為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2009 年 06 月 30 日

警察也上街 阿爺極憂慮

警方四個工會不滿薪酬架構檢討結果,原本打算本周日操上街示威,估計人數過千,唔係嘢小。政府高層初期取態未算好緊張,話警察都有表達意見嘅自由,似乎有「事到如今,行就行啦」之意,而一哥鄧竟成出國公幹,未見第一時間返港撲火。

到上周四,一哥匆匆打道回港,隨即與警察評議會職方代表開緊急會議,佢拍晒心口話會為班夥計出頭,親自向政府謀求解決方法。一哥出馬果然成功拆彈,四個工會同意暫時取消遊行,睇事件點發展再謀後着。與此同時,出身警察世家嘅煲呔,公開表白曾家兩代當差,自己又在警察宿舍長大,同警察嘅感情好深,實行「動之以情」,此舉亦令班夥計動容,先行收兵。

知情老友話,今次形勢忽然逆轉,同「阿爺」嘅態度有好大關係。原來在警察四個工會決定發動夥計上街遊行後,「阿爺」已十分緊張,亦好憂慮,因為警隊係維持治安嘅最主要力量,如果連警察都行出嚟示威,必然影響社會穩定,最驚係場火愈燒愈猛,不滿情緒不斷高漲,行動再會升級,咁就好大件事。

老友指出,「阿爺」憂心忡忡唔係冇理由,六四廿周年好多市民參加悼念可以理解,但某些言論明示暗示要政權倒台,完全過晒「阿爺」嘅底線;到臨近七.一,反對派又搏晒命挑動市民上街,擺明欲進一步動搖政府威信,趁你病攞你命。咁搞落去,社會會愈嚟愈亂,政府好難管治,加上金融海嘯衝擊仲一波一波嚟緊,真係諗落都驚。就在呢個時候,警察又話要上街示威,影響更大,如果控制唔到,分分鐘亂上加亂。

煲呔說曾家兩代當差,他與警察感情深厚,這番說話動之以情,令警察工會暫時收兵。

問題嚴重 要積極拆彈

「阿爺」見到問題嘅嚴重性,自然發出警號,其實煲呔、一哥同政府高層亦有同感,於是立即調整部署,以更積極方法拆除炸彈,結果在最後關頭奏效。不過警察工會鳴金收兵只是暫時,政府仲要做好多工夫令班夥計happy,至唔會再起波濤。

講真,警察上街遊行的確好唔尋常,記得三十二年前,警察為抗議廉署反貪「趕盡殺絕」,發動大遊行,令當時嘅港英政府面臨空前危機,總督麥理浩召集政府全體高層及兩局首席議員,甚至駐港英軍司令,在港督府開緊急大會,最後決定特赦,危機才得到化解。時至今日,警察又再話上街,當然激烈程度不可比較,但震撼性一樣唔可以低估,所以「阿爺」認為事態嚴重,必須迅速平息風波。

韋奕禮堅持賠足 雷曼和解方案卡住

證監會行政總裁韋奕禮不接受香港中銀賠六成的和解方案,認為應百分百回水。

「阿爺」仲有樣嘢唔多安樂,就係香港金融體系裏面有潛伏矛盾,唔容易解決。

最近香港中銀擬出一個解決雷曼迷債問題嘅方案,同意向有關客戶付回投資額嘅六成(六十五歲以上長者更可收番七成),仲答應如果日後向債權人攞到錢,會畀番客戶,即係話,客戶最後收到嘅錢唔止六成。

呢個方案本來唔錯,舊年投資者買乜都蝕,輸三、四成已經好好彩,唔少人輸突仲欠債纍纍,雷曼苦主如可以攞番起碼六成,算係咁啦。香港中銀咁賠法,要大幅撇帳,銀碼以十億計,可以話十分慷慨,其他銀行未必肯跟隨,如果客戶肯接受,應該皆大歡喜。

但證監會行政總裁韋奕禮睇完份建議,就話唔贊成,堅持香港中銀要百分百賠到足,否則唔收貨。由於過唔到證監會嗰關,呢個方案就卡住咗,可能因此失去解決問題嘅黃金機會,如果係咁,的確好可惜。

在監管機構中,證監會係獨立機構,聽聞政府都好想中銀嘅和解方案能夠落實,令雷曼風波慢慢平息,唔使中環日日有人呼天搶地,造成極大滋擾,損害金融中心形象,奈何證監會阿頭基於某種原因,硬不接受,惟有繼續拖住。

至於班苦主,其實好多人願意和解,只係帶頭嘅代表仲企硬,如果中銀向客戶提出賠六成嘅方案,唔少人會接受,起碼可以開個好頭。但以目前情況看來,要解開呢個死結,仍然遙遙無期。

雷曼苦主行動沒完沒了,繼續僵持落去,對香港金融中心的損害愈來愈大。

網民七一降溫 冇六四咁熱

民主派為催谷七.一遊行,一眾阿哥阿姐早在三個月前就紛紛四出約見各類團體,努力班馬(同志、學生、婦女乜都殺),又下令地區成員吹雞召集基層群眾,希望大小通吃。但線人回報話,近期網上動員嘅氣氛冇六四時咁熾熱,原因係欠缺網民「齊噓」嘅話題(高官冇講錯嘢,又冇突發爭議事件,好難搞得熱),如果呢幾日冇新變數,遊行熱度應低過六四。

另一方面,泛民最近做過一次民意調查,發現滿意政府表現嘅市民多咗,「非常滿意」同「滿意」加埋有31%,而「非常不滿意」及「不滿意」加埋係26%,結果同港大民調相近。泛民班友在內部開會時都承認,政府近期做嘢好咗,冇乜失分,所以唔可以單靠「不滿政府」谷市民上街,要提出爭取民主嘅口號發動民眾。不過,泛民嘅民調發現只有10%市民為爭政改參加遊行,人數唔會好多。