為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > Paco巨星飯堂 2009 年 06 月 29 日

黃栢高

黃栢高(Paco),金牌經理人,叱吒樂壇三十年,炮製無數金曲,捧紅不少歌手。近年涉足電影,《行運超人》、《龍咁威》、《殺破狼》等,皆叫好叫座。最新動作,除於本刊主持《Paco巨星飯堂》,每逢周一更在《頭條日報》主持「名人會」專欄,專訪城中名人、紅星。

矮仔多情

凡事都有兩面,金融海嘯雖然沖走繁盛嘅經濟,但從另一方面去睇,亦都有唔少人憑住呢個機遇,衍出生機。相隔四年無拍新戲嘅阮世生導演(James),將會喺6月25號上映新戲《矮仔多情》,佢就係從金融海嘯反思人與人之間嘅關係,拍咗一部好貼近現實嘅電影。身為佢嘅朋友,我梗係要搵佢嚟介紹吓套新戲啦。我仲搵埋好欣賞阮導演嘅森美嚟做客席主持,一齊交流吓拍電影心得。

5

編而優則導嘅阮世生導演拍過唔少經典電影,佢話:「返大陸拍戲係大趨勢,但係我仍然好珍惜拍香港片。」《矮仔多情》係佢最新一部貼近香港「民情」嘅電影,森美聽完阮導演講故事大綱都話希望可以快啲睇到。

飯局金句:高處唔貪心,低處唔灰心,最緊要開心。

韋小寶奇遇記

由編劇出身嘅James,無論係編劇定係導演,佢都創作咗好多經典電影,例如:《天若有情》、《金枝玉葉》、《忘不了》、《神經俠侶》等等,James擅長用寫實嘅手法,描寫人與人之間嘅感情世界,令觀眾反思生活。今次呢套《矮仔多情》,James就係想探討一吓人無咗錢,仲剩番啲咩?「其實呢套戲並唔係愛情片,而係一套奇情片,整個故事就好似『韋小寶奇遇記』咁,講一個失意嘅人,無咗錢就想尋找真愛,於是喺身邊出現咗幾個特別嘅女仔,令佢明白到錢唔係快樂嘅來源,只有對人真正付出,先可以得到快樂。」James安排咗祖藍周旋喺Angelababy、黃婉伶(Race)、徐子珊同埋賈曉晨(JJ)呢四個性格迥異嘅女仔之間,發展出四個獨立又特別嘅故事。

「祖藍之前喺《頭條日報》我個訪問入面話,佢拍得好開心,仲話衷心感激你畀呢個機會佢可以同四個靚女做對手戲添,哈哈哈!」James同我碰碰杯說:「今次我都拍得好開心,一來事先已經準備得好好,唔使三個月就拍完,二來拍佢哋其實都幾開心,尤其是幾個女主角,因為今次呢套戲佢哋都試到新嘢,好似子珊揸電單車,佢好開心㗎,因為佢可以型番次嘛,哈哈。Race跳艷舞相信大家都係第一次見。」James仲話,講到尾,佢只係想喺呢個唔係咁開心嘅時勢,拍一部開心戲畀大家輕鬆吓。

一切源於鬥心


我同James嘅相識,源於當年我搵佢幫Kelly嗰首〈誰願放手〉填詞,估唔到依家成為電影同行。


祖藍喺拍攝期間經常要兩邊走,忙到覺都無得瞓,James話:「新人根本就唔應該得閒!就算你無嘢做,都應該不斷自我增值!」我諗呢個意見,各位後生仔要記住喇。


森美做演員嘅時候,曾經覺得好迷茫,因為唔識點同導演溝通。但之後佢就學識放鬆,仲好enjoy演戲,「我唔會理自己做成點,因為每次都當吸收經驗。」

今晚嚟到呢間聘珍樓都畀我一種輕鬆嘅感覺,因為呢度樓底夠高、佔地兩萬呎夠晒寬敞,雖然開喺人多車多嘅觀塘,但係入到嚟就好似去咗另一個世界一樣。我挾一件燒焗黃土雞畀James,說:「聘珍樓雖然嚟自日本,但係中菜都做得好出色㗎,師傅會將中西餐煮法融合,不斷創新。」好似呢味黃土雞,師傅就係以西式整火雞嘅製法嚟做,雞身塞滿香草、蘿蔔、洋葱,然後將隻雞焗熟。連森美都話:「多謝你今晚搵我做客席主持,等我有好嘢食,哈哈哈。」

James不嬲都鍾意搵啲有潛質嘅演員,祖藍就係其中之一。其實之前我都搵過祖藍客串《獨家試愛》,佢嘅演出好搶鏡。「我都有睇呀,我留意到好多觀眾會為佢而笑,當時我就已經想搵佢拍戲。」森美曾經同祖藍喺《我的最愛》合作,佢話:「佢做戲真係好揮灑自如,舞台底子好好㗎。」James話要拍祖藍其實都唔容易,「度期比較難,因為佢同時要喺TVB拍劇,日頭拍完劇就趕嚟拍戲,佢差唔多係無得瞓。」雖然祖藍好忙,但完全無損佢嘅表現,因為一切源於鬥心,「有一場戲我哋拍到凌晨四點,大家都好眼瞓,但祖藍仲好精神,最後一take過搞掂,之後佢仲返TVB繼續拍劇添。如果佢無鬥心,一早喺呢個圈死咗喇!哈哈!」James跟我乾了一杯。

表裏不一


James話香港嘅演員實在太忙,「啲演員會趁拍攝空檔可能走咗去做唔同嘅show。」森美笑說:「無法啦,我呢排都係朝早做節目,夜晚去TVB主持節目。」


聘珍樓老闆Billy為我準備咗一間寬敞又有落地玻璃窗嘅貴賓房畀我,呢度無論環境定係食物都好有水準,值得大家嚟幫襯。


James鍾意喺開戲之前,先同目標演員傾吓偈、了解吓對方,然後再為演員度身訂做角色,佢認為咁樣先可以畀演員發揮「自己」。

今次呢套《矮仔多情》,有鬥心嘅又點止祖藍一個呢?另外四位女主角嘅表現,同樣令James刮目相看。戲入面扮演性格分裂少女嘅Race,James就要佢向高難度挑戰,「Race要喺個半月之內學識跳艷舞,喺拍之前兩三日,我睇過一次,嘩,跳得極好呀!」其實呢個角色絕對唔容易演,「係啊,上次我拍《保持愛你》飾演孖生兄弟,我諗住用個誇張手法嚟演『阿哥』嘅角色,點知睇mon時先發現『唔覺嘅?』,所以呢,一人分飾兩角真係好難㗎。」森美說。

除咗Race,原來子珊同JJ都同樣「表裏不一」。「第一次見子珊畀我嘅感覺係『嘩,差咁遠?』,因為《跟蹤》入面嘅佢係做一個好平凡嘅女仔,點知真人靚好多!哈哈!」佢話子珊其實係一個好願意接受挑戰嘅女仔,所以要佢做刀疤女絕對無問題。

而JJ原來係一個好單純嘅女仔,「第一次同佢傾偈,我真係估唔到佢係咁純品,你知啦,平時佢畀人嘅感覺都係比較性感吖嘛。」所以James就特別設計咗一個濟世為懷嘅按摩女郎角色畀JJ,等觀眾有啲幻想。至於Angelababy就係飾演天使,「我覺得每個男人喺失意時都需要一個天使喺身邊,因為Angelababy未演過戲,而天使又畀人innocent嘅感覺,所以佢係適合人選。」

「高處唔貪心,低處唔灰心,最緊要開心。」係James對《矮仔多情》嘅總結,哈哈,我亦利用呢句金句嚟鼓勵大家!

聘珍樓
地址:觀塘道392號創紀之城6期6樓
電話:2954 8000