為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > Paco巨星飯堂 2009 年 07 月 10 日

黃栢高

黃栢高(Paco),金牌經理人,叱吒樂壇三十年,炮製無數金曲,捧紅不少歌手。近年涉足電影,《行運超人》、《龍咁威》、《殺破狼》等,皆叫好叫座。最新動作,除於本刊主持《Paco巨星飯堂》,每逢周一更在《頭條日報》主持「名人會」專欄,專訪城中名人、紅星。

Yesterday Once More

熟識我嘅朋友都知,我係放眼明天嘅人,「聽日先係最重要」係我經常放喺嘴邊嘅金句。不過,面對馬浚偉(Steven)呢位嘉賓,我又唔介意同佢話吓當年㺪。我唔講你未必會知,Steven係我一手發掘帶佢入樂壇,93年我為佢度身訂做《幸運就是遇到你》呢張專輯,令Steven投身演藝界。

一眨眼就16年,Steven亦搖身變成電視小生,《碧血鹽梟》正播到高潮階段,今晚我哋就嚟個yesterday once more,歎吓工藝同佢一樣咁講究嘅「功夫菜」,率先慶祝吓better tomorrow!

飯局金句:聽日先係最重要!

眨眼跟Steven相交16年,當年我就係覺得佢正直、好學,係一位不可多得嘅藝人,佢由歌手變成依家歌、視雙棲,果然叻仔。

十六相聚

酒逢知己,有美酒當然要推介畀好朋友,我向Steven介紹嘅「Glenlivet 18」,平靚正!

跟Steven緣起93年,但係我哋只喺華納唱片合作近三個年頭就各奔前程,今次適逢佢嘅新劇《碧血鹽梟》播得火熱,我梗係要請呢位TVB當家小生去有80年歷史嘅蓮香樓分店——上環蓮香居,試吓依家買少見少嘅「功夫菜」啦!

所謂「功夫菜」,即係製作工序繁複,好考廚師功夫嘅菜式;就好似Steven家陣屢次挑戰唔同類型嘅角色,自我考驗演技一樣咁講究功夫!

Steven一見到枱上嘅串燒金錢雞,就邊夾畀我邊話:「Paco你唔好咁讚我啦!其實我依家都係一面做一面學,講起要多得你當年畀咁多機會我就真,真㗎!你畀咗最好嘅嘢我,但係我以前唔識handle你畀我嘅好嘢,好似同Sally(葉蒨文)合唱,阿Lam為我監製歌曲等等,我都唱唔出嗰種感覺,所以話人真係要有經歷、要成長嘅。」

哈哈!雖然今晚講明同Steven敍舊,但估唔到佢咁認真,其實我點會覺得佢嘥咗啲chance?反而當年我覺得Steven成日為最壞嘅情況打算,好聽啲可以話佢穩陣,我會覺得佢太過悲觀,所以我揀過一首〈不再悲觀〉諗住勉勵吓佢㗎,都話咗聽日先係最重要,唔係,「聽日」喺呢一刻都係有啲遠,眼前有一碟古法鴨腳包,佐酒最啱,Steven真係要飲杯先講!乾!

平民山珍

邊食邊敍舊,好酒停不了口,乾!

Steven唔講都唔知佢煮得兩味,今次我請你!下次,到你露兩手!

照顧到好朋友,我梗係照顧埋你哋呢班尊貴嘅讀者啦!唔好以為《金牌飯局》只係介紹啲貴價菜,今次蓮香居嘅「功夫菜」,就同Steven一樣咁入屋、咁親民,兩個係perfect match啦!

酒家方面知道我鍾意以美酒會良朋,特別炮製咗椒鹽大花蝦,搞到Steven讚口不絕,仲興起公開「馬氏食譜」;「講起上嚟我喺『華納』嘅年代都未識煮兩味,唔係一定請Paco你試吓!近呢5、6年我先至開始落手落腳煮,初時整吓白切雞;最拿手就係蒸魚雲!」

嘩!我估唔到Steven嘅招牌菜居然係睇落簡單但極考功夫嘅菜式喎。「係呀,個魚頭一定要新鮮先好食,所以我一定去深水埗白楊街嘅相熟街市入貨,老細會特登劏條魚畀我㗎。咁拎到返屋企我就鍾意用酸薑梅子蒸,好好味㗎!」

其實做藝人,有個嘜頭,去到邊都係VIP啦!今晚就係因為Steven,所以我哋一嚟到就有位嘞!「Paco,你唔好話,我真係好彩到連飲茶都唔使等位㗎!」See?哈哈哈!

對酒當歌

難得Steven同我一樣係性情中人,哈哈哈!我哋梗係笑聲處處,不停碰杯啦!

呢頭Steven講開蒸魚雲,服務員就端上雞蛋焗魚腸,又係佐酒妙品。我話你知,我識Steven嘅時候,佢好少陪我把酒談天,今晚佢就風趣咁話:「好彩我呢年嚟訓練有素啫!」哈哈哈!Steven學你話齋,人係要成長嘅,你嘅成長,近年喺電視圈嘅成績,有目共睹嘅,咁開心,又係cheers嘅時候!

話時話,Steven由93年客串《開心華之里》起,喺TVB一劇接一劇,唔少新一代嘅觀眾,大有可能以為佢係演而優則唱嘅「小生」,但係我相信Steven只要唔放棄,佢一定有機會遇到好歌。「多謝Paco,我仲想出碟㗎,依家我屋企裝咗套好pro嘅卡拉OK,用remote點歌嗰隻,我冇偷懶唔練歌,總有一日會大派用場!」

啱!要慶祝better tomorrow!乾!

蓮香居

地址:上環德輔道西46-50號2-3樓
電話:2156 9328