為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2012 年 05 月 24 日

民主黨誓不落叠 唔中癲狗奸計

民主黨近年被毓民死咬唔放,仁哥等認為佢有「特別任務」,視佢為敵,做足戒備。故今次拉布戰一開波,民主黨高層就決定保持距離,拒不落叠,因為如加入拉布,只會助長人民力量氣勢,溫和選民亦唔buy,抬完轎冇着數且失分,不利九月選舉,絕對制唔過。

線人透露,拉布通頂當晚深夜,已退黨嘅鄭家富出手幫毓民,不單止自己出馬,更四圍班救兵,派助理去民主黨議員辦公室敲門求援,但只有兩人應門,一個係張文光,一個係卿姐,但兩人都懶懶閒回應:「民主黨杯葛緊會議,已經係幫手啦。」拒絕入議事堂加入拉布行列。

民主黨態度咁硬,因為地區幹部做過調查,知道區內支持者普遍對拉布反感,如果民主黨落水,反而會流失票源,但若企出嚟反對,又會被人民力量狙擊,實在相當頭痛。

泛民陣營被三煞玩到散晒,工黨人馬跟住毓民玩,公民黨搶攻失敗,又唔想重犯「歸錯邊」錯誤,結果唔上唔落,兩面不是人。

部分高層擔心拉布持續會影響該黨立會選情,希望搵到方法「剪布」,故有人向曾鈺成暗示撐佢終止拉布,傳聞包括張文光及卿姐。兩人向來不滿激進派搞局抽水,咁做並唔出奇。

不料傳聞令民主黨引火上身,曾鈺成突然叫停個騷,並指自己「感覺到」獲得泛民議員接納,其後民主黨又冇就此提出強烈抗議,令該黨「左翼」成員開始不滿,據聞在中委會上,曾向黨團追究責任,認為佢哋犯錯,令選民流失。

毓民呢一招果然犀利,泛民陣營畀佢搞到散晒,唔跟住玩嘅都變輸家,唔怪得咁多人對佢恨之入骨。