為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2012 年 11 月 27 日

經民聯廣招猛人 唐唐唔埋堆

林健鋒等七名議員帶頭成立經濟民生聯盟,開波開得唔錯,除了岳少會加入,多位工商專業界猛人亦陸續埋堆,包括主要商會阿頭及大企業高層,部分將擔任顧問角色,加埋一批區議員,個陣頗有氣勢。新政團將於下月十八日於會展中心開酒會宣布正式開檔,黨部設於金鐘海富中心,面積千幾呎,月租逾五萬,現正裝修中,好快就可入伙開工。

知情人士透露,經民聯已斟掂一位退休常秘級高官做受薪總幹事,並已請得公關高手加盟,如唐唐助選團的核心工作人員洪曉敬(前報章政治編輯)等,同時會成立政策研究部,請一批全職研究員做智囊,成隊team薪水花費唔少,可見呢個新政團財力充足。

經民聯成為工商幫新勢力,林健鋒等七人核心正廣招猛人加盟,他們部分雖是前「唐營」人馬,但唐唐不想再投入政黨之爭,亦樂於過逍遙生活,故冇加入重返政壇。

林健鋒幾個搞手都被視為「唐營」人馬,外界有人揣測,經民聯可能成為唐唐重返政壇的平台,但知情人士同本刊講,唐唐無意加入,亦唔會擔任榮譽職位,一來他自己不想再高調參與政治,二來經民聯亦不想政團有「唐營」影子,所以雙方都冇傾過加盟的事。

唐唐落選之初,曾想過吓效法陳方安生,做民間政治領袖,帶領另一股勢力,但最後諗通咗,終於放棄重投政治爭鬥的念頭。他近日經常外遊,生活逍遙,玩政治興趣細咗好多,離開政治熱廚房後慣了清涼環境,的確好難再返入去。外傳他可能任政協常委,如果有這個選擇,相信他會樂意做,但要看阿爺如何安排了。

麗新集團老闆林建岳與一批工商組織猛人將加盟經民聯。

唐唐「家臣」林大輝亦冇打算加入經民聯,以他的性格,始終想自己另立山頭,所謂寧為雞口,莫為人後,做大好過做細,所以一直爭取幾個獨立議員組聯盟,由他做阿大。至於田少,當年林健鋒拉隊退黨,恩怨至今未消,況且自由黨已有五席在手,自然唔想同經民聯埋堆。

早排幾個大財團揸弗人——包括長實李澤鉅及置地彭耀佳等,以總商會名義約民建聯傾偈,聽講只係第一步,以後仲會搵其他政黨對話,可見商界對政治呢味嘢比以前積極好多。經民聯大張旗鼓亦與此有關。