為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 娛樂放題  > 留星語 2012 年 06 月 01 日

從瓦努阿圖到瓦努亞洲 陳啟泰

是咁的,話說亞視為賀五月廿九號的五十五周年台慶,除出動全台藝員拍了首膠歌MV《Gimme Five》外,查實阿Ken陳啟泰也單獨拍了一個《百萬富翁》×「瓦努阿圖」廣告的「瓦努亞洲」宣傳片,更親自度了些自嘲台詞來贈興:

「大家好,你睇緊嘅係『瓦努亞洲』,我係陳啟泰!」、「喺香港,邊一間電視台最鍾意改台慶嘅日子,不過,最後憑良心都係改番五二九呢?」

雖然此片在電視上播了兩天便遭腰斬,但阿Ken說起這件事,還是有點得戚的。「初初個版本好鬼老正o架,拍拍吓個writer話可以玩得盡啲,咁我咪講『瓦努亞洲』囉,起碼有橋,大家會記得呀!YouTube個點擊率都有幾萬,啲人睇到都話抵死!引到你笑,我都開心o架!」

是的,因為特首競選,全城網民都說要移民到瓦努阿圖後,阿Ken自此便等於了瓦努阿圖。

「都幾好笑o架!有啲人會同我講:『嗰度有活火山,有食人族,你叫我移民去嗰度?想我死呀!』哈哈哈!當然咁講都唔係認真啦,嗰度只係畀大陸人移民嚟香港嘅踏腳石,邊有人會去土人度住呀!不過成件事都係正面嘅多,估唔到個反應咁犀利、咁爆!」

瓦努阿圖爆還爆,但阿Ken在整個訪問提及最多的,仍是亞視、亞視和亞視。「因為呢一切都係亞視畀我嘅!」

「瓦努亞洲」宣傳片

舔到盡

當然,要是比較起來,瓦努阿圖還是不及○一年阿Ken主持的《百萬富翁》影響深遠。「如果你講一個人舔盡一件事,我諗就係『陳啟泰舔盡《百萬富翁》』囉!十一年前嘅事,真係好犀利!舔到好盡!連瓦努阿圖都係佢嘅二次創作咋!我覺得真係超好彩o架!

「《百萬》之後嗰幾年,我都有諗過想甩咗呢個喺觀眾心目中嘅印象,但後來我諗通咗,其實我應該要將呢個印象好好運用囉,譬如話我可以去登台,同埋遲啲出國語唱片,都係因為《百萬》咋嘛!」

當年《百萬富翁》收視最高有三十九點,成了亞視史上的「神話節目」,而他亦從此被稱為「亞視一哥」。

收視創新低,最近仲話平均得一點,我都難受o架!

「一乜嘢哥呀,因為冇人咋嘛!我九八年入嚟亞視到依家,喺我身上,我從未同過任何一位男士、女士爭過嘢做,都唔夠人,爭乜嘢呢?就算你話我同林韋辰,外形好似啦,高高瘦瘦、戴眼鏡,但都冇嘢好爭,因為乜嘢show都係我同佢一齊做!」

查實除了大show必定有他做司儀和唱歌跳舞表演外,就是資訊節目,以及從前開拍的劇集《我和殭屍》系列、《情陷夜中環》,亦會少不了他的嘜頭。「如果要講邊個舔到亞視最盡呢?嗰個一定係陳啟泰囉!因為我嘅『亞視人』形象太深刻喇!」

40萬蚊題目:
去年十月阿Ken返回ATV後,與亞視哪位高層一起出席新節目記招呢?(答案:葉家寶)

亞視人

的而且確,他的「亞視人」形象確實太深了,深到連他○九年曾跳槽過有線兩年,大概亦沒有很多人記得。「有好多人以為我去有線客串,其實我當時真係簽咗去有線,間中亞視有啲大show先叫我返嚟幫吓手。

「呢十幾年嚟,我選擇咗亞視,或者係亞視選擇咗我,件事其實係好夾囉,因為亞視最好嘅地方,係你諗到啲乜都幾乎可以做,我想啲節目好啲,我呢幾年參與多咗度橋,識我嘅人都知我其實係內裏open——雖然個外表唔係好斯文,哈哈!但啲人會將啲唔係好正常嘅嘢擺喺我身上,我會接受我人生條路係咁囉!」

50萬蚊題目:
請說出阿Ken和張文慈在《我和殭屍》系列中的角色名字?(答案:山本一夫及山本未來)

然而,亞視的收視……「其實我都習慣咗,不過就屢創新高囉——嗰個沮喪!個收視創新低,最近仲話平均得一點,我都難受o架!好似之前嗰個台慶MV反應差,我都唔開心o架!

「有時,亞視有啲乜嘢唔好嘅嘢,啲人走嚟問我,我都會講句『唔好意思』,好似當咗間公司係我咁。嗰次我同班幕後講:『如果大家坐喺茶餐廳度,播緊嗰個MV係咁畀人踩,你哋大家都仲可以扮鵪鶉暱埋,但我唔得o架!一來、我個樣啦,二來、我真係喺亞視十幾年,我所有嘢都係亞視畀我o架!」

60萬蚊題目:
圖中阿Ken的鬥牛勇士look造型,是亞視哪年的月曆照片呢?(答案:○五年)

歸屬感

阿Ken說,在亞視比他更忠心的藝人,叫鮑起靜。「如果我喺亞視係『中臣子』,咁鮑姐一定係『老臣子』!佢嗰陣攞金像獎出嚟見傳媒,第一句唔係話好開心,而係『亞視啲crew喺邊?』呢幾個字!你可想而知佢對呢個台有幾深嘅情懷!所以佢聽到對於亞視唔好嘅嘢,佢係比我更難受!

「其實我哋唔係唔想做好啲節目,只係成日換老細,有好多嘢我哋都控制唔到!所以嗰陣亞視換咗台灣老細,佢唔想要啲咁貴嘅人,咁我同珊姐(朱慧珊)就首當其衝,裁走咗。我嗰陣同鮑姐做緊《開心大發現》,我同佢講要走,鮑姐就喺我面前喊起嚟:『唉,乜亞視真係咁樣o架?』」

另一個因為他的離開而哭的女人,是服裝間的一位阿姐「大眼」。「佢係個做嘢好有heart嘅人。我喺亞視因為成日要開工,喺服裝間有個櫃,有我個名,我走嗰陣去執番啲嘢,大眼就喊住咁話:『你幫亞視做咁多嘢,你都走?』然後仲話會留番個櫃畀我返嚟用。『唔使驚o架,你好快會返嚟o架啦!』你諗吓,一個服裝間阿姐留番個櫃畀你,已經係佢做到最有權力嘅事,真係好感動!我當時都眼濕濕o架!結果大半年前我返番嚟,就同佢講:『哼!你好嘢!你講得啱!』」

70萬蚊題目:
當年《少林足球百萬富翁慈善夜》中,轉為做參賽者的阿Ken,正被周星馳問甚麼問題?(答案:我的原名是甚麼?)

爭乜嘢

他坦言,那兩年過檔有線的日子,工作是開心的,只是未盡如他意。「嗰邊冇綜合節目,又冇劇集,製作資源又少啲,所以都唔係我想做嗰樣嘢囉,不過佢哋真係畀到我發揮,而且係開心嘅!」

那麼,在這十多年亞視受重用的日子,大概也曾引來無綫招手吧!「冇喎!係最近一次『逃亡潮』先call過我,都係問我張約仲有幾耐咋,唔係問我有冇興趣返去呀!我都係答佢:『仲有年幾約,到時先算啦!都就嚟世界末日咯!』真係喎,咁快call我都冇用啦!不過,我都感覺到佢哋冇人嘅地步,真係幾慌!」

但若現在重返TVB,應該會更得寵呀,陳煒、萬綺雯甫加入,已被安排在重頭劇演出啊。「見到佢哋發展得幾好,都開心o架!」他聳聳肩說。

名利穩定咗之後,我依家有少少為興趣做嘢,工作心態平和咗。

還有陳展鵬呢。「咁展鵬係之前簽o架啦!佢唔使講啦!起碼嚟緊十幾年都係佢世界o架啦!佢係個有思想、做戲比較有心機嘅人,比較起一啲無綫嘅哥仔,hea吓hea吓咁做戲,你會覺得展鵬真係好好囉!佢有諗嘢、交足貨o架!呢啲咪似我囉!」

似你?「真係o架!我同佢一樣都係屬龍,『龍人』做嘢係咁樣o架,對工作好有熱誠o架!不過呢,自從《百萬》我啲名利穩定咗之後呢,其實我嘅工作心態開始平和咗,唔會再咁辛苦去fight啲乜,反而我依家有少少為興趣做嘢,對拍嘢會執着咗囉!」

都話《百萬富翁》影響深遠o架啦!

瓦努亞泰

跟幾年前和阿Ken做訪問時相比,這天眼前的他,顯得更加懶洋洋(並非hea那種)。我想,一來、因為今天我們面對着藍天碧海;二來,因為他是個從來都不求大富大貴,只求安安穩穩的人吧!

是真的,在幾年前的訪問中,他曾說過,小時候一家住在麥當勞道千呎豪宅,後來看見父親生意失敗,屋愈搬愈細後,他便定下了「要儲錢保障退休生活」的目標,「我唔想我將來都好似我老竇咁!」

結果呢,第一桶金很多年前他已儲到了,我相信他現在應該是更富有的,不過,原來他至今還是繼續揸十多廿萬的車,繼續居於觀塘功樂道那三十年樓齡的住所!「《百萬》嗰陣,我都帶過老婆去睇樓o架,但我老婆話:『換乜鬼呀,依家呢度唔好咩?』咁咪一直住落去囉,反正仲有兩年都供完,我哋又冇細路!」

那將來可會移民到瓦努阿圖享福?「其實我一早已經移咗民o架喇!我兩歲已經掟咗去加拿大,但老竇老母唔捨得,驚我變竹升,我就返咗嚟,十幾歲讀完中三先再過去,我有加拿大護照o架!不過,嗰邊真係空氣好好,啲樓好大,但悶吖嘛!都冇嘢好做,叫我點住啫!好似依家咁,可以出嚟沙灘影吓相,你話幾咁開心!」說罷,他擺出一副悠閒得戚樣,「我依家叫做『瓦努阿泰』吖嘛,乜我冇話你知咩?」爛gag!

100萬蚊題目:
阿Ken跟太太Cynthia結婚幾多年呢?(答案:十四年)