為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > Paco巨星飯堂 2013 年 06 月 11 日

黃栢高

黃栢高(Paco),金牌經理人,叱吒樂壇三十年,炮製無數金曲,捧紅不少歌手。近年涉足電影,《行運超人》、《龍咁威》、《殺破狼》等,皆叫好叫座。最新動作,除於本刊主持《Paco巨星飯堂》,每逢周一更在《頭條日報》主持「名人會」專欄,專訪城中名人、紅星。

7月熱辣辣

一年一度嘅書展即將喺7月殺到,每年呢個時份都係名模、o靚模、嫩模寫真必爭之地,今年向氏兄弟向展邦同向展威旗下嘅「M.Spy Model」,就派出「嫩版朱茵」Vivian(羅彩玲)「出戰」,推出個人寫真集,以熱辣辣Fit爆身段,攻陷宅男市場。

所以今晚我就特別邀請3位主角,加上向氏兄弟力捧嘅應屆「中國小姐」亞軍Athena(張子敏),一齊去到位於銅鑼灣的「Sowelu Dining Bar」,一邊品嘗日式Fusion菜、一邊率先預告7月大計。

今晚我同Athena、展邦、展威及Vivian(左至右),喺「Sowelu」既品嘗美食,又歎戶外夜景。

豁出去全裸

Vivian一向係宅男女神,今次佢為咗新嘅寫真集,仲會豁出去全裸上陣,為7月書展大派冰淇淋,「今次係我第2本寫真,上次就以18歲做主題,今次大個女啦嘛,所以會大膽啲。例如會玩好多唔同嘅形象,都會比較有日本Feel啲,唔係陽光沙灘嗰啲。我同兩位向生、製作團隊都想做到性感而高貴,咁就一定入到書展啦!」

Vivian講到即將推出嘅寫真集,非常肉緊。

運用三文魚、帶子炮製carpaccio,感覺更消暑。

Vivian以性感形象出道,今年同周秀娜前男友Avis嘅緋聞,令Vivian知名度大增。雖然佢只係得19歲,但講起拍攝寫真時嘅投入程度,更有衝勁,不比2字頭輸蝕。「初初拍嘅時候,氣溫試過跌到落10幾度,嗰時我仲要着泳衣落凍水池影相,真係好凍o架。不過,我覺得呢個過程都係一種體驗嚟嘅,而我亦都好享受整個拍攝過程。依家就用平常心,期待本寫真集嘅面世,我當佢係我嘅BB嚟o架嘞!」

哈哈哈!Vivian仲話,自己以日本名模為奮鬥目標:「我希望可以做到好似Lena(藤井莉娜)咁,sexy得嚟又靚,總之要畀人一種煥然一新嘅感覺。」

另一前菜係意大利火腿沙律,夠晒開胃。

今晚我同眾嘉賓品嘗嘅特色fusion宴,8道菜式可致電餐廳度身訂做。前菜拼盤包括魚子醬、鴨及雜菌(前至後)。

力谷眾新模

Vivian得到向氏兄弟力捧成近一代「女神」,與此同時,展邦同展威正落力尋找新面孔,擴大業務版圖,展邦話:「Vivian係我哋唯一一個model喺書展推出寫真集,但係我哋有keep住搵新血加盟,保持新鮮感。好似Athena咁,佢係應屆『中國小姐』嘅3料亞軍,但係要佢闖出名堂,都要畀啲時間投資。」

4位嘉賓喺透露未來大計時,都表現得非常雀躍。

Athena係向氏兄弟最新力捧model。

而展威就表示:「除咗model業之外,我哋都有心向電影業發展,不過就仲喺籌備階段。另外,我哋想將現有嘅業務做得好啲,所以簽得返嚟嘅model,都會力谷,但係會按部就班,始終呢個都係長線嘅投資。」

兩位年輕人有心打天下,而且目標明確,我點會唔支持?先乾一杯預祝佢哋成功,乾!

展邦(左)及展威(右)繼續喺演藝界大展拳腳。

呢道夫妻岩係日式fusion菜式,以黑豚豬配溫泉蛋,進食時以蛋汁拌豬肉一同入口,做出豐富口感。

由日本直送嘅福岡蠔,喺日本本土排名第二,香港就甚為少見,要一嘗蠔味就要預訂嘞。

耀眼生力軍

展邦所提及嘅Athena,今晚亦係座上客,而且佢仲擔任過童星,「5歲嘅時候有個Catwalk Show、需要小朋友參與,媽咪(黎明初戀情人黃鴻琴)帶我去面試,雖然後來揀中我,但係嗰時我太驚,所以最終都冇做到。」

Vivian即時同我合照留念。

我同兩位model品嘗餐廳特製雞尾酒。

不過,Athena因為呢次經驗,慢慢對入娛樂圈產生興趣,「我想身邊嘅人都以我為榮,亦想得到其他人嘅認同,所以就想入行。之前我讀過一個航空課程,學好英文、禮儀裝備自己。」

Athena話要讀好書先再追夢,係一個最正確不過嘅選擇,「咁想入行都係以紅為目標啦,不過我都想充實咗自己先。」

好!咁我都以美酒祝Athena星途燦爛,乾!

今晚由餐廳老闆Norman為我哋度身訂做菜單。

燒A5和牛保持肉質鬆軟度,入口感覺無得彈。

精選芝士拼盤組合4款唔同軟硬度、香濃度同熟成時間嘅芝士,襯托美酒一流。

甜品係士多啤梨芝士蛋糕。

Sowelu Dining Bar

地址:銅鑼灣駱克道447-449號中威商業大廈5樓
電話:2766 1171