為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > Paco巨星飯堂 2013 年 01 月 09 日

黃栢高

黃栢高(Paco),金牌經理人,叱吒樂壇三十年,炮製無數金曲,捧紅不少歌手。近年涉足電影,《行運超人》、《龍咁威》、《殺破狼》等,皆叫好叫座。最新動作,除於本刊主持《Paco巨星飯堂》,每逢周一更在《頭條日報》主持「名人會」專欄,專訪城中名人、紅星。

來忘掉過去

90年代嘅《古惑仔》系列,係香港影壇經典,一手策劃製造經典嘅王晶(晶哥),將《古惑仔》復刻。2013年,係時候忘掉過去,睇全新人馬喺《古惑仔:江湖新秩序》呈現一股新氣象!

今晚「Paco巨星飯堂」就邀請咗全城最齊嘅「古惑仔」:羅仲謙、沈震軒(Sammy)、林子善、伍允龍(Philip)、梁烈唯同何浩文(Dominic),同我一齊去到位於沙田嘅「漁民火鍋雞煲專門店」,邊歎出色海鮮、雞煲,一邊暢談「古惑」之路。

今晚我同《古惑仔:江湖新秩序》一眾「古惑仔」飯敍,「包皮」林子善、「浩南」阿謙、「山雞」唯唯、「o靚坤」Sammy、「大天二」Dominic及「大頭仔」Philip,夠晒齊腳!

咪以為Philip(左)呢個武術高手天不怕地不怕,要手執生猛龍蝦時,佢就交畀阿謙(右)代勞。

經典新演繹

當我問到眾「古惑仔」能夠參與演出《江湖新秩序》嘅心情時,阿謙、子善就齊唱:「來忘掉錯對,來懷念過去……唔係,係來忘掉過去先啱!」

哈哈哈!佢哋答問題都不忘先搞gag,「浩南哥」阿謙話:「《古惑仔》係唔少人嘅集體回憶,但係今次我哋就用新嘅方法演繹,希望不論新舊嘅觀眾,都有一種新鮮感。

「我自己就好鍾意個結局,因為一般觀眾都期待陳浩南同細細粒嘅感情線,但係細細粒今次係喺最後一幕先出現,有一種『等到嘞!』嘅感覺。」

子善、唯唯同阿謙(左至右)係好拍檔,做「兄弟」更見默契。

現時好少電影純以香港作為唯一市場,《江湖新秩序》係繼《低俗喜劇》之後嘅例子,戲入面有唔少暴力場面同粗口對白,並非為做而做,而係為咗突出「古惑仔」嘅形象,其中唯唯就係爆粗代表之一。

「我好記得,樂小姐同我講嗰時我揸緊車,佢話晶哥搵我拍《古惑仔》,我未知做咩角色就已經話好嘞!後來先知有謙仔、子善同Sammy等人,全部夾慣夾熟,一定好玩!

「到知道係飾演『山雞』之後,都唔係好介意係咪有好多粗口對白,因為古惑仔吖嘛,講粗口更加貼近現實,唔係做戲咁做。」

招牌魚鰾湯底($188)係用大地魚等材料,配合十斤或以上重嘅門鱔肚熬製6至7小時而成,集各種精華於一鍋。

重慶雞煲(半隻$118/1隻$198),有大、中、小辣之分,亦係餐廳招牌推介。

真正兄弟班

唔係做戲咁做嘅,仲有一眾「古惑仔」嘅兄弟情,除咗唯唯口中「同謙仔、子善夾慣夾熟」之外,原來子善、唯唯、阿謙同Sammy係一早相識。子善話:「好耐之前我喺演藝人協會籌備一個聯歡會,有人介紹我同Sammy識,佢好coolo架!只係同我講一句:『我要唱歌!』就行開咗,之後我梗係要安排佢唱歌啦!我仲記得佢唱張學友版嘅〈聽海〉添,真係OKo架!」

Philip身兼演員同動作指導,多才多藝。

Dominic首次飾演「古惑仔」,佢視為事業上一大突破。

一提到Sammy喺戲中同女演員有火辣場面,佢一眾「仇家」齊聲一「嘩!」(小圖)。

哈哈哈!子善一邊講,Sammy就聽到面都紅埋,好兄弟,冇計嘅。而Sammy、Dominic同Philip,全都喺外國長大或留學,同聲同氣,飾演「大頭仔」又身兼動作指導嘅Philip,忽然爆兄弟秘密,「除咗子善之外,個個都同我講:『喂Philip,幫我度啲動作,拍出嚟型仔啲嘅,唔該晒!』

「哈哈!我話我盡力而為啦!不過佢哋個個都好落力,謙仔話打爛仔交係見乜擸乜,我都覺得好make sense,佢哋都有幫手o架!」

子善(左)同唯唯(中)話Dominic口水多,要瞓一陣,連阿謙(右)都偷笑。

今晚陽剛味極重,我同一眾「古惑仔」,食得開心,傾得暢快!乾!

動作話事人

哈哈哈!講到動作,飾演「o靚坤」嘅Sammy喺戲中分別同兩位女演員有親熱場面,其他「古惑仔」一講到呢類「動作場面」,一致向Sammy大表羨慕,而主角只係話:「其中一個對手係梁敏儀,佢好professional,叫我唔好緊張,放膽做就OK,多得佢我先可以一take過咋!」

至於飾演「大天二」嘅Dominic,就話終於可以一洗「警氣」,「之前拍嘅戲多數都係做警察,今次可以改吓戲路做古惑仔,係一次新嘗試。」

全部「古惑仔」都表示,對新作充滿期待,我都以呢杯威士忌,預祝《古惑仔:江湖新秩序》大收!乾!

餐廳嘅餃類同丸類,全部自家製,份量十足。

活捉車蠔刺身(時價),係日日新鮮本地出品,必試!

象拔蚌刺身(時價),鮮甜有咬口。

牛三拼($348)有唔同部位供「牛魔王」品嘗。

值得一提係餐廳嘅海鮮多數喺香港一帶水域出產,包括呢條活白「魚立」刺身(時價)。


漁民火鍋雞煲專門店
地址:沙田沙角街8-12號沙田花園城1期地下3A-3F號舖
電話:2447 9902