男人的浪漫

「追夢，是一件奢侈的事。如果有夢想，真係要趁早追呀！」廿六歲的九巴司機阿彥說。

阿彥是本周一（五月二十日）的報章A1頭條人物，本是會考9A狀元，月薪四萬多元的金融才俊，為了追尋兒時夢想，四月廿九日轉行做巴士司機，月入萬四元，盡顯男人的浪漫。「我好鍾意揸巴士，我未試過返工返得咁開心，人生咁樣豪一次，真係好型。」

追夢的大前提，是不愁衣食，不用養家，不用還卡數。我不禁想起，二十年前讀完城大後，欠下周身卡數，為解燃眉之急，毅然加入麗晶酒店（現名洲際酒店），當上只需中三程度的行李員，追尋的不是夢，是快錢。

由於當年麗晶是全港唯一不准用行李車的酒店，所有行李必須徒手拎起離地搬運，旅客看在眼內，怎會不動容？所以我每天可賺取貼士約千元，連同底薪四千元，收入算是不錯吧！

有時候，捱到周身骨痛，搵女朋友陪我食碟豆腐火腩飯呻吓，每次食完，我都想同她分手，因為我知道，她已經不再明白我，她根本不知道，我在酒店所經歷的有幾多！

她問我招呼過咩旅客，我真的不想答她，日本客？大陸客？真係無國際視野，究竟我仲可不可以繼續接受自己的伴侶，將眼光停留在東南亞咁狹窄？

每拎一件行李，都經過日曬雨淋，百滴汗水，是經過歷練，是經過漫長的試煉，每一件都有它的歷史同故事。

我問我的人生，可不可以好似旅客咁，搵到咁多精采的行李篋：Samsonite、Pierre Cardin、Santa Barbara、Delsey……各有特色。有一次，我自己一個人企在酒店大堂負責拉門，一對母子行入來，我隱約聽到阿媽同個仔講：「如果你唔畀心機讀書，第二時就要企喺度拉門咋！」

呢一刻，我感到好淒清，我望住玻璃門外的紙醉金迷世界，我望不透，到底呢個世界有幾多人與事，我能夠掌握到呢？我是否拉門拉到六十歲呢？我好迷茫。

離職後幾年，我重回麗晶酒店飲咖啡，依然是當年的舊同事拉門，我望住他，他望住我，互相點頭，我好感動，忍住淚水。或者個舊同事會問，為何我當年會放棄呢一份賺快錢的筍工，我不知道。在踏出酒店大門一刻，我覺得我已不再是一個浪子，追夢的日子，都成歷史。