為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > Paco巨星飯堂 2012 年 06 月 15 日

黃栢高

黃栢高(Paco),金牌經理人,叱吒樂壇三十年,炮製無數金曲,捧紅不少歌手。近年涉足電影,《行運超人》、《龍咁威》、《殺破狼》等,皆叫好叫座。最新動作,除於本刊主持《Paco巨星飯堂》,每逢周一更在《頭條日報》主持「名人會」專欄,專訪城中名人、紅星。

正父能量

今個周日係一年一度嘅父親節,我率先邀請咗阿Bob(林盛斌)同英語天王Richard Eng(伍經衡)兩位父親級人馬,同我一齊去到位於朗廷酒店的粵菜廳「唐閣」,品嘗應節嘅「Glenmorangie×唐閣父親節品味盛筵」。佳餚之外,仲可以一面品味深受世界各地鑑賞家鍾愛嘅Glenmorangie(格蘭傑)單一麥芽威士忌,一面暢談為人父親嘅樂事,發放正氣父能量 ,一舉兩得。

為咗迎接今個周日嘅父親節,我帶阿Bob(左)同Richard(右)兩位爸爸級人馬,去到唐閣率先品嘗餐廳同Glenmorangie嘅crossover父親節盛宴,發放最正嘅父能量。

美酒佳餚

今日盛筵菜譜與Glenmorangie威士忌嘅搭配經過精心設計,以味覺觸感為本,以和諧融合為美。有我同兩位嘉賓欣賞之外,仲有一位嚟自蘇格蘭嘅威士忌專家David Blackmore,David係Glenmorangie嘅Master Brand Ambassador,換言之,佢係一本有行動力嘅威士忌活字典。今次我哋品嘗嘅父親節精點,係以頂尖蘇格蘭單一麥芽威士忌完美搭配精品粵菜,其中包括首度登場嘅Glenmorangie Private Edition珍藏系列限量版單一麥芽威士忌Finealta。

David話:「Finealta為蘇格蘭語,象徵『優雅、高貴』。酒係根據1903年古老配方釀造而成,保持Glenmorangie單一麥芽威士忌獨有嘅雲呢拿與柑橘香氣,其獨特之處在於豐富嘅橘子及青檸味道,帶有淡淡櫻桃白蘭地酒香氣,會令你嘅大腦產生錯覺,以為酒係有甜味。但係一飲落去,你就會發現呢種酒係混合荳蔻與薑嘅辛辣味,大家試吓。」

Richard對Finealta嘅感受較深,「果然係好似David所講,呢款酒層次感好豐富,一聞落去係一陣雲呢拿同櫻桃嘅味道,點知一飲先發現畀自己大腦發出嘅訊息呃咗。」

David係Glenmorangie嘅Master Brand Ambassador,對品牌嘅每項出品都瞭如指掌,佢亦逐一向我哋介紹。

美酒當前,我同阿Bob、Richard及David(左至右)先乾一杯!

我哋今次品嘗嘅「父親節品味盛筵」,供應期由6月1日至7月31日,訂價每位HK$1,180.00(另設加一服務費)。菜譜中頭盤為鮮菌帶子焗牛油果,口味清新,口感幼滑,淡淡芝士味道,與單一麥芽威士忌,最為匹配。

而配合松露乳酪蒸蝦球(上)及杞子果皮炒龍躉球(下)嘅Glenmorangie Lasanta係一款優雅、飽滿嘅單一麥芽威士忌。此酒必須先喺波本酒桶熟成十年以上,然後置入西班牙Oloroso頂級雪莉酒桶內進行額外嘅熟成,先可以誘發出濃密、柔和嘅口感。

首年起啤

哈哈哈!對我嚟講,美酒佳餚只係其次,我一向以人為本,摸酒杯底之外,我梗係要聽吓阿Bob同Richard嘅女兒經。阿Bob一向為Richard創辦嘅遵理學校擔任代言人,佢同Richard一向friend底,今次兩位爸爸首次同場,我先請今年首次同兩個囡囡共度父親節嘅阿Bob發言啦!

「係呀Paco,我今年第一次同兩個女一齊慶祝,計埋我太太就係3條Queen。我諗正日我哋一家會去行吓商場,shopping吓,然後一家人好好咁食一餐晚飯。因為近年多咗工作,變相喺屋企嘅時間都少咗,咁父親節就要留番畀佢哋,仲有我自己嘅家人、我老婆嘅家人,一齊過一個family day。」

講起兩位囡囡,阿Bob手舞足蹈、七情上面。

Richard都係惜酒之人,自然情不自禁要為好酒留下動人一刻。

阿Bob嘅大女霏霏(林霏兒)啱啱4歲,妹妹熹兒就只得半歲,阿Bob話今年嘅「起啤父親節」,將會屬於佢第二難忘嘅父親節,「首選梗係我第一年過嘅父親節啦!嗰年霏霏出世,過節嘅時候我太太都未坐完月,唔可以出街,我哋就留咗喺屋企,太太同我為個女已經好忙,到晚飯嘅時候,我就煮咗個愛心即食麵,作為自己第一個父親節大餐。」

味道香濃嘅芥末香葱爆美國牛柳粒,則以Glenmorangie Quinta Ruban襯托。呢款酒口感細緻嘅單一麥芽威士忌,最適合信心十足、多采多姿、充滿活力嘅鑑賞家品嘗。

珍藏系列限量版Glenmorangie Finealta係根據1903年古老配方釀造而成,保持Glenmorangie單一麥芽威士忌獨有嘅雲呢拿與柑橘香氣,其獨特之處係帶有淡淡櫻桃白蘭地酒香氣,混合荳蔻與薑嘅辛辣味,呢個田園調子,佐配上湯雲腿雜菜煲最為合適。

一卡傍身

至於Richard嘅千金Stephanie,今年已經15歲,「我個女雖然已經咁大個,但係由細到大,佢同我哋嘅關係都好close,會同我哋傾心事之外,依家每朝,佢都會入嚟我哋房,同我哋kiss goodbye先返學。」哈哈哈!睇嚟Richard除咗英文了得,喺親子方面都係專家。

而講到父親節,Richard指Stephanie每年都有一套指定動作,「佢每年都一定親手畫一張卡,然後寫一段文畀我。我好記得喺佢10歲嗰年,佢又送一張自製卡畀我,入面寫咗一段好長嘅文章,大致上嘅意思係好多謝我同太太令佢成為當時嘅佢,做到佢想做嘅事,佢會盡佢能力做我哋嘅乖女。我個女寫嘢好叻,佢嘅用詞觸動我,所以到依家我都記得咁清楚。」

今年,Richard就獎Stephanie喺父親節當日放假shopping,「平時佢埋頭苦讀,好少出街,所以我哋會先去shopping,再食啲嘢,然後一家人去主題公園玩,一齊relax一吓。」

好!爸爸計劃周詳,我都先以呢一杯,敬天下間所有父親!乾!

把酒言歡係人生一大快事,把酒談兒女經,更加妙不可言。

美酒之外,阿Bob對佳餚都垂涎三尺。

阿Bob、Richard及David(左至右)都係父親級人馬,亦為懂酒分子,呢一刻又點可以唔以酒會友?

Glenmorangie 18 Years Old係稀有陳年單一麥芽威士忌,其具有濃郁嘅花香,最適合追求極致生活品味嘅奢華烈酒行家飲用。此品味盛筵菜譜以一道骨膠原燴五穀絲苗,骨膠原係以鮮雞餚製嘅精華,味道清新,巧妙地反襯其平順幼細。

佐配甜品的格蘭傑納塔朵(Glenmorangie Nectar DÒr)具有美味、繁複的風味基調,非常適合於搭配甜點,配襯蓮蓉西米焗布甸拼咖啡千層糕迷你老婆餅,甜而不膩。


唐閣

地址:尖沙咀北京道8號香港朗廷酒店1樓
電話:2132 7898