為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > Paco巨星飯堂 2012 年 06 月 21 日

黃栢高

黃栢高(Paco),金牌經理人,叱吒樂壇三十年,炮製無數金曲,捧紅不少歌手。近年涉足電影,《行運超人》、《龍咁威》、《殺破狼》等,皆叫好叫座。最新動作,除於本刊主持《Paco巨星飯堂》,每逢周一更在《頭條日報》主持「名人會」專欄,專訪城中名人、紅星。

萬子千紅

今年我全力向音樂、電影等範疇發展,2012年一半將過,係時候畀大家睇吓小小成績。即將上映嘅電影《懸紅》,係我有份投資嘅作品,電影由周星馳御用編劇馮志強,首次自編自導炮製,而我亦誠邀演技派祖師萬梓良,喺戲中飾演女主角Fiona嘅爸爸,台前幕後都係實力、創意嘅保證。

今晚我就特別邀請導演志強同梓良兄,同我一齊去到位於尖沙咀嘅「龍圖閣海鮮飯店」,品嘗有特色嘅小炒之外,同時細說《懸紅》。

馮志強、萬梓良喺《懸紅》首次合作,惺惺相惜。

充滿熱誠

今晚我哋呢個「懸紅宴」,我要先講一講之前Fiona(薛凱琪)擔任「Paco巨星飯堂」嘅嘉賓時,對志強、阿澤同梓良兄嘅感覺,佢認為呢個班底,人人對成件事都充滿熱誠,所以拍起上嚟特別起勁。哈哈哈!今次我先請梓良兄講吓加入「懸紅」大軍嘅原因。

「好簡單!就係因為Paco兄你嘅誠意,你親自打畀我,嗰份尊重,已經夠啦!」

哈哈哈!梓良兄一向快人快語,我先敬佢一杯,乾!

「我最感動,係Paco兄你話要一個有份量嘅人支持馮導演,我好感激你哋仍然覺得我有呢個份量。我係客家人,特別重情義,就係呢份情,就要同你哋合作啦!」

今晚我同志強、梓良兄(左至右)共聚,一邊品嘗美酒佳餚,一邊細談電影。

梓良兄係性情中人,佢每次同我碰杯,一定杯杯乾!

百花馬友鹹魚煎肉餅($108),貨真價實。「龍圖閣」前身係位於西環嘅「小炒皇」,早已馳名香港。

蝦乾韮菜花爆中國薯條($88),係佐酒良品。

高湯胡椒鹹菜花甲王($148-$268),花甲王極為鮮味,價格以份量計算。

惺惺相惜

除咗誠意請得郁梓良兄之外,其實佢對首次執導嘅志強,亦都相當欣賞,「導演同Paco兄你一樣,做任何事都以誠意行先,咁但係只係誠意都未必拍到好戲喎,佢有埋才華就得嘞!」

哈哈哈!我同梓良兄一樣,對志強都係充滿信心,而志強就一向視梓良兄為偶像,「萬子哥係我其中一位偶像,搵佢演出,純粹係私人喜愛,結果係令我歎為觀止嘅。我印象中,萬子哥好似未正式演過爸爸嘅角色,而且要佢演一個怕事嘅爸爸,你諗吓,一個怕事嘅萬子喎!真係一聽到已經好想睇。而且請得萬子哥,點都要加啲爆發位喺劇本入面,等入場嘅觀眾會一直等待,呢一個怕事嘅人幾時會爆發,而最後佢同阿澤嗌交一幕,就是有一種一秒間重溫眾人熟識嘅萬子嘅感覺,好爆,我好鍾意!」

志強係香港新生代編劇,96年喺香港浸會大學傳理電影系畢業,畢業作品已獲選為大學代表,到台灣參展第33屆金馬獎。之後到TVB工作,創作過《創世紀》等劇本,後來又得到周星馳賞識,成為《少林足球》編劇之一,其後《長江七號》佢亦有份編劇。「當時係幾有趣,我拎住劇本上周生公司sell,雖然最終唔成功,但佢反問我有冇興趣踢波,然後就叫我埋位搞《少林足球》。」

梓良兄(右)極之欣賞志強(左),而後者則視前者為偶像,促成今次合作。

馬友鹹魚粒芥蘭炒手打鯪魚餅($88),鯪魚餅冇加粉,啖啖魚香,配合馬友鹹魚,夠惹味。

金牌鴛鴦雞($198)包括炸子雞同白切雞,真正係一雞兩味。

瑤柱香煎海鮮琵琶豆腐($108),係水準之作。

我一向以酒會友,今晚亦唔例外。

4年籌備

之後佢再參與銀河映像電影《天生一對》、《報應》同《每當變幻時》劇本創作。連周星馳、杜琪峯同許冠文都對佢高度讚揚,志強才華洋溢,我梗係要投資佢處男執導嘅作品啦!

「今次好多謝Paco你,幫我一圓導演夢,有前輩同我講,新導演要開到部戲,得3個可能性,第一係自己拎錢拍;第二係自己有一堆大明星朋友肯廉價幫你演出,投資者覺得抵就會投資;第三就係有一個好劇本。頭兩樣我都冇,劇本就係我唯一最厲害嘅武器,但喺香港肯睇劇本先投資嘅人有幾多個?我曾經將呢個劇本賣畀電影公司,直到後來自己有機會做導演,第一時間就諗起呢個故事,於是我又同電影買番個劇本,兜兜轉轉都係返到自己手上,好奇妙。

「而阿澤、萬子哥同Fiona都係不可多得嘅好演員,佢哋嘅演繹都幫咗部戲好多。其實我由08年北京奧運嘅時候已經搵製片傾《懸紅》劇本,好在喺2012年倫敦奧運前終於上到,籌備咗咁多年,基本上我喺自己個腦入面已經拍咗好多次,所以今次我完全享受過程多於一切,順利完成已經算係好唔錯。」

哈哈哈!志強既來之則安之嘅平常心,係佢才華以外我好欣賞之處。今晚我先慰勞一下梓良兄同志強,乾!

我嘅心水係與蠔有關,呢味砵酒洋葱焗大桶蠔($148),選料新鮮,份量十足。

餐廳另一招牌菜係閩南籠仔荷葉蒸糯米花蟹($288-$888),名不虛傳。

梓良兄(中)渾身是戲。

我哋今次合作成功,期待他朝有機會再創佳績。


龍圖閣海鮮飯店

地址:尖沙咀漆咸道南17-19號(麼地道交界)帝后廣場1樓
電話:2817 1671