為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2013 年 04 月 29 日

高官有支基督徒尖兵

近排基督教內兩派為應否「佔領中環」撕裂,互相在網上及透過傳媒開片,吳宗文及林以諾兩位牧師先後成為箭靶,連立會議員梁美芬都被辣埋(因為吳牧師曾幫佢拉票),睇嚟遲早波及班基督徒高官。

官場老友指,政府高層一直有股基督教徒勢力,不時會聚埋開祈禱會,進行靈性交流,面對逆境互相開解,靠神嘅力量頂住壓力,可以話「自成一派」。

新一屆團隊中,政制及內地事務局局長譚志源、商務及經濟發展局局長蘇錦樑、發展局局長陳茂波、新聞處處長黃偉綸、房運局副局長邱誠武,都係極虔誠基督徒;紀律部隊方面,廉記專員白韞六係教會執事,早已好信耶穌,不過唔會同高官一齊崇拜。

已離職高官中,基督徒亦有唔少,前政制局局長林瑞麟唔止信教,退休後仲專程去英國讀神學,欲將信仰升上更高層次;已由保安局局長轉變角色成為人大代表嘅李少光亦係基督徒,曾經同林瑞麟一齊講道;前律政司司長黃仁龍都是「同道中人」,個個禮拜去教堂。

香港社會大分化,基督教亦難避免,「佔中」發起人朱牧師同戴耀廷已開始串連教會內反建制力量,將來同建制派及高官基督徒兩陣對圓,到時天父唔知幫邊面!