為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > Paco巨星飯堂 2013 年 05 月 20 日

黃栢高

黃栢高(Paco),金牌經理人,叱吒樂壇三十年,炮製無數金曲,捧紅不少歌手。近年涉足電影,《行運超人》、《龍咁威》、《殺破狼》等,皆叫好叫座。最新動作,除於本刊主持《Paco巨星飯堂》,每逢周一更在《頭條日報》主持「名人會」專欄,專訪城中名人、紅星。

長青樂與露

雖然我成日話「Yesterday is gone」,但係集體回憶喺大眾心目中係長青嘅,好似賈思樂(Louie)同露雲娜(Rowena)呢對70後嘅金童玉女咁,相隔28載「復合」開慈善演唱會,一樣令人引頸以待。

今晚我就同Louie、Rowena,以及投資佢哋演唱會嘅「馬天尼」老闆孫敬安(Kimmy)、盧敏儀(Money)夫婦,去到位於旺角嘅「創興火鍋放題」,品嘗同佢哋一樣咁長青嘅火鍋,暢談「樂與露」。

今晚我同Kimmy、Money、Rowena及Louie(左至右)既品嘗懷舊配料火鍋,亦暢談音樂經。

Rowena同Louie再度攜手開show,實為樂迷之福。

友感情no regrets

Louie同Rowena除咗被視為金童玉女外,佢哋嘅感情同樣深厚,Rowena話:「好難得可以同Louie再一齊唱歌,佢係一個好拍檔。今次我復出都係因為佢,初時我好驚見人,唔敢再上台唱歌,係Louie畀信心我,所以真係好多謝你(一望Louie)。」

而Louie就自爆:「我用咗好耐去不停WhatsApp、打電話、send email轟炸Rowena,佢把聲真係好甜、好靚,唔唱歌就太可惜嘞。我一直知佢心軟,就係咁『攻擊』佢嘅soft spot,終於佢忍唔住,應承同我再唱歌。」

有一個咁好嘅機會,我都建議Rowena要接納啦!做人要坐言起行,先會無悔此生。「啱呀Paco,今次我可以同Louie再次企喺同一個舞台上面,真係no regrets。而且趁我仲OK,仲可唱歌,咁就唱啦!依家我日日喺房唱4個鐘,未開始我仲懷疑自己把聲會唔會生咗銹,一唱之下發現唔會喎,哈哈!」

「創興」嘅放題火鍋每位只收$138,如要外加更豐富配料,價錢亦相宜,夠晒親民。

澳門豬骨鍋等鍋底已屬放題價全包系列,落足料炮製。

夏日炎炎,最啱就係點一個雜錦冬瓜環鍋消暑。

超民主揀歌

Kimmy今次全力支持Louie同Rowena嘅《Reunited慈善演唱會》,亦因為友情而起,「有一日同Money食飯,佢問我有咩搞,我咪話想搞騷但搵唔到人投資,佢就話幫我問吓Kimmy,亦因為咁而有今次呢個show。」

而Kimmy就話:「Louie同Rowena係唔少人嘅回憶,如果佢哋嘅show搞唔成就實在太可惜嘞!我都想睇佢哋一齊唱歌嘅。」

哈哈哈!有Kimmy呢位投資者,Louie同Rowena就可以專心為演唱會準備,Louie話:「我哋連揀歌都好民主,今次喺concert入面唱嘅30幾首歌,每一首都係喺meeting入面有超過10個人投票嘅歌。」

Kimmy因Money同Louie嘅長青友情而支持Louie同Rowena開show。

Louie同Rowena兩把靚聲除咗喺音樂上夾得天衣無縫外,佢哋對美酒都相當欣賞,我梗係以酒會友啦!

自家製韮菜餃(左)同鮮製雲吞(右)都係餐廳自家製配料。

美國肥牛、羊肉同黑豚腩片(後至前)任點菜式,水準超班。

不一樣放題

經過一輪篩選,Louie同Rowena今次開騷係既以最佳狀態,又以最經典金曲會知音;就好似我哋今晚嘅飯敍地點「創興火鍋放題」一樣,以好料會「滾友」。

一般放題經營者以低成本成就低價錢吸客,「創興」老闆曾永發就要用高質留住食客心,令4位嘉賓都大表欣賞。

不論營商或搞show,有質素自然有捧場客,我預祝Louie同Rowena喺5月29、30號,晚晚good show!乾!

除咗一般嘅火鍋之外,餐廳嘅特色四川香辣雞鍋,一樣食到眾嘉賓大讚yummy。

曾老闆(右)落力招呼我同4位嘉賓。

手切安格斯肥牛($68/例),選用貴價材料,物超所值。

牛骨髓($28)係另一外加菜式。

鯇魚鰾($38)日日新鮮,係懷舊配料中嘅特色之選。


創興火鍋放題
地址:旺角彌敦道593-601號創興廣場18樓
電話:2771 8833