為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 娛樂放題  > 留星語 2012 年 11 月 07 日

十年功 江美儀

江美儀甫到來訪問取景的酒吧,即嚷着肚子餓,二話不說便拿起餐牌,替在場各人點吃的喝的,連隨向攝影師查詢要怎樣拍照後,便坐下來跟我開始做訪問。我看看手表,前後才不過五分鐘時間,可見她確是個爽快直接的人。所以,對於很多網民以「重口味」來形容她在《名媛望族》中,那場「黑絲襪情挑劉松仁」的戲,她很難沒有反應。「我覺得唔好當嗰兩個人係江美儀同劉松仁先啦,其實只係鍾卓萬同三太啫,呢啲只係一對夫婦嘅閨房情趣。啲人話『重口味』,都係因為佢哋覺得咁嘅年紀嘅人,唔好搞埋啲咁嘅嘢,但我覺得unfair囉!係咪過咗廿五歲就唔做得呢啲嘢先?係咪一定要年輕人先做得呢?咁年輕人都唔使做呢啲嘢,一嚟就砌o架啦,係咪先?情趣嘅嘢係冇年齡限制o架嘛!」那場戲是否真的「重口味」,見仁見智,但因此令她人氣急升,卻是不爭的事實。「都係o架!以前可能你除到得番條襪帶,都冇人會記得你做過呢場戲;但依家,只係需要咁樣,全世界已經知道晒!「不過如果冇以前嘅經歷,就唔會有依家嘅我!」她說的「以前」,就是那十年在亞視的日子。

十條片

一場「黑絲襪情挑劉松仁」的戲,大大加強了網民和觀眾對江美儀的注意,當事人有這樣的分析:「一來,喺電視尺度嚟講,個意識係大膽嘅;二來,因為有絲襪帶,又魚網絲襪,我件衫嘅outfit又好靚;三來,江美儀從未試過咁樣見人;松哥呢,喂,佢不嬲都係嗰啲乜嘢『中原一點紅』、『陸小鳳』嚟o架嘛,我哋大家都畀咗『第一次』對方,啲人睇到咪都『嘩!』咁囉!」

被網民形容為「重口味」,她是有點不是味兒的。「咁樣形容,我覺得係抹煞咗成個劇組嘅努力同心血囉!

「好坦白講,我冇波又冇籮,視覺上,我已經輸蝕咗!咁我可以點樣令呢場戲好睇呢?咪惟有去鑽研形態同神情囉!

「松哥拍之前收到個分場後,就畀咗十條YouTube短片我睇,仲同我講:『,第三條片啲眼神,你可以去學;第六條片啲衫,你可以去參考;第七條片啲舞姿呢,你可以多啲留意。』監製仲特登搵咗個跳舞老師教我跳呢隻舞,本來我可以學多啲、跳得好啲,但最衰我嗰段時間扭傷咗隻腳,根本痛到行唔到,我都係夾硬去跳o架咋!所以我覺得其實呢場戲可以再好啲、再靚啲o架!」

九十年代當model時,曾當過劉德華卡拉OK MV的女主角。

天生嘅

江美儀生於一個小康之家,父母都在銀行從事文職工作,居住私家樓長大,對下還有一個妹妹。她小時候已有三個志願,就是做秘書、選港姐和做空姐。

「我由細蚊仔開始,已經好鍾意投入角色。例如我細個會幻想自己係個公主,睇書嘅時候,我會扮個公主樣出嚟;行大丸嗰條樓梯時,我又會諗:如果我係一個公主,應該要點行呢條樓梯呢?鍾意演戲,真係天生o架!」

結果,她在珠海書院讀了工商管理,投身社會後由接待員慢慢升職到做秘書,沒想到,因為一次為老闆買午餐,卻被星探發掘,令她當上了model。

「我嗰陣最初都驚畀人呃o架,所以我就畀咗我以前男朋友個電話佢,點知佢就係咁call咗我半年,我就諗:你呃我嘅話,冇理由呃我半年呀?喂,我有乜嘢畀你呃啫?咁都搵足我半年?諗諗吓可能係堅o架喎,咪去試吓鏡囉!」

就這樣,她開始了拍廣告的生涯。「我第一個廣告就係『蝶安護』衞生巾,一個女仔對住鏡頭乜都冇,係咁講十五秒、三十秒嘢。跟住喺電視度,真係不停咁見到我,噏得出嗰啲大牌子我都拍過晒,『麥當勞』我拍過兩次,『美極』又拍過,衞生巾廣告都拍過兩、三次,仲有『太太口服液』都拍過兩、三次。」

當時與她同期的,還有歐陽妙芝、周汶錡和楊崢,「你諗吓嗰期出幾多靚女?嗰陣做model好嚴o架!唔夠高,就只可以拍still(硬照)、拍電視,冇得行天橋,我就係因為唔夠高,所以冇得行。」

天橋沒機會行,但選美,卻還是有想過的。「我真係有諗過o架,不過我爸爸唔鍾意,佢覺得如果我拍廣告着泳衣,係為咗個product;但我選美去着泳衣,就係為咗我自己,佢覺得我唔需要着泳衣去sell自己。」

麥當勞是她拍得次數較多的其中一個廣告商。

那十年

九七年,亞視開拍《肥貓正傳》,劇組主動找她當女主角。「我入去嗰陣,《肥貓》都有廿幾點o架!本來我諗住玩o架咋,但出嚟嘅效果又幾好喎,咪再拍吓囉,咁我又好enjoy拍戲喎,咁咪玩吓玩吓,就係咁拍落去。」

曾道聽途說,江美儀在亞視時期,是個很有脾氣的阿姐。「我嗰陣係比較寸,真係年少又氣盛。有段時間,我仲有埋抑鬱!唉,女人為乜嘢呀?唔係為男人就係為錢,嗰陣我錢就冇問題,但就失戀,個人好唔開心,成日搵啲工作人員嚟出氣,搞到個個都覺得我神憎鬼厭!」

隨着亞視的收視每況愈下,她亦曾有過離開的念頭。「不過嗰陣人工真係幾好喎!幾皮嘢一個月,又冇嘢做,仲想點呢?人工可以話係我唔走嘅一個原因。不過後尾都開始cut人工,又冇嘢做,我就覺得大鑊。到○七年,我滿約,一個月前乜嘢條件都傾好晒,我都打算續約。點知,星期五滿約,星期三竟然打嚟話要由頭再傾過!咁即係想點呢?我把鬼火打畀我男朋友同佢講,佢話:『如果你依家唔續約,你會嬲;但如果你續咗約,你會仲嬲!咁唔好簽啦!』就係咁,我就冇簽到約,走咗。

「啲人成日問我,覺唔覺得喺亞視嗰啲日子浪費時間,我覺得,我嗰陣其實一秒都無嘥過!你諗吓,嗰陣乜都要自己搞掂晒,冇嗰十年,邊度train到我依家周身刀?冇嗰十年,我依家點會識同做嘢嘅人好好相處呀?如果以我嗰陣嘅性格入無綫,我一早都可能已經淘汰咗啦!」

九七年被邀加入亞視當《肥貓正傳》的女主角,更因此成了鄭則士好朋友。

一個騷

她說,那時離開了亞視後,感覺猶如「被遺棄的一群」。「我當時真係好想搵番份工,做番秘書,我男朋友話:『你咪癲啦!你做開戲,點可能無端端搵番份工o架?』咁我就走咗去學油畫。好彩後來都仲有個電台節目《風騷快活人》救一救我,叫做有啲嘢做吓,有啲生存價值——呢樣嘢仲緊要過搵錢呀!」

○九年,機緣巧合下,江美儀加入了無綫。「當時張約都幾辣o架!兩年一個騷!咁你簽定唔簽呀?我簽呀!其實我預咗呢間公司唔會畀我好多錢,但我又想做嘢,又返唔到亞視,唯一嘅出路就係:理得你開乜嘢條件,我入咗嚟先算!」

諷刺的是,她加入TVB後,便一直劇接劇地拍,沒有停過,卒之第一年,她做了足足九十多個騷,第二年也有八十多個!「你唔好畀我入嚟,你畀得我入嚟,我知我會OKo架!因為我人工好平,平到嚇死你,平到你唔信!我又知自己唔會失禮人、交到貨,咁人哋就自然會搵你o架啦!」而更主要的關鍵則是:「我襟撈爛做冇投訴!」

呢啲咪係專業囉!

加入無綫的首齣劇集,就是與伍衛國(右)和梁烈唯合演的《五味人生》。

《潛行狙擊》中的「嵐姐」,是江美儀暫時較滿意的演出。

七年情

現任男友是吳君如的胞弟吳君祥(Vincent)。「我同Vincent個細佬(即吳君如細細佬)同一間小學,當時我都知道佢係夏春秋個仔,不過離開咗小學之後,我哋就冇見過面。之後喺一個function度識到Vincent,我就同佢講:『我小學時暗戀過你細佬o架!』點知佢話:『太遲啦!佢已經結咗婚喇!』後來我哋開始send sms,跟住就開始拍拖。」至今兩人已拍拖七年,早已在同居階段,男的雖比她大四年,但彼此卻仍會以「BB」來相稱。「我哋兩個好好笑o架,真係急驚風遇着慢郎中!佢個人好糯,我就急到死!永遠係我等佢出門口,佢就mememomo,淨係撥條頭髮都撥成半個鐘,都係為咗嗰條毛,都唔知撥乜!哈哈哈!「不過好奇怪,每次我驚恐症發作,喊到就嚟暈嘅時候,佢都咁啱會喺我身邊,好似係個天安排佢嚟處理我呢個問題咁!佢個人真係好冷靜,好多時都可以令我calm down!」沒有結婚的打算,只因覺得沒必要。「大家日日都好似拍緊拖咁,仲有驚驚哋,咁唔係仲刺激啲咩?我意思仲驚緊嗰個係佢,唔係我呀,我仲有好鬼多marketo架!依家出埋呢個『黑絲襪』呀,佢喺屋企騰緊啦!哈哈哈!」OK,那話說回來,阿BB又點睇這場「黑絲襪」戲呢吓?「吓?佢淨係話我好似麻甩佬操兵咁,叫我都專注做番內心戲喎!」說罷,她反晒白眼,我卻在旁笑到肚攣。

江美儀最近與男友吳君祥成立了黃金時代娛樂公司,旗下藝人有龍小菌(前右一)。