為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > Paco巨星飯堂 2012 年 08 月 11 日

黃栢高

黃栢高(Paco),金牌經理人,叱吒樂壇三十年,炮製無數金曲,捧紅不少歌手。近年涉足電影,《行運超人》、《龍咁威》、《殺破狼》等,皆叫好叫座。最新動作,除於本刊主持《Paco巨星飯堂》,每逢周一更在《頭條日報》主持「名人會」專欄,專訪城中名人、紅星。

人人夜蒲

數港產電影系列,《喜愛夜蒲》必佔一席,電影嘅第二集今個月尾先上映,已經帶動全城話題。我一向都關心電影業,自然搶先相約《夜蒲2》導演錢國偉(Wilson),由佢率領眾《夜蒲2》成員,關楚耀(Kelvin)、連詩雅(Shiga)、陳偉成(Avis)、陳靜儀(Mia)、沈震軒(Sammy)、劉羽琦、何浩文(Dominic)同方珈悠,細說《夜蒲2》。

我特別揀選坐擁無敵海景的「阿一海景飯店」,歎住維港夜景講夜蒲,啱晒!

今晚人才濟濟,全因《夜蒲2》,我同Avis、Sammy、Kelvin、Dominic(後排左至右)、Mia、羽琦、Wilson、Shiga以及方珈悠(前排左至右),齊齊去「阿一海景飯店」,品嘗靚景美食。

Sammy(右)係我欣賞嘅新人之一。

Wilson特地帶一支藍色香檳畀女士們,非常細心。

反映現實

今晚《夜蒲2》接近晒冷同我飯敍,精英傾巢而出,我梗係要先請導演Wilson解說1同2嘅分別啦!「今次係全新嘅故事,而且除咗Shiga之外,基本上用埋全新嘅卡士。夜蒲貼近現實,上次冇咁多角色嘅感情描寫,所以今次喺故事上係完整啲嘅。

「好似每個角色都有社會唔同階層嘅人,Shiga同Kelvin就飾演有錢女同攝影師,Sammy同劉羽琦都係玩one-night-stand嘅高手,Dominic同松岡李那飾演警察同DJ,Mia同Avis就一個做私鐘妹一個係白領階級,總之每一段感情都有少少衝突位,感覺會豐富啲。」

豉蒜爽肚尖($180)每日限定,要一嘗美食就要預訂。

哈哈哈!上一集Wilson成功喺香港創出800幾萬票房佳績,今次再下一城真係話咁易。今次我就特別睇好有型格嘅Sammy,以佢嘅外形,要令人留下印象一樣係咁easy,「今次係我第一次喺電影入面有咁重嘅戲份,導演幫我哋入戲都落咗好多工夫,佢會同我哋傾,你知《夜蒲》系列都比較多親熱戲,我同羽琦事前都會同導演傾好晒,再relax吓先埋位。

「拍嘅時候都幾緊張o架,但係都會盡量投入做番傾咗嘅情節,係一次好好嘅經驗。」

36頭禾麻鮑拼波蘭鵝掌($600/位),物有所值。

牀戲以外

至於Sammy嘅對手劉羽琦,同樣多謝Wilson幫手,而Wilson就話:「好多親密戲都可以一take過,不過電影同電視唔同,喺情節同present手法上,我自己都係學緊嘢,roll機前我都盡量同班cast傾多啲,等佢哋唔好咁緊張就OK。」

另一邊廂嘅Kelvin同Shiga,一樣有火辣辣嘅親熱場面,Shiga話:「我同Kelvin識咗好耐,佢妹妹係我同學,所以拍咁close嘅戲嗰陣,我哋都驚會忍唔到笑,但係好彩大家都好快代入到角色,到導演叫cut嘅時候先笑,哈哈!」

Shiga(左)同Kelvin(右)識於小時候,所以拍攝火辣鏡頭,有一定難度。

Avis(左)同Mia(右)嘅貼身演出,逼真到傳出Avis女友周秀娜都呷醋。

講到親密戲份,Wilson坦言因為相信周秀娜嘅眼光而請Avis投身影壇,佢同Mia嘅牀上戲份,原來背後付出好大。

Avis話:「導演喺現場播晒啲好relax嘅歌,再開一支白酒畀我哋紓緩一下情緒。我睇戲以為親密戲拍得好簡單,以為好似同女朋友咁就OK,點知原來仲有好多嘢要兼顧,又要令畫面有美感,所以拍完都真係好攰。」

Avis、Wilson、Mia同羽琦(左至右)異口同聲話今次合作愉快,two thumbs up!

家鄉豬肉卷(前,$65)同五香素鵝(後,$65)香口味美,係佐酒必然之選。

紅酒醬燜牛尾配生麵($65),名副其實係汁都撈埋。

要喺中午時份欣賞美景,可點「阿一」精選午宴菜譜(每位$268),包括以上菜式,詳情可向餐廳查詢。

蒲出香港

除咗親熱鏡頭之外,《夜蒲2》嘅「清泉」就落喺糖妹男友Dominic身上,「我同松岡李那最親密嘅場面都只係kiss一下,接呢部戲嘅時候,女朋友都有問係咪有kiss或者其他嘅親熱場面,我梗係話畀佢知冇啦!」

哈哈哈!其實親熱戲份只係夜蒲文化嘅點綴,監製伍健雄同Wilson都話,「夜蒲」唔止香港一地,「要以系列形式咁延續《夜蒲》,上海、北京、台灣都係我哋構思中嘅地點。」

好!咁我就預祝《夜蒲》蒲出好票房!蒲出香港!乾!

我同一眾《夜蒲2》成員,跟「阿一」行政總廚梁兆明師傅(後排左)及總經理譚光明(後排右)合照留念,多謝佢哋為今次飯敍設計菜譜。

有埋監製伍健雄(後排中)坐鎮,我先祝《夜蒲2》大收!

XO醬啫啫玉蘭煲($108)夠惹味。

脆皮龍崗雞($200/半隻)有特色!

招牌砂鍋炒飯($260)飯粒分明,以砂鍋炒飯更有嚼勁!


阿一海景飯店
地址:尖沙咀彌敦道63號iSquare國際廣場29樓
電話:2328 0983