「御用」律師母親舉殯 CY低調現身
CY近期好頻撲，京港兩邊走，不過，百忙之中，周日晚靜靜雞去咗香港殯儀館一轉，低調入靈堂致哀；何方人物辦喪事咁巴閉，連特首都畀面親臨？本刊記者後來「八」到，原來當晚係CY「御用」律師岑文偉為母親舉殯。
岑文偉來頭唔簡單，佢原來係CY御用律師樓「薛馮鄺岑律師行」的合夥人，多年來在公在私幫CY做嘢，關係緊密，交情亦好深。CY於二千年購買山頂豪宅裕熙園五號屋時，負責造契嘅，除胡關李羅律師行外，仲有薛馮鄺岑律師行，提供意見確認有冇僭越鄰居業權。早前CY發表十四頁聲明解釋大宅僭建，就首次公開岑文偉幫佢處理樓契。
特首選舉期間，薛馮鄺岑律師行更加全權處理同CY選舉有關的法律事務，當中包括西九研訊，另一名高級合夥人薛建平更陪同CY上立法會。
最近劉夢熊爆料引發練乙錚評論涉嫌誹謗特首事件，CY罕有以特首身份發律師信畀練乙錚，呢封信亦係由薛馮鄺岑律師行發出。
CY（中）去香港殯儀館出席「御用」律師岑文偉（左一）母親喪禮，全程低調，冇乜人知。（調查組攝）
CY呢間「御用」律師行，在行內屬中等規模，於一九八一年創辦，同內地關係幾好，○一年已經獲司法部批准，去西安開分行，顯見有頗強人脈。律師樓客戶中亦有其他名人，例如連戰之子連勝文在港登記結婚，亦由其律師負責主婚。
知情者表示，岑氏一家於法律界頗有名氣，岑文偉有兩個兄長，大哥岑文禎係該律師樓創辦人，早於八十年代，CY同一班香港專業人士組團上京了解香港回歸問題，岑文禎亦有同行，估計雙方淵源就係當時建立。岑文禎現已退休，於楊振文律師行做顧問，律師行合夥人身份已交畀細佬岑文偉；而岑文偉的二哥岑文光，係另一間律師樓合夥人，可謂一門三傑。
岑文偉所屬的「薛馮鄺岑律師行」與CY關係密切，該行高級合夥人薛建平，去年陪同CY出席西九研訊。
