「愛港派」反攻 背後水喉多
這邊廂，佔領中環如箭在弦，那邊廂，對家「愛港之聲」就聲言發動一萬人守護中環，擺明硬撼一鋪。該會召集人高達斌同本刊記者講，行動得到多個團體支持，過萬人參加「濕濕碎」；至於到時點樣操入中環？如何守護？佢就話係「軍事機密」。
佢哋搞呢壇嘢，背後肯定有水喉，因為七．一喺尖沙咀搞嘉年華會慶回歸，都要用十萬八萬，未來搞「愛護中環」，將製作一百萬個襟章，成本就要幾十萬。據了解，「愛港之聲」受到一批親中外圍團體支持，包括地區商會、同鄉會之類，佢哋泵水搵人做嘢，同泛民唱對台，目的係爭取表現，藉此邀功，但咁做係咪好心做壞事，親中派內亦有唔同睇法。
