昔日阿媽幫仔揾老婆，一定係會揀身材肥嘟嘟、耳珠和鼻又圓又多肉的女子，事關擁有這類由頭到腳都珠圓玉潤的女子，均屬旺夫益子相，年頭娶佢返屋企，年尾必定生個仔，家肥屋潤，老公唔開心至奇！

不過時移世易，依家男士們就唔係太鍾意肥妹仔，生得比較珠圓玉潤的女子分分鐘要做剩女。不過無論你鍾意肥又好、瘦又好，都切忌揀啲有剋夫相的女人，因為剋夫女除了不能提升丈夫的運程之外，她命中注定都不能享夫福，故分分鐘搞到老公行好運變行惡運呀！

「剋夫」 唔等於剋死老公

好多人都以為剋夫的意思是令到丈夫早死或久病卧牀，但其實這說法太過誇張了，於玄學上剋夫是指妻子不能幫助丈夫提升運程，令丈夫的運程平平或者比較差；剋夫還指妻子脾氣唔好、人品差，同丈夫相處不來，搞到家嘈屋閉。以下是三大剋夫面相的特徵：

朝天鼻

在三種剋夫面相特徵中，最容易睇和最嚴重的可算是女人生得一個朝天鼻，因為鼻是代表夫星，除了女人命中注定不能享夫福之外，更會影響丈夫的運程，如丈夫明明好運當至，都會變成惡運連連，所以奉勸各位男士，如果唔想自己一世行衰運，就真係要謹記此面相特徵。

顴骨粗凸

面相中顴代表權力，顴骨粗凸的女子就表示她鍾意和老公爭權力，不論是小事如行街睇戲去邊度、個仔喺邊間讀書好；大至買車買舖頭，她都要話事。她愛權力多過愛老公，故同這類女仔一起生活，男士們只能事事遷就，如果唔係就肯定嗌交多過食飯，激死多過病死。

鼻子如剃刀

鼻子如剃刀是指鼻樑尖削、鼻頭無肉，擁有這面相的女子除了為人勢利、心狠毒辣、感情冷淡、尖酸刻薄之外，加上鼻頭無肉心中有毒，她們為了錢或私利，分分鐘殺老公都做得出呀！雖然好醜命生成，但所謂「有心無相，相由心生。有相無心，相由心滅。」唔想做剋星，都有化解方法，就係由心而起，多注意自己脾氣，避免小事化大。心變則相變，心靚，人都會靚啲！