非常父子
俗語有云「上陣不離父子兵」，用嚟形容今晚呢個飯局實在係最貼切不過，我同修哥（石修）認識多年，睇住佢囝囝阿Sam（陳宇琛）大個仔。依家修哥依舊喺「小生界」佔一重要地位，阿Sam最近就憑《烈火雄心3》中嘅「黑仔明」逐漸入屋，佢仲進軍藝術界作雙線發展，梗係要好好慶祝！
飯局金句：Never too late！
其實修哥同阿Sam都好少飲酒，今晚得佢哋畀面，我點可以唔飲多杯？乾！
年少氣盛
雖然阿Sam為演藝事業改look，但佢嘅rocker因子不變。
修哥呢位小生由80年代做到千禧年代，跨世紀瘋魔電視迷，我唔講你一定唔知，其實90年代嘅修哥，曾經經營過火鍋店，所以今晚我就精心揀咗啱啱喺銅鑼灣開分店嘅高格調火鍋店「不倒翁中日火鍋料理」，同修哥、阿Sam烚住傾。
近年嘅火鍋愈嚟愈多元化，除咗傳統形式嘅打邊爐外，新式啲嘅仲有魚生供應，照顧晒唔同食客嘅口味；同做人、做artist一樣，要多變、不停自我增值，先至迎合到市場！好似阿Sam咁，為演藝界作出貢獻外，舊年開始創業，建立自己嘅飾物品牌「Llazy-Bonez」，學以致用。
「以前喺英國讀建築嘅時候，受到Marilyn Manson等hard rock歌手嘅感染，所以我特別鍾意Gothic（哥德式）同punk嘅銀器首飾，最鍾意骷髏頭嘅飾物。瘋狂時期，我連打扮都跟到足，試過企喺爹哋媽咪面前，連佢哋都唔認得我㗎。03年因為入咗行，我嘅打扮至回復『正常』，當然我仍然keep住儲銀器，但儲極都冇一件令我覺得係perfect嘅飾物，所以07年我就讀咗中文大學嘅首飾設計課程，開始自己挑蠟起模製作自己嘅飾物。」
阿Sam一邊為我同修哥放墨魚滑落鍋，一邊繼續講佢嘅夢想。「我有為自己定下一個目標，但係我暫時唔想講出嚟住，始終要做到有啲成績畀人睇到，好過得個講字唔做，我覺得我要做到一啲令爹哋會proud of我嘅事。」
三十而立
「不倒翁」老闆謝進洪先生（左二）特意招呼我哋，真係畀面！
當我左邊嘅阿Sam講出佢呢番「奮鬥宣言」之時，坐喺我右邊嘅修哥不停點頭，大感安慰，喺囝囝行開嘅時候，修哥同我講：「阿Sam好少喺人前作出承諾，連我之前都冇聽過佢咁講過，我諗佢見到你太開心，要同你share佢嘅喜悅。」
哈哈哈！其實當我聽到阿Sam當住爹哋面前話要為未來打拼嘅時候，我同樣深受震撼。年輕人，就係要有衝勁、魄力同埋承擔。阿Sam呢一番話，就成為我主持《金牌飯局》近4年來，令我最感動嘅一刻。
呢個時候阿Sam返回座位，繼續話題：「本來我都唔知開唔開始搞生意㗎，但後來喺畢業展覽上，阿Sir話我嘅作品有好好嘅反應。得到其他人嘅認同，我就打咗強心針咁，跟住就開始搞舖頭嘅嘢，依家run咗一年，下個月我就30歲嘞，希望唔會太遲啦！」
Never too late！其實要成功，最緊要係為自己定下目標，再部署達成目標嘅步驟，依家阿Sam喺呢方面已經起步，step by step，一定成功在望，乾！
最愛羊羶
 |
 |
我欣賞阿Sam對事業有目標，雖然佢覺得30歲起步有啲遲，但係我話畀大家知，30歲，對男人嚟講，特別係有心大展拳腳嘅男士，先至係真正嘅開始，撐佢撐到底。大家不妨click上阿Sam自家品牌「Llazy-Bonez」網頁： http://www.llazybonez.com，睇吓佢嘅作品。 |
阿Sam製作嘅飾物，全部模都係佢一刀一刀雕刻出嚟，佢話：「唔使拍劇，我就喺office入面design同造模㗎嘞！」夠晒100%投入。 |
雖然阿Sam不停為佢嘅設計夢努力，但佢並冇因此而放慢佢嘅演藝步伐㗎。近排《烈火3》嘅「黑仔明」一角，令阿Sam成功入屋，修哥話：「佢依家出街都有觀眾叫佢『黑仔明』，咁就代表佢呢個角色好成功，見到阿Sam好努力去做每件事，能夠有好嘅result都好開心。話就話佢30歲啫，其實佢喺我同媽咪心目中，都係baby嚟咋。」
修哥話畢，阿Sam就二話不說為爹哋將羊肉落鍋，以行動回應，因為羊肉正係修哥火鍋必食嘅美點，佢仲話：「羊肉最正係有羶味，我食羊肉唔羶唔食㗎！Paco你都整件吖！」哈哈哈！多得修哥、阿Sam先有今晚呢個親情火鍋，我淥番一件畀你哋就差唔多，乾！
不倒翁中日火鍋料理
 |
|
