為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2013 年 05 月 29 日

證監密查 發現罪證 財爺CY都唔知

張震遠檔商交所爆大鑊,搞到拉人封艇,商罪科繼續窮追猛打,廉記亦摩拳擦掌想插手,更多爆炸性情節陸續有來,大家買定花生等睇戲啦。今次事件又係另一套《寒戰》,只不過場景改在政府高層,坊間有「故事」指,鬍鬚曾早已知道商交所會爆鑊,並通知咗CY,反對續委張做市建局主席,但對方冇理,於是鬍鬚曾向外爆料!

成件事有幾個疑團:鬍鬚曾事前知唔知單嘢涉刑事?CY係咪已收到風,不過繼續「包庇」保住頭馬?爆鑊前阿爺點解唔出手救佢?知情老友向本欄講述證監會調查呢單案嘅內情,或可提供部分答案。

商交所爆鑊前,證監用咗三、四個星期深度調查其問題帳項,搵到有嘢涉刑事,好大劑,即交警方跟進,張震遠亦要協助調查。由於調查係獨立機密行動,冇通知證監會主席及財經局,故財爺同CY都唔知。

老友指,證監負責監管商交所,所以一直有睇實盤數,確定資金冇問題,去年檔嘢愈做愈縮,死吓死吓咁,故證監check得比前更緊,到年尾發現更多嘢唔妥,於是加大力度進行更徹底調查,「出事前三、四個禮拜,證監嘅調查十分之intense,做咗大量工作,抽絲剝繭一層層搣落去,估唔到搵到咁多嘢,咁大劑,好得人驚。因為涉及有人偽造文件等刑事罪行,於是通知CCB(警方商罪科)跟進,鎖住幾個目標。」

佢話,調查係機密行動,唔可以打草驚蛇,所以冇通知財經事務及庫務局嗰邊,連鬍鬚曾都唔知。證監會主席唐家成係「梁粉」,如果知道商交所畀差人查,應該會向CY通水,但實情係證監同CCB都秘密行事,冇向主席報告,因為調查要獨立進行,唔可以披露,呢個規則必須嚴守,主席問到都唔講得,所以連CY都唔知。

佢聽講,今年初內地已有人知道商交所財政問題愈嚟愈大,阿爺亦有所聞,但以為只不過係錢銀緊絀,生意周轉不靈啫,唔知道山窮水盡要停牌,更估唔到單嘢涉及違法咁大鑊,所以阿爺到爆煲前都冇介入,亦冇同CY傾過點搞。

本來證監同張震遠夾好,由商交所自己交出個牌,然後有秩序平倉,再一齊公布,點知張震遠為保自己形象,搶先發聲明,又約幾間友好傳媒吹風,以為可以掌握主導,淡化件事,但咁做令到證監受到各方質疑,指佢優待張震遠,證監啞仔食黃連,有苦自己知,自然火都起埋,咁啱CCB查到具體罪證,於是火速出手拉人,以行動證明證監鐵面無私,就算係CY身邊紅人,一樣追查到底,唔會絲毫手軟。

老友指,鬍鬚曾在警方拉人之前,亦唔知商交所原來捲入犯罪活動,所以冇向CY發出警號。因為委任市建局主席係由陳茂波負責,鬍鬚曾唔會理,所以某報報道話佢同CY「暗戰」,只係想當然嘅電影橋段。

至於CY,雖然知道商交所唔多掂,但唔敢向阿爺求救,因為香港麻煩嘢已夠多,再提呢個問題,只會添煩添亂。CY本來想商交所財政問題慢慢拆解,風平浪靜後再算,故叫張震遠放假,拖一拖先,估唔到爆出刑事調查,至此再冇選擇,惟有迅速斬纜!