為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > Paco巨星飯堂 2012 年 06 月 28 日

黃栢高

黃栢高(Paco),金牌經理人,叱吒樂壇三十年,炮製無數金曲,捧紅不少歌手。近年涉足電影,《行運超人》、《龍咁威》、《殺破狼》等,皆叫好叫座。最新動作,除於本刊主持《Paco巨星飯堂》,每逢周一更在《頭條日報》主持「名人會」專欄,專訪城中名人、紅星。

車出佳績

今晚「Paco巨星飯堂」,集台前幕後嘅精英於一身,台前代表有余文樂、林家棟;幕後尖子係導演鄭保瑞同錢嘉樂,佢哋喺啱啱上映嘅《車手》聚首一堂,為大家炮製官能上嘅一級享受。更值得鼓舞嘅係電影上映後,於本港嘅單日票房錄得超過 120萬,當導演鄭保瑞及余文樂得知佳績後,心情興奮得不能言喻。導演鄭保瑞仲話:「簡直好似發夢一樣!」

哈哈哈!我一早就帶咗一眾《車手》去位於尖沙咀嘅「AVA Restaurant Slash Bar」,寓慶功於敍舊,乾!

我同《車手》台前幕後精英嘉樂仔、導演鄭保瑞、林家棟同余文樂,大談《車手》苦與樂。

死亡習作

《車手》雖然係一部以賽車為題材嘅電影,但相比你哋耳熟能詳嘅《頭文字D》,今次可謂更加名副其實。喺電影中嘅「90°直角慢飄移」、「8,000轉2米車」等飄移鏡頭,全部都係真人拍攝,放棄一貫飆車電影採用嘅電腦特技效果。而呢啲極度危險嘅飄移鏡頭,鄭保瑞話阿樂只係take一兩次就搞掂,「畢竟阿樂有學過,又拍過《頭文字D》,最大功勞反而係嘉樂仔,有好多飆車場面都是由他設計同負責。」

嘉樂仔係電影嘅動作指導,將飄移技術融入戲中,設計咗「高轉數、低速度,過死角位」嘅心法,「今次喺《車手》,我同阿瑞傾嗰時,話只係玩快玩速度冇乜新意,所以就反其道而行,玩慢玩技術。我哋將車當成決戰武器,帶少少武俠世界嘅味道,但同時都會兼顧現實,畀識玩車嘅觀眾覺得戲入面嘅特技,都係有根有據。『8,000轉2米車』嘅道理係,當引擎行駛到8,000轉嘅時候,車胎同地面高速摩擦,所以有離地效果,然後再用2米車嘅速度,慢慢轉個急彎。事實上,因為高速burn胎,基本上我哋每晚拍攝,已經消耗咗兩組車胎,因為我同阿瑞都想電影嘅原始味道重啲,拍出一部飛車武俠片嘅feel。」

雖然有飆車專才嘉樂仔,但係導演阿瑞拍完成部戲都足足瘦咗10磅。

「拍呢部戲嘅時候,我哋都好多顧慮,因為喺安全同鏡頭之間,好難攞平衡點。好多時,我都係呃咗阿樂佢哋上車,只係同佢哋講小心啲。

講飆車,嘉樂仔(左)係專家,連導演(中)都話要歸功呢位動作指導。

蟹肉雙重奏($228)夠晒開胃。」

慢煮大西洋三文魚($168),以慢煮手法保持魚肉嫩滑。

香甜紅椒番茄湯($98),色香味俱全。

阿樂(右)同家棟(左)對揸快車都有各自嘅睇法。

玩命拍戲

由於飛車電影本身就有一定嘅危險,而且今次阿瑞又係真人實拍,所以,幾乎日日開工都會發生意外,甚至喺開拍首日嘅首個鏡頭,就意外撞毀咗一架車。阿樂同我講:「導演係我見過嘅導演入面最黑仔嘅一個,但係佢又最擅長拍『玩命拍戲』,佢成日話:『你唔撞爛架車我點拍呀?』

「結果我哋第一日就撞爛一架幾十萬嘅車,拍到成架車都up-side-down。」

阿樂繼續講:「每次拍飛車,都一定會有意外發生,因為車好難控制,之前我拍《頭文字D》嗰時,睇住周杰倫差啲喺我面前出事。就係因為知道成件事好危險,所以我好想快啲拍完部戲。」

而家棟就舒服啲,佢飾演警隊高層,佢就話:「以前我都試過揸快車,不過有幾次都畀警察捉到,之後我就唔敢再違規。」

導演(右)同嘉樂仔(左)喺電影開拍前,經常開會研究最有實感嘅飛車鏡頭。

野生海鱸($258)係時令菜式,而由於魚肉係取自野生海鱸,令脂肪同肉質都特別有嚼勁。

法國嫩雞($308)嘅烹調方式,令雞肉汁唔會流失,保持嫩滑。

力爭影帝

阿瑞話,《車手》係以追緝飛車逃匪嘅「隱形戰隊」為電影核心。「由於開警車追犯,往往會畀太大壓力執法者,容易打草驚蛇,所以交通隊就專門成立咗『隱形戰隊』。」除咗「隱形戰隊」,阿瑞仲強調:「我選擇用真實方法拍,就係要話畀觀眾知,有人開車嘅感覺,真係踩足180米嘅真實公路上面飛車,質感係冇其他嘢代替得到。」

電影籌備咗幾年,期間阿瑞仲返咗大陸拍《大鬧天宮》,於是佢喺起行前完成咗90%,再剪輯好第一cut交畀監製杜Sir杜琪峯。結果係,「佢好直接同我講唔滿意,仲好詳細咁指出唔滿意邊度,點解唔滿意。至於點先可以拍得好,他叫我自己去摸索,唯一畀我嘅提示係,佢最欣賞嗰個8,000轉位,認為係可加以發揮嘅地方。」

香濃朱古力條($128)嘅朱古力味濃郁,好此道嘅食家不可不點。

香煎帶子($298)感覺清新,啱晒喺炎炎夏日品嘗。

我一向以酒會友,阿樂(右)同家棟(中)都同我暢飲。

導演(左)得到杜Sir提攜,其出品更加有保證。


AVA Restaurant Slash Bar

地址:尖沙咀赫德道8A隆堡麗景酒店38樓
電話:3550 0262