阿爺變招搶先亮底牌　與泛民硬鬥硬

今次普選之爭，未正式開畫已高潮迭起，泛民提出「佔領中環」想先聲奪人，喬老爺就擺明車馬直言「與中央對抗的人不能做特首」，準備硬碰硬，往後勢必好戲連場。

知情老友指，阿爺今次改變咗打法，同過往好唔同。以前幾次推政改，阿爺唔會一早出聲，由特區政府先搞一輪諮詢，擬出方案之後，再游說立法會班大帝支持，有關高官赤膊上陣同泛民打硬仗，一○年政改一役，煲呔就同曾班子齊齊「起錨」，上街衝鋒陷陣，結果頭崩額裂，阿爺到最後關頭出手斟掂民主黨妥協，至過到關。

阿爺今鋪改變打法，一開波就講清楚普選底線，唔會隱隱晦晦畀泛民先佔上風。喬曉陽（左）周日擺明車馬，就係同對手講，你硬我可以更硬。

呢鋪泛民一開波就搖旗吶喊強攻，擺出架式要玩大佢，連民主黨都話會硬砌，阿爺見到形勢險惡，如果再鵪鶉唔表態，就會被泛民帶住走，變得十分被動。CY想將政改諮詢延遲到明年，呢個緩兵之計亦非上策，反而令泛民有空間造勢，故此阿爺決定搶先亮出底牌，向公眾講清楚底線，再發動各方同泛民硬撼，反而可以轉被動為主動。

知情老友講，政治局常委俞正聲早前見港區代表時，已斬釘截鐵話「香港必須由『愛國愛港力量』長期執政」，即係「對抗人士」唔可以當權，喬老爺只不過跟住中央調子，講得再「白」啲。習、李新班子上場後，外交方面明顯更硬朗，對香港政策亦同出一轍，你硬我更硬，唔會隱隱晦晦，拖泥帶水，以免對方佔上風，到時就更難拆解。

泛民搖旗吶喊提出「佔領中環」，促使阿爺要行快一步。

三要員周日約齊建制派議員講阿爺底線，仲有個用意，就係要求佢哋團結打呢場仗，因為上次唐梁之爭令建制派四分五裂，如果大家對政制問題唔一致，就好難同泛民鬥！

阿爺搶閘出招，將成為泛民進攻目標，特區政府就變咗配角，跟住條line做嘢就得。官場線人講，政制及內地事務局長譚志源可以蹺埋手，唔使苦諗方案，聽聞政改文件最近去到林鄭枱面時，佢亦冇乜改動，冇加自己意見，將件事交番畀CY去搞，而CY亦走唔出個框框。對負責執行嘅高官，亦係好事，起碼唔使諗餐死，亦毋須企在風口捱風吹雨打，更加可以免演「起錨騷」。