ＣＹ坐低之謎 原來膝頭有舊患
CY上周出席立法會答問大會，期間忽然叉住條腰，好似好痛咁，跟住仲要人攞張櫈坐；有記者向特首辦查問發生乜事，答案係「無可奉告」。線人向本刊拆開呢個謎團，話佢膝頭曾受傷，搞到腰痛企唔耐。原來CY於○九年聖誕節去日本滑雪時，不慎扭傷膝蓋十字韌帶，之後要做手術，搞咗半年至慢慢痊癒，當時出席行會都要撐住拐杖。
線人話，傷十字韌帶手尾好長，至今佢依然唔可能長時間站立。好彩佢經常有游早水習慣，可以keep得住，但自從做咗特首，忙到無時間，禮賓府內又連泳池都無，所以再無游早水，加上活動太多，終於舊患復發。
