為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2012 年 06 月 19 日

阿姐救亡頂硬上 兩「民主女神」危危乎

泛民各黨近日紛紛排陣準備九月大戰,大佬阿姐齊齊出馬,必然打到沙塵滾滾,其中最出人意料係,「民主女神」余若薇本已決定收山,但最後一分鐘突然入閘再賽,而且揀喺十七國咁亂嘅新界西,究竟公民黨搞乜東東,好有懸疑性。

線人回報,公民黨決定出選陣容之前一晚(周六深夜),余若薇至答應落場,原因係該黨長老關信基教授同黨魁梁家傑都向佢告急,話公民黨選舉形勢極之不妙,郭家麒喺新界西勢孤力弱,同地區樁腳不和,黨個「朵」又差咗好多,如果冇重磅人馬撐住,輸面好大。若新西有失,港島又輸埋,公民黨就大勢去矣!佢哋喺五個區做過民調,如果放余若薇個名落去,新界西勝算最高,有機會帶埋郭家麒入局,咁就可保住個勢,所以佢點都要捱義氣打呢場仗。

公民黨排陣一頭煙,郭家麒(下圖)出戰新界西有將冇兵,地頭蟲唔肯抬轎,阿姐余若薇(左)被迫出馬救亡,但隨時輸埋。港島形勢亦不妙,陳淑莊孭陳家洛上陣,可能自身難保,雙雙落馬!

余若薇亦知公民黨大鑊,講得誇啲,盛衰就在此一役,思前想後,終於頂硬上。不過,新西呢個山頭立立亂,內部矛盾重重,分分鐘有將冇兵,連「民主女神」都危危乎。線人指,公民黨新西頭目陳琬琛一直坐鎮區內,廣設支持脈絡,但黨領導人流嘅係「藍血」,尊崇專業貴族,睇低地區幹部,陳家洛未做黨主席時,曾落過新界西主持區務,就同佢好唔啱key,佢見自己做就有份,上位就冇望,早已心存怨氣。到最近排陣,郭家麒排喺名單第一位,高層擺明力捧醫生空降,繼續「藍血大晒」,陳琬琛頂住條中氣,點肯幫佢抬轎?最壞情況係同一眾樁腳齊齊散水。

區內軍心渙散,面不和心不和,余若薇揀呢區出戰係兵行險着,如果樁腳鬆晒,不盡全力,郭醫生又全冇號召力,佢即使瞓身力撐,最後分分鐘兩人齊輸,至多只能勉強推到郭醫生入局,「民主女神」黯然落敗。

港島方面,主席陳家洛在名單中排第一,陳淑莊排第二,好明顯想借莊姐之力,攞到足夠票帶埋佢入立法會。但呢個算盤未必打得響,過往公民黨靠港島中產票食胡,但自從亂打官司,又跟毓民癲埋一份,個光環褪晒色,流失唔少支持,港島已冇優勢。

陳家洛乃學者一名,冇乜突出表現,之前未參過選,知名度亦唔高,莊姐則連區議會個位都輸埋,扮鬼扮馬亦難挽民望,呢條名單咁弱雞,分分鐘齊齊「香」,如某作者所言,「民主女神」淪為「政治剩女」。