振英哥另組 民間心戰室
CY班底一上場就亂晒龍，多少或與佢個心戰室未成形有關，近排有江湖傳聞，話振英哥搞咗個民間心戰室，喺政府以外幫佢打輿論公關戰。呢個消息的確有迹可尋，曾任梁振英競選辦公關嘅洪綺敏，冇跟佢入特首辦，聽講去咗鄭家純揸弗嘅新世界集團做公關，而競選辦嘅傳媒軍師麥國華早已先佢一步被聘幫純官手做公共事務顧問。
大家都知，純官已成為振英哥最忠實嘅商界支持者，佢手下要員紀文鳳更由始至終力助振英哥打選戰，所以佢屬下公關人員為新特首做吓嘢，一啲都唔奇。此外，任職國際公關公司高層嘅前資深傳媒人黃麗君（Fanny），選戰時都係振英哥嘅主要公關參謀之一，呢位阿姐繼續喺某方面為振英哥出謀獻策，幫手打吓輿論戰，都好順理成章。
振英哥上任至今，一直陷於苦戰，特首辦個公關團隊又未齊人，好需要外力支援，但現在咁形勢，民間心戰室幫到幾多，真係好難講。
