女Sing勢力
今晚嘅「Paco巨星飯堂」，我集合咗新世代嘅sing勢力：陳僖儀（Sita）、鄭融（Stephanie）同Hotcha，各擅勝場。Sita係今年令人眼前一亮嘅新人，仲即將喺九展舉行佢首個音樂會；Hotcha嘅Crystal（張紋嘉）、Winkie（黎美言）大個女，開始走成熟啲嘅路線；阿融就繼續藉音樂追尋夢想，各自喺2012年大展所長。
為咗4位女sing，我挑選咗位於跑馬地嘅特色中菜館「壹玖捌叁」，餐廳包攬中國各地菜式嘅特別之處，同4位嘉賓一樣咁多元化，真係最適合作為今次嘅飯敍地點啦。
今晚我集合阿融、Sita、Winkie同Crystal（左至右），細談「樂與路」。
感動女聲
Sita屬於今年新人，係我重投音樂界嘅推介，能夠成為我嘅頭炮新人，Sita梗係實力嘅代表。而樂迷熱烈嘅反應，都證明咗我嘅眼光，一曲由佢親自作曲嘅〈忘川〉，唱得街知巷聞，感動人心，所以Sita即將進駐九展，舉行佢入行首次嘅音樂會。「我真係要再一次多謝Paco你，當同事同我講我可以擁有一個屬於自己嘅舞台時，我真係既開心又興奮，係一次夢想成真！
「加上可以請到豹哥（單立文）幫我做band leader，有佢幫我安排，起到好大嘅定心作用。我計劃喺音樂會度唱多啲唔同類型嘅歌，除咗我自己嘅歌之外，一啲對我嚟講好重要嘅歌，我都會唱，好似我第一次參加比賽嘅歌、由台灣組合F.I.R.原唱嘅〈Lydia〉咁，我都會借今次嘅機會，同fans分享一下我對呢首歌嘅感覺。」
雖然Sita近日為音樂會積極準備，但面對美食當前，佢都忍唔住要破戒。
Sita（左）即將喺今個月舉行個人音樂會，心情既緊張又興奮。
哈哈哈！其實Sita極為謙虛，佢嘅唱功已經係實力嘅見證，除咗豹哥之外，我仲特別邀請側田喺北京返香港，為Sita護航，音樂會嘅班底又係另一信心保證！而且近期Sita進軍埋影壇，參與《喜愛夜蒲2》演出，作多方面嘗試。
「可以參與演出，固然係好開心，最開心係今次仲有機會為電影主題曲作曲，喺創作上我係靈感派，行街諗到就用電話錄低，有次游水突然諗起一個melody，就即刻上水去更衣室錄低，我好enjoy成個過程。」
上湯迷你鹹水角（$40），極有特色。
三式拼盤（$98）包括香葱油拌海蜇花、蜜餞素脆鱔、手拍小青瓜（前至後），嘉賓們對以冬菇炮製嘅素脆鱔，大表讚賞。
原條龍船豉汁方脷球（$228），魚肉鮮甜。
進軍文壇
Sita向實力唱作人路線邁進，而Crystal同Winkie就由少女組合，漸趨性感成熟，Crystal話：「依家〈Hot Lady〉嘅形象，其實係老闆娘Marie（諸葛紫岐）親自幫我哋揀嘅，之前拍MV，Marie同老闆（薛嘉麟）嚟探班，仲請我哋食糖水，都增加咗我哋嘅信心。今次係我同Winkie第一次以兩個人嘅姿態出碟，所以都好緊張。」
Winkie同Crystal（左至右）除咗係hot ladies之外，今年書展佢哋仲推出著作，一嘗當才女滋味。
阿融、Sita同Winkie（左至右）都對避風塘炒肉蟹大為動心。
歌唱事業上有新方向，Hotcha今年就進軍文壇，將會喺書展分別推出個人著作，Winkie以體驗為主題，「之前我去咗日本，學用牛仔布料做唔同嘅物件，由恤衫到袋都有。我一向都對design好有興趣，所以成個過程都好享受，而我嘅書就係以今次旅程為主，有旅遊嘅成分。」
Crystal就執筆寫小說，「我不嬲都鍾意寫嘢，而且好鍾意一啲迷離主題，所以我嘅小說會係相關嘅題材，加入一啲愛情嘅元素，希望會有知音。
「而依家我就日日都為即將公演嘅舞台劇《勁金歌曲》同糖妹綵排，今次嘅反應好好，我哋喺葵青劇院公演，門票都賣得好理想，係好大嘅強心針。」
碧綠玉簪鮮蝦球（$188），色香味俱全。
避風塘炒肉蟹（時價），非常惹味。
先聲奪人
同Hotcha一樣喺7月推出新碟嘅阿融，一向都係唱得之人，依家佢嘅第一主打〈第五類〉，已經先聲奪人，甫上流行榜就進佔前列位置，真係要同佢乾一杯慶祝，乾！
「我依家努力減肥中，日日都跑步、跳舞同為新碟錄音，好充實。我覺得專心做嘢好重要，希望大家睇到我嘅努力。順便提一提，我哋依家仲揀緊second plug，有一首叫〈漸漸〉嘅歌係我好鍾意嘅，你哋都要留意呀。」
哈哈哈！有先天實力，加上後天嘅努力，係成功嘅一半，我祝4位嘉賓，成功在望。乾！
阿融（左）淺嘗美酒即時面紅耳赤，我就話夠紅先係好事，哈哈哈！
我哋一致認為，呢道金湯蟹肉素翅係僅次於水煮系列嘅精采菜式。
金湯蟹肉素翅（$88），南瓜湯襯托出蟹肉鮮味，而用上素翅就夠晒環保。
煮安格斯牛肉（$228），香辣效果做得出色！
以巧克力蜂巢角（$36/3件）作甜品，香甜以外略帶浮誇，自有捧場客。
壹玖捌叁
地址：跑馬地載德街2-4號1樓
電話：2893 3788
