為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 娛樂放題  > 留星語 2013 年 03 月 30 日

雄‧潮‧風 方中信

在晴空和潮浪的襯托下,站在岩石上拍照的方中信顯得威風凜凜,眼神(裝作得)有點銳不可擋。

男人五十,理應甚麼滄桑都會寫到臉上去,但他呢,彷彿由初出道開始便已經注射了大量雄激素,man足廿五年,到今天,臉上也只是多了一些幸福美滿的神情。

「入咗行廿五年,依家仲企得喺度、仲健在,算係好好o架啦,叫做keep到囉!生活簡單嘛,生活簡單咪OK囉!」有幾簡單先?「咪做番正常人嘅嘢囉,買餸、做運動、湊女,同朋友打吓邊爐咁囉。我結咗婚之後都好早瞓,未有細路之前,十一點幾瞓;有咗細路,食完飯,八點幾就會上牀,睇一陣電視,九點幾就瞓,朝早七點鐘起身。」

這樣的「超正常」生活,我是有點愕然的,因為他總是像個不願瞓的夜鬼。「我唔係咁鍾意蒲o架,蒲係要付出代價o架嘛,係咪先?做咗爸爸,責任感大咗,再加上我五兜嘢啦!係咪?咁都要健康啲囉盡量。」

所以,年到半百、原名符力的方中信,外形現在還可以繼續雄赳赳,多少都要多得莫可欣和囡囡符迦晴的造化。

補Shot

姑勿論最近有報道指○八年莫可欣懷有身孕,是先斬後奏用來箍實方中信的報道孰真孰假,但方中信對於女兒符迦晴出生時的情景,卻是真的記憶猶新。

「我哋係擇時間開刀生,所以我老婆都冇乜點痛。生嗰陣我冇剪臍帶,因為我怕血,唔敢入去,就算入去,都係白嘥嗰千幾蚊。

「我叫我朋友拍低成個過程,點知由佢(老婆)推入去(產房)十幾分鐘,(醫護人員)就話抱住嚿嘢出嚟:『生咗喇!』嘩!咁快趣就出嚟?跟住我就叫我朋友補shot,補我喺走廊度行嚟行去,等到好心急、好擔心個樣,因為由粵語長片到依家,爸爸等媽媽生BB,呢啲shot一定要有o架嘛!我自己撈呢行,第時畀啲朋友睇番,冇呢個鏡頭唔得o架嘛!」係嘅,係嘅。

一個如此魁梧嘅男人,對着一粒小豆丁該是個很有趣的畫面。「我初初都唔識處理一個BB,最驚就係換片!」換片都驚?「好核突呀,啲屎!我驚污糟呀!好彩我老婆成日都會幫佢搞,嗰陣又啱啱請咗個好好嘅工人,佢以前做過護士,咁就very good啦!」

早前迦晴表演芭蕾篇,他親自為女兒化靚妝。

為人父親後,方中信經常親自餵奶。

Shortie

時光荏苒,女兒現在已經五歲大,就讀國際學校。「個囡歲幾嗰陣,我哋已經諗住畀佢舒服啲,讀國際學校囉!佢依家讀書讀得好開心o架,主要都係講英文同國語,廣東話呢,佢識聽,講就流流哋。我哋都打算等佢讀到中學,送佢去外國讀書,因為香港嘅教育太填鴨,只可以用一個『流』字嚟形容!」

看方中信的微博,不時也會張貼他和小迦晴的照片,大概女兒也有不少令他感動難忘的事吧!「冇喎!佢淨係識叫我買嘢!有需要求我嘅時候,咪會黐我囉!佢都醒o架!」

咁個囡有乜嘢似你呢?「學咗我內向囉!要同佢熟咗先有嘢講囉!咁就大鑊啦!依家呢個年代,競爭咁大,interview嗰啲,慢熱咪蝕底囉!不過我老竇教我,做人要實在,唔好吹,呢樣嘢好重要!所以我都希望我個囡可以踏實啲。

「我個囡有樣嘢好,就係佢矮!佢細粒,可以執啲同學仔嘅舊衫着,咁好好呀,環保呀嘛!佢啲同學比佢起碼高半個頭!最矮嗰個都高佢三分一個頭!所以我成日都叫佢做『shortie』!哈哈哈!」

但你同莫可欣都生得高大個喎……「咪就係滴少咗兩滴囉!多兩滴就冇事喇!如果唔係乜嘢叫做意外啫?」係嘅,係嘅。

他坦言,迦晴令自己最大的改變是慳錢。「以前會買幾百萬嘅車,依家可能只會買百幾萬咁囉!」

默契

他和莫可欣一起十七年,○八年在女兒出生前兩天結成夫婦。「我哋太耐,好多嘢都有晒默契,好多嘢唔理、唔問,就最好!嗌交呢,就間唔中都有一劑啦!唔嗌交會死o架!咁嘈完,咪丟淡一、兩日算囉!一隻手拍唔到掌o架嘛!」

在家庭崗位上,他主外,她主內。「我咪畀張附屬卡佢碌囉。佢依家有個好處,就係唔鍾意行公司,但係,好鍾意上網,仲要係上美國網,跟住DHL過嚟!

「有一日,佢突然孭咗個你哋啲女人好鍾意嘅愛馬仕,Hermès,Ai Ma Shi,我話:『喂,幾時買o架?』『喺網上面買o架。』『七皮幾嘅喎呢個。』」

方中信向來愛車如命,迦晴更用Hello Kitty貼紙貼他的廿多萬Ducat電單車和頭盔。

你又知幾錢?「因為有次喺C1頭條,馬德鐘話佢買個愛馬仕畀老婆,唔知點樣平咗都要七皮幾嘛!」又話「唔理、唔問」最好?「嘩!一攞出嚟,咁sharp!點會唔知!不過算啦,佢都有節制、有分寸嘅。咁講真,依家我都afford得起,咁好多嘢都係自發o架啦!合理去做一件事,負擔得起,咪OK囉!」

外表剛烈的方中信,內裏對老婆卻有細心體貼的一面。「我都有送過兩粒鑽石囉!初初搵到錢,送過一粒一卡;跟住再搵到錢,送過粒兩卡幾,跟住,你知啦,一跳就跳到三卡……嘿嘿,我諗我開刀攞粒膽石畀佢,就十卡都有囉!」

信任

雖說已年屆五十,但方中信的外形至今仍然很得女性歡心,這方面,符太可有擔心過嗎?「咁耐以嚟,佢都好信任我!我啲朋友,佢全部都識晒;我去邊,佢都知道晒!我都講咗,我唔鍾意蒲,最頂籠係食吓飯,打吓邊爐,然後十點幾十一點返屋企,咁好正常呀!依家仲有乜嘢燦爛啫?唔通幾條友走去卡拉OK,搵幾條女猜吓枚呀?厭啦吓嘛?有乜意思呢?到咁嘅年紀,我都係慣咗喺屋企多啲!」

與莫可欣交往十七年,他坦然彼此已有一定的默契。

但娛樂圈靚女這麼多……「係呀!其實我嗒過好多個o架啦!哈哈哈!邊有啫?真係冇喎,惟有可以解釋嘅,係我條命唔好囉!接觸到啲靚人,都係廿幾歲,廿幾歲點都揀番啲廿幾三十歲o架啦!係,有啲(女仔)對我好好,但我諗唔係嗰隻囉!我依家拍劇時都有撩女『口交』o架——即係用口嚟交流!所以我老婆好放心o架!同我拍戲啲女仔都好開心o架!阿苟姑娘(苟芸慧)、阿朱璇呀,我開親工都撩佢哋,佢哋又知道我冇居心,大家知道乜嘢關係,十幾個鐘,嘻嘻哈哈,消磨吓時間幾好呀!

「我唔想煩,你撻着咗條引,嘩!點搞呀?係咪先?做人平平淡淡、穩穩陣陣、實實在在,傳乜嘢(緋聞)啫?我永遠都係本住我個宗旨:no news is a good news。呢個圈咁多誘惑,咁你吓吓都要去咩呀?我又唔係後生,後生就話把持不住啫。」

都係五十歲啫,又有幾老呀?符生。

黃長興(右一)結婚當日,方中信因為甩鞋底險些遲到。

在《仁心解碼》中的高立仁,其實和現實中的方中信一樣是爛gag王。

八七年,他與夏文汐拍《朝花夕拾》,導演為他改了男主角的名字「方中信」為藝名。

賓艾佛力

三月十七日,方中信正式踏入五十歲,他說:「我只係話我唔係後生,唔係話自己老。」

然後他立掌張開,由最上的拇指開始,逐隻手指數下來:「二十、三十、四十、五十、六十,我正值壯年呀!」他捉着無名指說。大家即時明晒!

既然咁壯,夜晚跟阿符太應該很忙啦!「我個囡依家要瞓喺我哋中間,佢就三百六十度打轉,我就晚晚中拳、中腳,打咗我幾鑊o架啦已經!」冇得操,點算先?「做運動囉,我啲精力都虛耗晒喺運動度啦!」咁要服用「勃勃素」了!「食『勃勃素』有乜用呀?依家有隻叫『喜鵲』呀,你真係呀!我嗰次睇報紙睇到,我覺得改名嗰條友真係好有意思、好到題!」

那五十歲如何可以keep到咁壯呢吓?「『一起威』!」

甚麼「一起威」呀?《雄風》啲friend?「no!嗰陣我有次喺尖沙咀七十一度拍劇,嘟八達通嗰陣,見到成堆春藥擺晒喺旁邊,其中一隻叫『一起威』,呢個名我覺得好有意思喎!不過今時今日,『喜鵲』已經取代咗佢個位!你諗吓,如果一個男人需要食呢啲嘢,一聽見『喜鵲』都已經得咗!你買奶粉,啲名都有個『兒』字、『嬰』字啦,實係咁o架,真係有意義o架喎!」

然後,我想起了,有人說,荷李活男星Ben Affleck是名副其實做春藥代言人的爛gag……

五十歲生辰,他本來打算搞「Give Me Five」生日party,但最後還是與老婆和囡囡一起過。