為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2013 年 02 月 19 日

啤啤熊「罪嫌」明顯 警方 隨時拉人

啤啤熊成個新春冇晒影,風頭躉變咗縮頭龜,人家喜氣洋洋,佢就淒風苦雨,認真慘情。原來佢年廿九覺心翳,呢種情況可大可小,於是急急入養和醫院,年初一要喺病牀過,都幾陰功,雖然冇乜事出返嚟,但新正頭一直深居簡出,可能驚被傳媒追訪,講多錯多。

劉夢熊寫信畀CY,要求干預廉記調查,疑似信件內容近日曝光,除涉嫌妨礙司法,仲有恐嚇成分,據知警方已準備做嘢,隨時拉人。佢亦知形勢險惡,新春期間畀短訊友好,自比為鄧小平「三落三起」。

佢獨困愁城,為解鬱悶,發出一段短訊畀好友吐苦水,話喺呢段日子想起鄧小平「三落三上」,又想起越王勾踐,卧薪嘗膽,意即自己雖然黑過墨斗,跌咗落谷底,但整佢唔死嘅,總有翻身一日。佢仲吟咗首宋詞,其中兩句係:「無奈花容難為久,春來竟凋零。殘固不堪殘,何須自尋煩?」不過「花落自有花開日」,請各方好友放心。

啤啤熊以詞寄意自我安慰,同自己講「冇事嘅,冇事嘅」,但實情似乎唔係咁,佢爆CY陰毒單嘢,仲有好大條手尾跟,分分鐘死得人!

啤啤熊當日向CY掟炸彈之後,即有人向傳媒放料,指佢曾寫信畀CY,要求叫停廉記對佢嘅調查,消息出街後,佢同特首方面都冇否認,但呢單嘢可以好大鑊,因為咁做係促使特首影響廉記執法,有妨礙司法之嫌,執法部門有權向當事人攞封信睇,如證據確鑿可以拉人。

早前本刊已聽聞呢單嘢正由警方處理,好可能採取行動,但因封信一直冇曝光,外界唔知啤啤熊點寫,差人係咪有料做嘢。前日終於有人將一封「疑似」信件放畀傳媒刊出,係真係假仍待證實,但睇嚟唔似偽造,信中最攞命係最尾幾句:「去年十月二十一日,我在長春,你打電話給我,兩次強調『夢熊,你放心,我不會過橋抽板!』期望你『言必信,行必果』,同白韞六專員打招呼,請他的手下慎之又慎,否則將引爆政治炸彈!」

據呢封疑似信件,啤啤熊要求CY同廉政專員白韞六「打招呼」,小心處理單案。熟悉法律人士認為咁講已有妨礙司法之嫌。

熟悉法律嘅政圈人士指,啤啤熊叫CY同廉記阿頭「打招呼」,叫廉記班夥計做嘢小心,即係要特首運用權力影響調查,觸犯妨礙司法罪嘅嫌疑好明顯,加上臨尾嗰句話會爆大鑊,更帶有恐嚇成分,涉及另一條刑事罪。呢封信嘅罪嫌咁清楚,警方好難唔做嘢。

今次有人將封信揚出嚟,好可能係警方出手拉人嘅先兆,就算唔即刻拘捕,亦會搵啤啤熊去問話,作進一步調查。聽知情人士講,啤啤熊亦知道目前形勢險惡,所以一直匿藏唔露面,因為再講錯嘢只會衰多幾錢重!