為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > Paco巨星飯堂 2012 年 10 月 24 日

黃栢高

黃栢高(Paco),金牌經理人,叱吒樂壇三十年,炮製無數金曲,捧紅不少歌手。近年涉足電影,《行運超人》、《龍咁威》、《殺破狼》等,皆叫好叫座。最新動作,除於本刊主持《Paco巨星飯堂》,每逢周一更在《頭條日報》主持「名人會」專欄,專訪城中名人、紅星。

演技派較量

今晚「Paco巨星飯堂」嘅嘉賓,集實力與星味於一身:影帝黃秋生加上佢嘅演藝學院師弟梁祖堯,已經係演技嘅象徵。秋生同阿祖即將喺舞台劇《極地情聖》中較量,兩位演技派合作,定必擦出火花。

因為舞台劇以挪威為故事背景,所以我特別揀選咗位於尖沙咀嘅北歐餐廳「FINDS」,令一眾嘉賓由外而內都感受到北歐風味,為呢部預計係戲味濃郁嘅舞台劇,做足準備。

今晚《極地情聖》兩位主角秋生(左)同阿祖(右)擔任飯堂嘉賓,我哋先以極度北歐風情嘅vodka揭開序幕!

「FINDS」以冷凍過嘅火山石杯盛酒,唔用冰都可以保持低溫,有特色。

籌備一年半

《極地情聖》請得郁影帝秋生闊別舞台8年「復出」,誠意之外,全靠劇本,「導演喺一年半前已經搵我,我睇過劇本,嘩!真係唔錯,而且有年半畀我度期,點都做到啦!

「做舞台劇同拍電影、電視劇唔同,拍戲你就對住個cam做戲啫,舞台劇就要對住全部觀眾做,我都好enjoyo架,今次啲對白好多,我都真係驚記唔晒!」

阿祖即為師兄補充:「師兄你點會記唔晒吖?不過師兄嘅對白真係好多,同我嘅相比,大概係1比4啦!今次呢個舞台劇,係改篇自一個好出名嘅劇作家Eric Emmanuel Schmitt嘅作品《Enigma Variations》,我喺劇中飾演一個記者。」

秋生:「我就係諾貝爾文學獎得主莫言(阿祖:「白先生呀!」),咁呢個白先生就一直同佢嘅女神,以書信傳情,足足15年都未見過面。」

阿祖:「而我飾演嘅記者,就不停咁質疑白先生呢個愛情觀,故事嘅轉折位我暫時賣個關子,但去到某個位,白先生會發現,一直同佢有情書往來嘅係我,個記者亦都係嗰個女人嘅老公。」

秋生即接上話:「呢個先係故事嘅開始,今次我哋以一個real time形式演出,連景都唔換,就係一個白先生屋企嘅景,所以我都幾大壓力o架。」

秋生同阿祖剛開始排戲已展現默契,一句接一句就描述晒《極地》嘅故事,呢個組合足以令人期待啦!

煙燻鰻魚批配芥末籽橄欖油、醃鵪鶉蛋、甘筍、洋葱及水瓜柳($148),極為開胃。

三文魚驚喜六重奏($178),包括冷燻、輕煎、慕絲、醃製、紅菜頭漬及金三文魚籽。每日都有新鮮三文魚由挪威運到,原汁原味。

鴨肉清湯配鵝肝醬多士、鴨肉丸、根菜粒及醃鵪鶉蛋($98),鴨屬北歐人愛用嘅食材,清湯味鮮。

秋生拿手菜

秋生拿手菜

論戲以外,早前秋生接受訪問嘅時候,不經意透露咗佢會為家人下廚,今晚佢就同我講咗最有滿足感嘅一次,「哈!犀利嘞!嗰次我煮咗孖腸(臘腸、膶腸)冬菇雞煲仔飯,要搞一輪先可以煮,嗱,孖腸要飛水晾乾再切,冬菇又要燉大半個鐘,明火煲咗20分鐘又要放入焗爐焗8分鐘,拎出嚟仲要畀煲飯唞番10分鐘,先可以揭蓋。

「一打開個煲蓋,嘩!我話畀你知,嗰晚成間屋都仲係飯香!我煮完,喺廚房食煙,我阿媽入嚟問工人邊個煮嘅?仲有冇?哈!工人指一指我話:『你個仔煮o架。』

「呢個煮法我都係睇書學嘅,咁有實戰就最好啦!」

哈哈哈!喺粗獷嘅外表之下,其實秋生既細心又有文學修養,我為「Paco巨星飯堂」嘅捧場客,問咗博覽群書嘅秋生,近期一啲推介,「有一本叫《天性與教養》,內容講DNA對人類行為嘅影響,好多人以為DNA係先天嘅,但睇咗呢本書我先知人愈大,DNA對一個人嘅影響原來係愈大。

「仲有一本係《超譯尼采》,譯得好,同埋啲quote好易明。另外,我最近睇咗一個加拿大作家Michael Ondaatje嘅作品,都唔錯。」

因為《最佳男主角》,秋生喺微博再同小豬羅志祥嘅fans交鋒,佢話自己並無動氣,只係對有人爭住認「犀」,嘖嘖稱奇。

講起推介嘅好書,秋生七情上面。

秋生經過一番思考,終於推介《天性與教養》(上圖)同《超譯尼采》(下圖)兩本佢近期閱讀過嘅好書。

牛肝菌釀黃麂柳配燴薏米、包心菜、煙肉、鮮杏仁及黑加侖子汁(a),肉嫩而不羶,整體配合一流。

祖堯遇意外

祖堯遇意外

相比秋生,阿祖更多下廚嘅時候,但係飯敍前一星期,阿祖就喺屋企發生意外,「嗰日我煮咗一個南瓜燜牛腩,啲汁好濃嗰隻,我一攞起個煲諗住拎出廳嘅時候,突然『啪』一聲,個煲底跌咗落地,啲汁就淥落我左邊大髀位,依家仲有深啡色嘅印。

「意外發生之後,我去咗樓下嘅醫務所,醫生話我唔使去醫院,但傷口已經係二級燒傷。」

雖然阿祖遇上意外,但係佢對烹飪仍然熱切,仲提供一個極美味蒜油炒即食麵嘅方法,「首先準備一個蒜頭,一半用嚟切片,另一半就切成蒜蓉。淥開一個即食麵後,以油開隻鑊,先爆咗啲蒜片,變成金黃色後,撈起;再落蒜蓉,『咋』一聲之後,落埋個麵炒。

「炒起上碟後,就放埋之前嘅蒜片喺面,真係好正!」

秋生都忍唔住插嘴:「嘩!試得過喎!」

阿祖係廚藝高手,但意外難以預計,佢話以後都會小心啲。

飯敍期間,秋生仍心繫劇本,即時要進行背台詞表演。

伯爵茶馬天尼分子雞尾酒($90),係主菜同甜品間令味蕾重獲清新感覺嘅「用具」。

甜品只係沙棘莓蘋果雪葩配焦糖蘋果及焦糖汁($98)。

「FINDS」大廚Jaakko(左二)係餐廳創辦人之一,今晚由佢精心為我哋炮製特色菜式。

FINDS

地址:尖沙咀金巴利道39號帝樂文娜公館1樓
電話:2522 9318