為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 娛樂放題  > 留星語 2013 年 06 月 25 日

中六合彩的幸福 陳柏宇

中六合彩頭獎的機會率,是約一千四百萬分之一,七年前的陳柏宇,已經中了。然而,他得到的不是金多寶,而是做歌手出唱片的機會。

「幸福呀!中六合彩咁喎大佬!我求其喺街上面搵一萬個人問:『你依家做緊嗰樣嘢係咪你夢想中嘅工作?』唔會有一個人答你『係』咁滯!點為之我夢想嘅工作?係我已經唔會追求佢呀!我唔係想做一個歌手,我只不過係發夢做一個歌手呀!因為係冇可能發生嘅事嚟o架嘛!」

沒有可能的事偏偏發生了,他覺得中國第一名航天員楊利偉,如果他小時候的夢想真的是做太空人,現在算發了大達。

陳柏宇不認同結婚,但會替已婚的人開心;沒有信仰,不代表不支持有信仰的人;相片中的陳柏宇未見笑容,也不代表他不幸福。

抵得渴

近年的樂壇新人,不難找到甚麼大公司的太子女,大商家的大少爺。陳柏宇沒有家底,只是由七歲開始狂唱歌,明知當歌星賺不到錢,也不願放棄。

「我唔係投資嗰個人吖嘛,除非你係自資,靠唱片得回報嘅。我覺得唔係為『做唱片』三個字而做,個回報對我嚟講係個機會,有機會去表演,因為好鍾意唱歌,因為想唱而入行。如果一路畀機會我唱而餓唔死嘅我都繼續做o架喇。我又唔係要飛黃騰達、大紅大紫,又唔係要一年賺幾百億。當然我要賺足夠錢去支持我生活,呢個係必然,我唔會為咗夢想放棄麵包,冇可能嘅事,好現實。」

「未去加拿大時已經好鍾意唱歌,最細個嗰陣時聽譚詠麟,我係譚詠麟人嚟!去到加拿大時開始有卡拉OK,唱譚詠麟,仲有陳慧嫻告別演唱會,嗰陣時我未轉聲吖嘛!」

明顯,這幾年來,陳柏宇還未餓死,還得唱下去。事實上,生活也未算風光。

「我呢啲三線歌手,想做紅館演唱會,紅館都唔畀我做啦。」

陳柏宇香港出生,七歲開始在加拿大生活,其後由加拿大獨自回港當歌手,入行初期要靠舅父支零用錢,提供住宿,間中亦要向加拿大的母親求救。

「我揀呢一行時都知道個好壞喺邊,工作範圍包括啲咩,係唔會好風光,喺錢銀上有時會比一般打工難捱添。你揀得嚟做,又要話辛苦好似好唔make sense喎,有得揀最想做嗰樣嘢仲想點呀大佬?唔好咁貪心喇!」

陳柏宇的現任情人是符曉薇,早前他們還一起到加拿大見家長。

自由自主

陳柏宇自問是個極為理性的人,不會因堅持幻想而不肯妥協,入行大部分時間以來,他坦言唱的歌都不能代表真正自己,〈你瞞我瞞〉、〈尊嚴〉〈斷絕來往〉、〈固執〉……連他自己都覺得太多了。

「以前唱嘅都係情歌慢歌,聽我嘅歌再幻想我嘅人,永遠得出嚟嘅結論係同現實好唔同嘅。唱歌係嗰啲聲,講嘢係呢啲懶詼諧、懶搞笑嗰啲聲!第一次同我傾偈嘅人會覺得冇想像中咁靜咁斯文,因為啲歌唔係我自己性格嚟。直至上隻碟《Lost And Found》先有多咗自由度,今隻碟自由度再多啲,因為換咗公司同事嘅班底,以前太習慣同以前同事工作,你覺得啱就做,你覺得唔啱就唔做囉!呢隻專輯我交嘅demo都喺晒呢隻碟入面,寫幾多隻歌,就用咗幾多隻喎!」

他在新唱片中有六首創作,突然變身唱作人的他獲「新力唱片一哥」稱號。

「莫講話依家叫一哥吖,我啱啱入嚟時候都係一哥,因為公司本地部門得我一個歌手咋喎,由頭到尾得我一個,好慘o架,啱啱出道時係好寂寞,出嚟做嘢時人哋都帶住師姐師兄師弟妹,好似一個家庭咁可以一齊玩!」

新唱片有不少新嘗試,包括和恭碩良合作,「唔單止曲風有改變,唱腔有改變、聲線都有改變,所以真係好好玩,所以做多咗live。」不過恭碩良就做少了林憶蓮的live。

我的志願

其實音樂本來沒有出現在陳柏宇「我的志願」中,他在大學時揀選了社工系,希望踏實地當個為兒童和青少年服務的社工便算,背後,有着慘痛的原因。

「未去加拿大,三歲至七歲期間我係喺兒童院入面生活嘅。裏面日子唔易過,真係會畀啲大哥哥打o架,唔係講笑!去到加拿大過咗幾年,開始諗點解會有呢件事發生呢?點解媽咪爹哋會選擇咗唔係自己照顧我嘅呢?唔可能生完小朋友之後話照顧唔到,咁好唔負責任啫,亦對小朋友好唔公平,因為個小朋友冇得選擇出唔出世o架嘛!

「我想用累積返嚟嘅智慧分享畀鑽牛角尖嘅小朋友, 點解個個有得揀我冇得揀?唔係要人明白冇得揀嘅原因,係希望你攞少少同理心去體諒吓人哋感受。當說服到人成為唔自私嘅人時,唔係只為自己着想嘅人,通常都係開心啲。」

社工課程沒有讀完,自然也沒有當上社工,歌手陳柏宇的人生目標,就是開心。

「開心唔係一個複雜感覺嚟,要開心亦都好簡單,做一樣自己想做嘅嘢已經開心,抽象到乜都可以開心,係一個心態,keep到個心態就係成就。」

開心感動

愛情,對某部分偶像派來說,或許是未被准許的成就,陳柏宇肯公開和模特兒符曉薇的戀情,也因戀愛就是開心事。

「我拍拖嘅時候就已經想公開,博緊畀人影,你影我就公開呀!拍拖唔係壞事嚟喎,唔係偷呃拐騙,每個月同唔同人拍一次拖就話啫!穩穩定定認認真真嘅,就算真係分手,再開始拍過拖,我唔係抱住一個玩嘅心態吖嘛,而真係相處後係唔適合嘅,個出發點都係好。點解唔公開?」

問陳柏宇最近一次開心是何時,他答:「感動嘅得唔得呀?」然後他拿出八年前山窮水盡的故事來。

拍攝《喜愛夜蒲》和Jeana咀嘴,沒有搭上她,但認識了現任女友。

「八年前啱啱返嚟香港冇耐,冇錢使,打電話問我阿媽可唔可以畀啲錢我,佢話:『冇問題啦!梗係冇問題啦仔!』真係好感動,真係好想喊,我阿媽真係好偉大,喺我最冇錢嘅時候幫我,仲要係純粹因為我自己嘅選擇衝咗返嚟香港!嗰一刻係冇人有義務幫我,即使係我阿媽!如果我個仔係咁,我都必未必借畀佢!」

雖然愛、開心、感動,未必應該用金錢來量化,然而若然你愛你身邊的人,很難避免要付錢,畢竟這是現實世界。符小姐,我相信你一定會在看這個訪問,請別急於叫你的BB給你錢,因為男人搵錢很辛苦!

說着說着,陳柏宇的電話響起,他二話不說拒絕了來電,把它轉到留言信箱。

「整冷氣嘅就聽(他家中的冷氣機已壞了兩天),女朋友打嚟唔使聽!做緊嘢打嚟做咩啫?我係呢啲大男人,返到去就鵪鶉……」

在家,和愛犬咀嘴。

陳媽媽由加拿大回港捧自己的唱片宣傳活動,當然要錫番啖。

29+1=35

廿九歲的陳柏宇,尚有一個月便踏進三字頭,他揚言要放五天假,大肆慶祝,擺一場三十大壽飲宴。

「踏入三十歲係咪成熟?都唔係。今時今日嘅三十歲等如以前嘅二十歲,係個出生年份關係、八十後嘅關係,長大環境已經唔同。」

他不是妹妹仔,沒有幻想在三十歲前要做到這樣,完成那樣。

「因為我目標係三十五歲,我覺得我轉捩點會喺三十五歲發生,譬如成家立室,我預係三十五歲嘅,結婚都係為咗生小朋友,我覺得我真正成熟都係幾年後嘅事。」

訪問完成,他的電話響起,女朋友再次來電。

「佢叫我做完嘢打畀佢,依家做完嘢,唉聽喇聽喇。喂……」

幾年後的事無人知曉,這一刻,即管盡情抓緊所愛,繼續開心,繼續感動,能中一次真正的六合彩便更好。