為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2013 年 05 月 24 日

扶靚仔上位 周梁內部遇阻力

自由黨舊年決定改黨章,增設黨魁及加一個副主席位,線人話,田少將獲提名做黨魁,如冇人同佢爭,六月初將可自動當選,正式回朝掌政。

線人又講,主席周梁淑怡有意提拔青年團主席李梓敬上位做副主席,但內部有人反對,認為佢太young,經驗尚淺,鎮唔住場,暫時未夠班同兩個副主席方剛及鍾國斌平起平坐。

小李入黨只幾年,但表現甚勇,夠膽出位,旋即做咗青年軍隊長,近期頻頻發表惹火言論,例如「反對綜援養懶人」、「工潮不應讓工會介入」等,引起唔少反彈,不過田少及周梁就好buy佢,覺得係可捧之才。

自由黨新星李梓敬與靚女太太去睇巨鴨。

小李最近又同一眾青年軍搞咗個Social Wednesday沙龍,定期去蘭桂坊一間酒吧飲酒論政,黨友可以帶埋朋友去,有時仲邀請嘉賓講嘢,希望拉到一批八、九十後中環一族入黨。據講五月底嘉賓係唐唐,佢將帶一批私藏紅酒到會,同青年軍齊齊開懷暢飲。

呢位新秀讀過名校男拔及李寶椿聯合世界書院,畢業於美國萊斯大學(美大學排名第十七位),學歷唔錯,論政亦有紋有路,在田少周梁力捧下,睇嚟好快在政壇彈起。