」。二人近日勢成水火,隔空「互片」,全因各自力撐兩隻人氣爆燈快餐股——大家樂(0341)和翠華(1314)。

青姐近日替大家樂賣廣告,推銷的「三十蚊鴛鴦飯」賣個滿堂紅,她對公司管理層有讚冇彈;黃國英自從翠華上市後,一直瞓身推介兼真金白銀掃貨,儼如半個「代言人」。他揶揄大家樂賣三十蚊飯是自貶身價,不如翠華夠膽賣得貴,增長空間大。

今年初,翠華股價一馬當先,黃國英先贏一仗。至上周二,兩間公司齊齊公布全年業績,翠華因盈利增長低於股民預期,股價自高位狂瀉一成有多。相反忍手不加價的大家樂,股價逆市靠穩,證明薄利多銷一樣可以食大茶飯。難怪青姐寸爆說:「大家樂咁至係做快餐!」

胡孟青喜歡大家樂有人情味,做番快餐店應做的事。

黃國英讚翠華夠膽賣得咁貴,而大家樂減價卻未必是成功策略。

場經常傳出黃國英跟青姐不和,並非空穴來風。今年五月,黃國英搞財經棟篤笑,半開玩笑「寸」由青姐代言的大家樂廣告出街後,股價累跌百分之三。

記者早前找青姐回應,她嬲爆爆說:「佢(黃國英)又唔睇吓大家樂今年升了幾多?佢推介咗大家樂好耐,去年底沽貨後就踩人。其實之後股價仲升兩成幾,佢賺少好多!」

至上周二,大家樂公布全年業績,純利按年增長一成四,創下歷史新高,股價在港股暴瀉下,表現相當硬淨。記者再找青姐訪問,她心情大靚:「大家樂做生意始終較人性化,做番快餐店應該做的,唔似有些茶餐廳,食個餐要七、八十蚊!」

大家樂推出三十蚊午餐頭一個月,已賣出超過四十萬份,以全港一百五十間分店計,一間分店每日平均賣出約九十份。

鴛鴦飯月賣四十萬份

最令青姐開心的,是她粉墨登場賣廣告推銷的「三十蚊鴛鴦飯」,自推出後賣個滿堂紅。大家樂管理層稱這個「三十蚊午餐」推出頭一個月,已熱賣超過四十萬份。

「好多人話我拍完廣告後人氣急升,其實廣告最緊要突出商品,刺激銷量,唔係突出我!」青姐大讚大家樂推出午市三十元鴛鴦飯,實在窩心體貼,挽回不少印象分。「鴛鴦飯是集體回憶,細個覺得好高級,去酒樓飲,最鍾意就係臨尾個鴛鴦飯。」

就連大家樂店舖的裝修,青姐也讚口不絕。「設計好柔和、好舒服,靚過好多茶餐廳。我不明有些茶餐廳點解裝修到閃亮亮,五顏六色,雖然收得貴,但坐落沒有那麼舒服!」暗諷翠華裝修浮誇,一心針對內地客。

胡孟青出賣「股評人的眼淚」,瞓身為大家樂宣傳。