父母十個新年願望

恭喜大家做父母，

日日開心冇投訴，

十個願望放喺心，

希望個個都可成真！

願仔女百毒不侵，

從來唔使睇醫生，

就算感冒高峰期，

健康一樣冇冚旗。

願仔女有禮貌，

尊重長輩唔難教，

唔會一言遇九頂，

幾歲人就扮懶醒。

願仔女有運氣，

考親名校都OK，

直上大學都咁順利，

從來唔使你勞氣。

願仔女夠聰明，

考試唔會眼擎擎，

科科唔係B就A，

讀書專心過打機。

願仔女快高長大，

最緊要唔好學壞，

唔會學人去拍拖，

細路哥做番細路哥。

願仔女EQ高，

唔會咁容易爆煲，

無論順境逆境好，

勇敢面對冇Say No。

願仔女搵到好工，

做乜崗位都咁輕鬆，

最好一年升一級，

公司永遠冇執笠。

願仔女愛情有着落，

唔會年年月月都咁寂寞，

最緊要識得拉埋個天窗，

仲要早日派豬腳薑。

願仔女嘅一生，

事事順利冇變更，

開心養育下一代，

一家大細都有愛。

願仔女要孝順，

唔嫌父母嘅論盡，

供養父母唔嫌棄，

養兒之恩冇忘記。

恭喜所有孩子，充滿朝氣；

恭喜所有父母，天天歡喜。

新年快樂！