為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > Paco巨星飯堂 2012 年 12 月 12 日

黃栢高

黃栢高(Paco),金牌經理人,叱吒樂壇三十年,炮製無數金曲,捧紅不少歌手。近年涉足電影,《行運超人》、《龍咁威》、《殺破狼》等,皆叫好叫座。最新動作,除於本刊主持《Paco巨星飯堂》,每逢周一更在《頭條日報》主持「名人會」專欄,專訪城中名人、紅星。

與有榮嫣

今晚「Paco巨星飯局」,係美嘅薈萃,只需要睇嘉賓陣容已經一清二楚:名模陳嘉容(Eunis)同林莉(Carrie)共聚一堂,同我去到位於銅鑼灣嘅「月磯刺身.浜燒日本料理」,品嘗有特色嘅東洋風味。

請得兩大名模,除咗要向Eunis、Carrie請教扮靚心得之外,我不得不恭喜剛為入行20年推出紀念寫真集《嫣》嘅Eunis,今次佢仲將全部收益,撥捐香港癌症基金會乳癌服務,行善最樂,難怪伊人都嫣然一笑。

我同Eunis(左)、Carrie(右)兩名美模,今晚大歎日式燒物,two thumbs up!

紀念行善

我用「嫣然一笑」作為引言結尾,並非詩興大發,而係Eunis以「嫣」作寫真集之名嘅意思,「哈哈!嫣然一笑係笑得好開心嘅意思嘛。之前陶傑同我講,話『嫣』嘅含意係一個好正嘅女仔,成日要走嚟走去喎。因為『嫣』字嗰4點好似4隻腳咁,都幾有意思。」

哈哈哈!才子陶傑對Eunis嘅慈善寫真集嘅書名,一定有與別不同嘅演繹啦!而最冇界限嘅,係Eunis今次將全數收益捐出,「我揀香港癌症基金會作為受惠團體,係因為我做過晒research,知道善款嘅用途都可以trace到,確保善款都係用得其所。

Eunis嘅慈善寫真集《嫣》,係佢同攝影師Donold嘅心血結晶,我都即時揀書中心水shot,同Eunis合照留念。

「其次係因為我身邊有唔少朋友都試過被癌症抑鬱,無論係年輕過我或者係大過我嘅朋友,我見到佢哋接受治療之後冇晒頭髮,好心痛。所以,我希望今次籌到嘅善款,可以幫到有需要嘅人。」

善有善報,Eunis喺籌備到拍攝嘅時候,仲盡量控制成本,「我搵Donald(趙文強、著名攝影師),係因為我入行嘅時候已經同佢合作,當時佢仲係化妝師、髮型師,我哋又好熟,所以就算我喺佢面前着得好少衫,都唔會有唔自在嘅感覺。

「去到布拉格,我哋只係逗留4日,每日我哋都係邊行邊拍,冇租車,因為租車好貴,為咗籌多啲善款,我會盡量減低成本。」

創作壽司3款($80/款),係由廚師挑選最新鮮食材,加上創意而成。

湯葉帆立貝野日燒($60),味道清甜。

燒白子($100)係鱈魚精子,味道豐富,質感似豆腐,係冬日時令食材。

進軍巴黎

Eunis為入行20年留紀念,而Carrie呢位模界新星,就以踏上巴黎為目標,仲已經踏出咗第一步,「之前我去咗巴黎短住幾個月,主要係為未來鋪路,見過唔少designers同agents。

「喺巴黎嘅生活,同香港好唔同,而且好多嘢都要靠自己,係一次好好嘅經驗。嚟緊1月我會再去多一次,仲會喺巴黎過年,希望可以進軍國際啦!」

Eunis(左)同Carrie(右)難得共聚,係交流嘅好時候。

Carrie(右)專程喺巴黎帶手信畀我同Eunis(左),非常有心。

哈哈哈!Carrie嘅巴黎之旅,除咗係一次體驗生活嘅旅程之外,仲係佢踏上國際舞台嘅階梯,身處世界時裝焦點之都,連氣質都有所提升啦!

Carrie趁今晚同「師姐」Eunis會面,亦把握機會向Eunis取經,太專業嘅我在此暫且留畀兩位美女,實用嘅扮靚貼士,一定公開!Eunis話:「敷mask一定唔可以懶,每日都要需要,我就paper mask同cream mask交替咁用,保持皮膚質素。Carrie,你要帶多啲去Paris呀!」

鹽燒赤鯥魚($500),用以油分較豐富嘅赤鯥魚,燒後效果依舊嫩滑。

海鮮紙鍋($250)有蟹腳、帆立貝,精選魚肉及松茸,貨真價實。

正面溝通

哈哈哈!近期Eunis除咗敷mask保持容光煥發之外,好似仲有愛情滋潤咁喎。「哈哈!未係o架,都唔係男朋友,我仲喺溝通嘅階段咋!」Eunis以甜笑回應,睇嚟佢好快會告別單身日子。

「其實唔係好似傳媒講咁嘅,暫時叫佢S先生啦!S先生唔係南亞裔,係印度裔,佢喺美國出世嘅。畀傳媒影到嗰晚,係因為大家都飲醉咗,失晒儀,真係唔好意思。」

雖然Eunis話同S先生仍然喺「正面溝通」階段,但係佢未飲酒已面紅回應新戀情,相信我都好快聽到好消息。「哈哈!多謝!其實我都乾咗好耐。」

哈哈哈!咁真係要祝Eunis蜜運成功!乾!

我繼續以酒會友,祝Eunis(右)事業愛情兩得意、Carrie(左)早日踏上國際天橋!

春風滿面嘅Eunis仲即席自拍,夠晒少女味。

貝殼香味牛油燒($180)糅合日、西風格。

龍蝦原身燒(時價)用上龍蝦膏作汁料,歎盡龍蝦精華。

唔同嘅燒物,配上唔同嘅鹽,更能帶出食材鮮味。
a 夏威夷天然海鹽配烤肉
b 南太平洋鹽配烤肉
c 煙燻鹽適合配肉類
d 西北太平洋鹽配海鮮或烤蔬菜
e 法國海鹽配烤海鮮
f 產於法國西部,法國人手鹽百搭鮮味
g 喜馬拉雅山粉紅鹽有改善睡眠之效


月磯刺身.浜燒日本料理
地址:銅鑼灣駱克道487-489號駱克駅13-15樓
電話:2838 5898