為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2012 年 10 月 05 日

工商幫重新埋班

立法會就快開鑼,各路人馬都在幕後重整勢力,近日為此頻頻密斟,希望增加人頭,擴大聲勢。線人回報,「經濟動力」原來只有三席,但阿頭林健鋒、梁君彥同發叔,四出向工商專業界議員游說,希望招攬為戰略夥伴,結果拉到梁美芬、石禮謙、張華峰同盧偉國入夥,組成新嘅工商專業聯盟,議席由三個變七個,影響力大增。

線人指,呢個聯盟可能改一個新名,召集人將會由梁君彥擔任,佢亦做埋經濟動力主席,林健鋒就專心做行政會議成員。梁老兄喺工商界有江湖地位,當年「4L」離開自由黨,另起山頭,佢同林健鋒一齊開山劈石,由佢接手揸大旗,大家都會服。另外,佢好大可能被推選為立法會內務委員會主席,在議會舉足輕重,做新聯盟召集人更加有份量。

呢個新組合除咗工商界,又有專業界(梁美芬、盧偉國)同金融界(張華峰),都幾齊全,聽講仲會再擴張,招攬更多議員埋堆。

自稱代表工商界嘅田少,又會唔會加入?線人話,田少從來要做大佬,而且同林健鋒等有恩怨,早就講明唔同佢哋一齊玩,所以新聯盟冇佢份,兩幫人日後將同枱食飯,各自修行。

至於唐唐「家臣」林大輝,雖然係廠商聯合會代表,屬工商界,但唔會加入呢個新組合,線人話佢老哥想自立山頭,正拉攏個別獨立議員合作,不過因缺結盟基礎,好難成事。

振英哥近期勢弱,立法會內「民粹」議員又大增,勞福政策可能向「左」轉,工商界愈嚟愈擔心,今次結盟希望可抗衡呢股「左」風!

林健鋒同梁君彥等拉到四個議員埋堆,議席增至七個,形成工商幫新力量,影響力大增,其中包括直選入局嘅梁美芬(小圖)。