為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2013 年 05 月 22 日

「人力」內訌 毓民另起山頭

毓民兩年前同社民連拆夥,拉隊另起爐灶,成立「人民力量」,搞到社民連即時散晒,氣勢盡失;估唔到兩年後歷史又重演,佢周一劈炮離開「人力」,準備另搞山頭,內裏原因極耐人尋味。

線人指,毓民忽然發難,導火線係近日黨內內訌加劇,佢同主席劉嘉鴻矛盾激化,更曾發射重炮,想轟對方劉嗡(劉之綽號)落台,兩人已勢不兩立。事緣劉嗡參加咗「真普選聯」,又冇反對普選提名委員會方案,毓民極唔同意,隨即破口大罵,指咁做出賣支持者,要求執委會將呢個叛徒趕落台。大家都知毓民以「教主」自居,條o靚竟然唔跟佢嗰套,自把自為,自然㷫到爆,原本想趁機「清黨」,將劉踢走,但今時今日「人力」內部已分成幾派,毓民再冇絕對權威,最後決定自己走人。

毓民近日炮轟「人力」主席劉嘉鴻(左下),更發動「倒劉」想拉佢落台,令黨內矛盾激化,成為佢忽然劈炮嘅導火線。其實「人力」內部早已四分五裂,同蕭若元亦有關。

早前蕭若元結束「香港人網」,公開指毓民要搞亂佔領中環,同佢政見分歧,又想令「人力」分崩離析,因此同毓民拆夥。老蕭此舉進一步激發「人力」內部矛盾,因為黨內一批核心成員,包括慢必同袁彌明等,都深受佢影響,唔當毓民係大哥大,所以「拆網」之後,佢哋開始有離心,毓民亦知道「人力」已出現裂痕,遲早會散!

與此同時,毓民愛徒黃洋達選輸立法會後,另創「熱血公民」,同「人力」內一批黨員唔妥,連陳偉業都話唔想同佢合作,認為毓民太偏呢個門生,其他人更罵聲不絕,令毓民在黨內更加孤立。

早前「人力」活動已出現同路人馬互片場面,陳偉業亦覺冇癮。

線人認為,毓民亦知道「人力」冇可能再團結一致,一定會散,既然咁樣,不如自己散水另起爐灶,而「人力」內一批毓民忠實信徒,勢必陸續跟「教主」過檔,到時「人力」將失去凝聚力,走上散band之路。

政圈傳言毓民將與門生黃洋達一齊建立新組織,亦可能以佢創辦嘅「普羅政治學苑」做基地,再造政壇新神話。

對於毓民散水嘅原因,政圈仲有種種揣測,其一是佢上次搞散社民連,今次再搞散埋人民力量,客觀上,令激進勢力再難以抬頭,究竟呢個發展對邊個有利,值得諗吓。但呢個揣測至今未有事實根據。