為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2013 年 05 月 07 日

工人動搖 促工會停戰 李卓人爛尾

碼頭工潮近兩日峰迴路轉,外判商提出「一口價」加薪9.8%,復工再收四千元獎賞,加埋算唔錯,但唔會再同工會埋枱談判;李卓人方面,上周六開大會仍然企硬,話資方如果唔肯重開談判,就罷工到底,更將行動升級,台下工友激動舉手贊成,好似好齊心咁,但到本周一,情況急轉直下,工會召開大會後,決定接受資方方案,即時結束罷工,換言之,行動玩完。

線人同本刊講,其實早在上周六開大會前,部分罷工工友已私下表示加幅可接受,極想停戰復工,但因工會硬要打落去,佢哋至無奈跟隨!

外判商提高加薪幅度,講明「一口價」唔同工會談判,罷工工人多數動搖,極想收兵復工,但李卓人為「面子」鼓動再砌,不過軍心已潰散,更促工會停戰,工潮終爛尾收場。

線人指,外判商永豐公布此加幅前,曾經接觸一批較溫和工友,提出呢個讓步方案,對方大多數都話OK,希望盡快搞掂單嘢,唔想再磨。但職工盟隨即召集工人開會,會上拋出一堆問題,認為仲未解決,一定要企硬逼資方埋枱談判傾掂佢,唔可以咁快講和。當時李卓人仲上台鼓動工人繼續力撐,部分工友雖然好想復工,但在工會壓力下,都唔夠膽提出反對意見,怕做衰仔被人鬧,惟有跟大隊舉起拳頭齊齊喊支持口號。

工人上周末開大會時仍戰意高昂,一致贊成繼續罷工,其實大部分人當時已無意再戰,舉手只是被迫跟工會走。

當晚部分工友三五成群自己傾單嘢,唔少人話已經好疲累,又驚冇咗份工,既然資方肯加薪接近一成,應該見好即收復工。呢種想法在罷工工人中迅速擴散,軍心開始動搖,甚至潰散。

線人話,個別工友更走去同工會阿頭講,反映想復工嘅意願,對方當然繼續「洗腦」叫大家撐到底,但亦已感到壓力,知道如果唔早日解決,班工友遲早散晒,到時工會想拉都拉唔住。

到禮拜日,有罷工工人同電視台記者直言「已經有好多人心郁」,「我哋都想快啲復工,唔想再捱落去。支撐唔住,冇晒資金啦」!佢哋咁講,顯然已唔聽工會支笛。

據接近職工盟人士指,當時搞手堅持企硬,原因之一係為啖氣,因為工會提出加雙位數字,資方就開出「9.8」,擺明落工會面,如果good聲吞咗然後收兵,以後就冇碇企,所以你做初一,我做十五,繼續搞大佢,同你死過!

不過職工盟雖口口聲聲話心中仲有大把籌碼,但可打嘅牌已愈嚟愈少,被迫開始諗下台階,所以口氣已不斷軟化。到本周一,形勢變得更壞,工人離心愈來愈強,即使工會再搞落去,都冇人跟,到呢個時候,工會已冇路可行,惟有收兵停止罷工。

外判商方面,為咗早日結束工潮,於周一下午向勞工處長作出書面聯署,確認加薪幅度,張建宗隨即出嚟話已取得書面承諾。工會無奈以此為下台階,跌落地抓番揸沙,其實已輸晒!