為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2012 年 05 月 25 日

田二少巨型廣告 元朗高高掛

除咗「拉布三煞」熱爆,近期政圈仲有一個「搶眼」人物,就係新民黨副主席田北辰。話田二少「搶眼」,的確名副其實,原來佢上星期喺元朗大馬路一幢大廈外牆,掛起一幅巨型廣告牌,面積有十六米×六米咁大,仲勁過好多超大外牆廣告,好遠已經清楚睇到佢個樣同新民黨logo,成為大馬路一個矚目焦點。

田二少於元朗一幢大廈掛上超巨大廣告牌,上面有自己嘜頭,月租三萬幾,成為區內最搶眼一景。

本刊記者詢問田二少,佢話個廣告位係fans朋友平租畀佢,每月租金只三萬幾,比正常外牆廣告價平好多。用到咁大外牆位,其實另有苦衷,佢原來想在元朗搵街舖開一個地區辦事處,但豆腐膶咁細嘅百幾呎單位,都要月租三萬大元,要似樣啲,閒閒哋月租十幾萬,諗過度過,不如先用四分一價錢掛個外牆廣告,打響知名度,可能仲有效。

田二少殺入元朗,似乎已肯定在新界西出戰,佢瞓身一博,睇嚟有啲揸拿,但呢區群雄逐鹿,九個議席最少有十幾隊人馬爭,唔計泛民,單係建制派本身,已經有民建聯、鄉事派、工聯會以及一班幫過CY嘅少壯派,田二少要在呢區插旗,唔係咁易打。