為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2012 年 05 月 22 日

毓民拉布騷玩散泛民 公民黨再成輸家

毓民帶頭上演拉布鬧劇,搞到議會亂過鑊粥,會期結束前仲有好戲連場。線人拆局指,佢今鋪出此奇招,反「惡法」是假,為九月選舉搶票是真,特別係佢拍檔大嚿(陳偉業)形勢甚危,如果唔盡地一煲,搶番個綵,分分鐘會出局。拉布又可以搞散泛民,令公民黨同民主黨進退兩難,「左翼」選民票流失,人民力量就照單全收,勝算大增。

線人講,大嚿將於新界西參選,呢個區下屆有九個議席,參選者攞到11%選民支持,就可勝出,大嚿上屆只有三萬二千票,僅得8%包尾入圍,如果佢唔玩鋪大嘅博一博,好易翻艇出局。因此毓民今次搞拉布,畀晒位大嚿表演,一千三百零六次修訂中,有一千二百幾項由大嚿提出,希望拉到更多激進選民票。

毓民、大嚿同長毛搞局,名為反「惡法」,實為搶地盤,背後盤算係奪走泛民部分支持者,增加九月選舉勝算,故策略上迫使公民黨及民主黨陷入兩難困局。

大嚿同區對手包括何俊仁、梁耀忠、李卓人等,各人票源接近,可以話係「零和遊戲」,大嚿之得,就係其他泛民人馬之失,只要對手支持者流走部分過嚟,佢贏面就大好多。所以拉布表面上打政府,背後其實逼泛民對手靠邊站,成為跟尾狗,再趁佢哋勢弱,奪其地盤及群眾,用心都幾狠毒。

不過線人指出,泛民各黨之中,最大輸家係公民黨。年前毓民等舉起大旗搞五區公投,公民黨一眾「正義大狀」盲舂舂跟住玩,結果失咗大批溫和中產票,之後痛定思痛,內部達成共識,唔再跟激進派行得太埋,以免重犯錯誤。所以毓民提出拉布之初,公民黨閃開唔埋堆,自行提出「休會待續議案」,要求將法案押後,先行審議民生條例,希望咁做可以取得主導,唔使加入拉布被毓民牽住走。

民主黨幾個頭頭洞悉毓民奸計,一開始就決定唔落叠,拒絕加入拉布,保持距離隔岸觀火。

公民黨以為可以佔回正義高地,但如意算盤打唔響,因政府同建制派堅持照去,休會議案過唔到,結果拉布戰焗住開打,連鄭家富同工黨李卓人、何秀蘭都相繼加入抽水,公民黨當年參加過「公投」,如今卻態度曖昧,因而備受壓力,畀激進選民鬧「衰仔」。拉布進行時,公民黨話會通宵留守,密切監察,隨時返回議事堂「了解情況」,但隻字冇提「拉布」,可見班友完全進退失據。

線人話,五區公投時,公民黨瞓身支持至可以成事,但最後攞綵嘅係社民連,公民黨做完跟尾狗得個桔,區選更大敗,慘成輸家。但今次公民黨唔跟住玩,一樣被毓民「舞」到暈,失勢兼失票,同樣係輸家。