高官有支基督徒尖兵

近排基督教內兩派為應否「佔領中環」撕裂，互相在網上及透過傳媒開片，吳宗文及林以諾兩位牧師先後成為箭靶，連立會議員梁美芬都被辣埋（因為吳牧師曾幫佢拉票），睇嚟遲早波及班基督徒高官。

官場老友指，政府高層一直有股基督教徒勢力，不時會聚埋開祈禱會，進行靈性交流，面對逆境互相開解，靠神嘅力量頂住壓力，可以話「自成一派」。

新一屆團隊中，政制及內地事務局局長譚志源、商務及經濟發展局局長蘇錦樑、發展局局長陳茂波、新聞處處長黃偉綸、房運局副局長邱誠武，都係極虔誠基督徒；紀律部隊方面，廉記專員白韞六係教會執事，早已好信耶穌，不過唔會同高官一齊崇拜。

已離職高官中，基督徒亦有唔少，前政制局局長林瑞麟唔止信教，退休後仲專程去英國讀神學，欲將信仰升上更高層次；已由保安局局長轉變角色成為人大代表嘅李少光亦係基督徒，曾經同林瑞麟一齊講道；前律政司司長黃仁龍都是「同道中人」，個個禮拜去教堂。

香港社會大分化，基督教亦難避免，「佔中」發起人朱牧師同戴耀廷已開始串連教會內反建制力量，將來同建制派及高官基督徒兩陣對圓，到時天父唔知幫邊面！