為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2013 年 05 月 03 日

飛哥爆秘聞 肥彭「收o靚」被拒

左派元老吳康民上周在報章爆出驚人言論,指英國在八十年代中英談判期間,已銳意培養一批政商界人士做代理人,甚至加入MI6(英國軍情六處),回歸後繼續潛伏香港,第一梯隊「港英餘孽」代表人物為陳方安生,至於第二梯隊是誰,佢老人家冇點名,但暗示係自由黨人馬,包括李鵬飛及田北俊。

文章一出街,幾個政壇名人即爆發口水戰,田少直斥吳康民胡言亂語,係不甘寂寞嘅「過氣老共」,飛哥亦㷫到爆,話指控既唔公平,亦非事實,聲稱當年末代港督想收佢做「o靚」,被佢拒絕,自己連英國護照都冇,點可以話係「港英餘孽」?

本刊記者搵飛哥詳述當年同肥彭交往經過,佢爆咗一段鮮為人知嘅秘聞。佢話,回歸前佢有一次同周梁、夏佳理等訪英,曾與肥彭見面,當時對方仍係保守黨明日之星,未委做港督,對呢班香港訪客十分冷淡,唔係好騷,後來肥彭被委做末代港爺,到香港上任不久,就邀請飛哥上港督府食早餐,態度一百八十度轉變,熱情咗好多。

肥彭當時讚飛哥服務香港十幾年,好有貢獻,話想畀個爵士銜佢,條件係做佢隻「馬」。「我當時冇講好定唔好,返到去同『啟聯』(飛哥等創辦嘅政團)核心周梁及張鑑泉傾,張鑑泉覺得冇所謂,我就覺得冇咁大隻蛤乸,一定有啲嘢,周梁都係咁諗。」

冇幾耐,肥彭再約飛哥食早餐,「今次佢就擺明車馬,叫我支持佢。梗係啦,我個『啟聯』當時在立法局有二十五票。」肥彭知道要推自己套政改方案,必須過到立法局個關,飛哥一幫人係關鍵。

飛哥諗過度過,終於都係拒絕做肥彭條o靚。據佢了解,肥彭之後,亦搵過李柱銘,想同民主黨前身「港同盟」合作,最後都係不了了之。

飛哥向本刊爆當年秘聞,以反駁吳康民(小圖)嘅「港英餘孽」指控。佢話肥彭兩度收佢做「o靚」都被拒!