為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2009 年 07 月 07 日

證監企硬 阿甘搞局 阻雷曼和解

韋奕禮堅持銀行要百分百賠足,刺激部分苦主繼續死砌。

雷曼苦主周日又上禮賓府搞嘢,聲嘶力竭大叫煲呔落台,仲激到走出馬路block晒兩條行車線,駕車人士無路可行媽媽連聲,但呢次行動數埋得百零友,再一次露出「2仔底」。

七.一遊行之前,雷曼苦主大聯盟阿頭陳光譽拍晒心口同泛民班友講,話當日可以班到兩萬幾人上街,仲話呢隊人馬咁大,一定要行頭位,民陣梗唔肯啦,結果苦主玩分裂,自己率先起步。到咗遊行嗰日,雷曼苦主出發時有三、四千人,去到政府總部少咗一半,唔到二千,陳光譽竟然厚面皮到話人數有兩萬五,真係吹水唔使抹嘴。線人回報,泛民今次被雷曼苦主阿頭誤導,好唔高興,話對方冇口齒,以後最多信佢哋兩成。

知情老友話,苦主上街人數少,係因為多咗人肯考慮和解,如果銀行嘅建議OK,就算蝕少少,亦可以將就吓接受。最近香港中銀準備提出一套和解方案,六十五歲以下客戶賠六成,呢個歲數以上客戶就賠七成,將來出售抵押品如多過呢個賠償價,亦會畀番苦主。如果苦主接受呢個方案,香港中銀要攞幾十億出嚟,唔係少嘢,可以話十分慷慨。老友慨言:「中銀肯咁賠法,苦主算執到身彩,舊年投資冇乜人唔蝕,如果高位時買咗滙豐,依家都唔止輸四成啦,我知道的確有唔少苦主心郁!」

中銀開咗個頭,香港十六間分銷銀行最近就以呢個方案做基礎,聯名寫信畀證監會,提議進行集體和解,雖然各行賠償細節未必相同,但賠六、七成已係大方向。

銀行肯鬆手,好多苦主又願意妥協暫時先攞番六成,本來事件已露曙光,奈何和解路上仍有兩大石阻頭阻勢,前進不得。

做「英雄」免受靶?

甘乃威叫苦主唔好停,搞到底。

早幾日證監會行政總裁韋奕禮上立法會,講到中銀嘅和解方案,就正氣凜然話,呢個方案「非常唔理想」,只賠六成畀苦主「好唔公道」,應該賠足十成。知情老友對韋奕禮企到咁硬,搲晒頭大惑不解:「佢應該知道即使集體訴訟追到底,都唔可能攞到百分之百啦,而且打官司要幾年時間,用錢唔少,繼續落去對班苦主一啲好處都冇。證監會咁做,可能性之一係為咗面子,要show畀苦主睇佢哋係正義嘅;另外,當年雷曼迷債呢種投資產品係由證監會批出,苦主同立法會曾經「釘」住證監會,要佢交代,依家佢轉一吓身,變咗『英雄』,就唔使受靶。究竟證監會係咪咁諗,冇人知,但值得大家思考吓。」

除咗韋奕禮,民主黨甘乃威亦一直煽班苦主企硬,誓要爭到百分百賠償至收貨。泛民線人話,阿甘一早就揸住雷曼事件呢個「靚籌」,食到唔少甜頭,例如七.一遊行前,民主派嘅大哥就寄望阿甘搵一兩萬苦主嚟撐場,可見苦主已成為阿甘嘅「獨門法寶」。正因為咁,阿甘一直落足嘴頭說服班苦主搞落去,最好搞到兩年後立法會選舉,咁佢就坐定粒六,如果苦主於短期內散檔,阿甘就忽然冇晒籌碼,對佢影響好大。

現時幾方面各懷目的,最慘係一眾雷曼苦主,如此一拖再拖,要攞番錢遙遙無期,而少數激進苦主則愈搞愈激,令香港永無寧日,最終個個都成為輸家。官場老友話,政府睇見咁嘅情況,都十分焦急,準備落更大力度「夾」證監會同銀行達成妥協,希望早日搞掂單嘢。但證監會係獨立行政機構,官員難免投鼠忌器,而班政客又不停煽風點火,惟恐天下不亂,實在好唔容易搞。

嘩鬼玩「鬥爭派對」毓民㩒唔住

七.一遊行完咗,二百幾友霸佔政府總部外空地唔肯走,發晒癲喧嘩鼓譟,又身髹白漆綁在燈柱上當行為藝術,更離譜係公然集體射尿。泛民線人話,民陣、民主黨同公民黨都唔當呢班嘩鬼係自己友,一早就劃清界線,更擔心佢哋咁玩落去,會嚇怕溫和中產市民,以後避之則吉。

線人仲話,即使爛仔如社民連,裏面亦有兩種睇法,當晚毓民就唔同意班友死守政府總部搞激烈抗爭,曾經打電話畀部分在場fans,勸佢哋見好就收,散隊離開,但長毛有交打就開心,成晚在現場撥火,一於玩鋪勁。 其實呢班友只有部分係社民連人馬,其他來自幾個在網上串連嘅小組織,包括「七○一部隊」、「彩虹行動」等,加上支持藏獨嘅陳巧文聯同一班朋友仔,齊齊趁熱鬧玩「鬥爭派對」,當係去另類disco。結果眾人一起「瘋狂今晚夜」,盡興而歸,留下一灘尿迹、一地垃圾以及百幾警員嘅汗水。

呢種嶄新遊戲方式,有在苦悶少年中流行之勢,最弊係呢股力量唔屬於泛民主流,好可能由社民連收編,成為一支乜都敢做嘅童子兵(同陀地社團搵學生哥入會冇乜分別),以後就亂上加亂。有關方面對呢個趨勢唔好掉以輕心。

一班嘩鬼青少年在政府總部大玩「抗爭」,瘋狂一晚夜,甚至集體射尿(右圖),搞到差人一頭煙,連毓民都冇符。

大遊行「抽水」公民黨最奀

今年七.一遊行,各泛民政黨循例「揸兜」沿途籌款,趁機抽水,埋單計數,比舊年都多咗,其中以民主黨成績最好,由十一萬增到三十一萬;社民連亦唔錯,比上年多咗十一萬,籌到二十五萬;公民黨雖然亦進帳十五萬,但比起舊年(八萬),升幅是各黨中最低。根據呢個指標,公民黨受市民歡迎程度明顯下跌,政治明星魅力迅速減弱,各位大狀要好好反省啦!