為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > Paco巨星飯堂 2009 年 07 月 03 日

黃栢高

黃栢高(Paco),金牌經理人,叱吒樂壇三十年,炮製無數金曲,捧紅不少歌手。近年涉足電影,《行運超人》、《龍咁威》、《殺破狼》等,皆叫好叫座。最新動作,除於本刊主持《Paco巨星飯堂》,每逢周一更在《頭條日報》主持「名人會」專欄,專訪城中名人、紅星。

超辣巨聲

做歌手,靚樣、包裝固然重要,最實際,唔使我講大家都知,一把靚聲先係做得長久嘅秘技。今次我嘅嘉賓曹格(Gary)就正正係靚聲人辦,我聽咗佢嘅歌好耐,唔聽由自可,一聽收唔到科,Gary音域之廣,全亞洲極罕;適逢呢位馬來西亞靚聲王嚟香港為佢八月嘅個唱宣傳,我自然為佢精挑至正嘅香辣川菜,賀Gary喺香港處男開show!

飯局金句:我要72變!

咪睇Gary已為人父,做咗成日嘢嘅佢一到餐廳,見到我為佢點嘅辣辣招牌菜,已經急不及待試食。

度身訂辣

Gary初試港式川菜,我梗係要向佢講解一下,等佢知道我為佢安排呢餐正菜嘅用心。

我知Gary嚟自馬來西亞,所以特別揀咗位於中環半山嘅滿江紅三希樓作為今晚飯局地點。呢度嘅水煮桂花魚又辣又滑,不可不試。而Gary少訪港,今次佢嘅訪港行程,工作排到密麻麻,我梗係要以辣會友,慰勞吓啦!

佢一嚟到知今餐食辣,就算佢已為人父都變到小朋友咁,好開心咁同我講:「Paco哥,你知嘛?我好鍾意食辣㗎,我係南沙巴人,南沙巴有隻原產辣椒,比任何地方嘅辣椒更辣,我媽咪就會樁碎呢啲辣椒,加埋檸檬同其他香料,DIY辣椒醬畀我拎去台灣,嘩!同今晚我冇諗過可以食到辣嘢嘅surprise一樣咁正!」

話畢佢就同我碰杯慶祝,其實我要賀佢開show就真,Gary唔講我都唔知,原來佢一早見過我,喺我夾咗件口水雞畀佢嘅時候,Gary未食就話:「我好驚Paco哥你㗎,唔係,好尊敬先啱,幾年前我喺party見到你,就係一直唔敢主動同你打招呼㗎!」

哈哈!我就話Gary把聲同毅力咪仲值得尊敬,佢有別於香港artist,離鄉別井,喺台灣捱咗幾年以studio為家嘅無根日子,先至苦盡甘來。「我屋企人好反對我玩音樂,就算我爸爸係一個鼓手、一個rocker,佢都唔畀我做歌手,驚我收入唔穩定、冇飯開,但係因緣際會下,涂惠元老師(台灣知名製作人)畀機會我跟佢去台灣,嗰時我得廿歲,試吓都nothing to lose,就去咗台灣,瞓studio、學做音樂。」男兒志在四方,Gary就係成功例子。

熱捧hot show

Gary連夾回鍋肉畀我都不忘佻皮本色,轉頭就show囝囝三豐嘅全裸「肉照」(小圖)畀我鑑賞,夠晒多變化。

除咗水煮桂花魚,三希樓嘅招牌菜仲有四川回鍋肉,啲肉肥瘦適中,辣味突出,Gary食唔停口,邊食邊大讚好味,仲唔係成個小朋友咁?哈哈哈,好彩佢8月21日先至喺機場博覽館開佢嘅《Welcome To My World亞洲巡迴演唱會》,唔係辣到失聲點算?

而Gary深明此道,佢同我講:「我開show前好少食辣嘢,酒亦唔會飲太多,artist把聲就係資產,真係要好好保護。」啱!而且我覺得Gary呢把「巨聲」,正係全亞洲甚至全華人社區嘅少有靚聲之一,唔好好保護點得?

但係今晚有知己有佳餚,唔品嘗埋美酒就真係暴殄天物,我同Gary即刻「cheers」,轉頭佢就拎個手機,原來佢想畀囝囝曹三豐嘅玉照我睇,咪睇Gary成個浪子咁款,佢手機入面全部都係囝囝靚相,真係估佢唔到。

「Paco哥,我諗緊好唔好帶埋囝囝嚟香港開show,因為嗰日(8月21日)就係佢1歲生日,我好想全場嘅觀眾為囝囝唱〈Happy Birthday〉,咁樣對我有更深層嘅意義。」

話咗Gary廿四孝,連為囝囝搞生日party嘅idea都已經諗埋,呢個靚聲王真係唔簡單;加埋佢開show前殺埋入電視圈,同劉美君拍檔主持《超級巨聲》,點夠佢聲勢咁勁?

志在攞獎

酒逢知己千杯少,我同Gary咁好傾,唔cheers點得?

雖然樟茶鴨辣味欠奉,但Gary一見到仍然愛不惜手,真係大唔透。

Gary就一邊為我同自己斟酒,一邊話:「其實《超級巨星》我只係做幾集,主要係demonstrate(示範)吓某啲歌點唱,都係同唱歌有關。」

哈,咁就令我好好奇嘞,Gary舊年已經連台灣樂壇權威頒獎禮「金曲獎」嘅「最佳華語男歌手」都拎埋,又殺入香港電視圈,我真係好想知道佢仲有咩目標。「我嘅目標?唔……我好想攞『金馬獎』或者『金像獎』!」哈哈哈,我依家主攻電影,Gary就話要投身影壇,唔係咁啱key呀?「係咩,Paco哥,其實冇乜人知我好obsess of(着迷)電影,雖然我只係同阿牛、梁靜茹、品冠等大馬artist拍過一部電影,但係唔代表我唔鍾意。你諗吓,喺真實世界,我只係曹格,但係如果拍電影,我就可以擁有唔同嘅lives,連成長背景、生活都完全唔同,好interesting。」

好!每個人都可以擁有夢想,Gary唱而優則演,一啲都唔出奇。我熟識嘅Gary係唱得之人,有朋友話我知佢可以用男女key唱〈My Way〉,神乎其技。Gary聽到我讚佢,反而只係輕描淡寫話:「我最想係令我把聲可以好似孫悟空咁,可以72變。」哈哈哈,Gary,你係得嘅!

滿江紅三希樓

地址:中環花園道51號科達中心7樓
電話:2838 8811