硬抗「惡勢力」勒索　財爺幕後發功

激進派四煞拉咗布多日，玩轉成個立法會，政府撥款亦被拖死，人人望住曾鈺成點搞，佢老哥周一終於手起剪落，啅一聲將匹布剪斷，四煞同泛民班友嘈到拆天乃意料中事，但已冇新招可出，政府粉碎「勒索」圖謀，本財政年度撥款可如期於周三通過。官場線人向本刊講述呢場「拉剪角力」背後經過及各方謀略，都幾曲折。

線人話，財爺今次財政預算案一開波就遇到四條友拉布阻路，要求政府設「全保」及人人派一萬。佢同CY商量對策，都認為今鋪等同被惡人blackmail，如果唔答應就玩殘你，對呢種恐怖分子式要脅，絕對不能退讓，一定要硬砌到底，否則政府運作就會崩潰。因為對方玩贏一次，必會玩第二次，今次攞呢樣，下次要另一樣，其他人有樣學樣，個個都「拉布」苛索，以後政府點做嘢呀！

四煞以拉布威迫，財爺同CY商量後都認為絕不能退，要硬到底，因為如blackmail成功，拉布必陸續有來，所以拒絕談判，並動員高官齊發聲向曾鈺成施壓，同時聯絡建制派議員聯手硬撼。

另外，財爺同CY亦知道，如果今次腳軟，背後幫政府班盟友覺得撐你都冇用，以後仲邊有人肯做「醜人」？所以呢鋪一定要企硬，等支持者知道政府決心同惡勢力對抗到底，打仗就一齊打。

所以財爺今次決定唔同長毛等講數，力守陣地寸步不讓，背後就積極做「串連」，同陳家強分頭打電話畀各建制派議員要求幫拖，對方都一致認為應硬闖，絕不同意政府申請臨時撥款，因為咁做斷唔到尾，班友仍會繼續玩嘢。兩人又致電部分泛民及獨立議員，知道佢哋並非一面倒撐拉布，財爺分析過形勢，決定同長毛等硬鬥硬！

呢段時間，大嚿曾搵過財爺談判，財爺提出由政治助理羅永聰或財庫局常秘謝曼怡同佢傾吓，佢當然拒絕。據知大嚿亦曾致函，財爺至今仍未回信，擺明不向惡人屈服。到上周財爺至約見四煞，但只係表明立場，唔係談判。

曾鈺成想保持公正形象，為日後斡旋政改紛爭留後着，故遲遲不出手，到周一才以形勢嚴峻為理由剪布。

不過剪布權力始終在曾鈺成之手，佢一度「泛民」上身，話唔會剝奪少數議員權利，表明唔想剪布。線人指，阿曾咁表現，有兩個原因，一係保持公正，唔想做「醜人」；二係唔想同泛民反面，希望將來搞政改時，可以做和事老，所以遲遲唔郁手。

但到上星期尾，建制派同政府都知道阿曾其實等候形勢危急至出手，以便出師有名，於是建制派議員演出一套「憤怒聯署」戲碼，而財爺及CY同時動員多個高官發表評論，指多項措施將被拖垮，情況好嚴重。阿曾眉精眼企，見機不可失，迅速一刀兩段剪布。

其實建制派議員上周已知道阿曾會於周一出手，向本刊預言阿曾一定剪布，結果真係咁，證明財爺同建制派幕後已有默契。