為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 專欄  > Paco巨星飯堂 2012 年 05 月 24 日

黃栢高

黃栢高(Paco),金牌經理人,叱吒樂壇三十年,炮製無數金曲,捧紅不少歌手。近年涉足電影,《行運超人》、《龍咁威》、《殺破狼》等,皆叫好叫座。最新動作,除於本刊主持《Paco巨星飯堂》,每逢周一更在《頭條日報》主持「名人會」專欄,專訪城中名人、紅星。

燒友緣

今晚嘅「Paco巨星飯堂」,集多界別嘉賓於一餐,全因「緣」呢一個字。飯敍地點「皇鳳」,係香港殿堂級排舞老師Sunny Wong(黃國榮),同前Sun Boy'z成員Dennis(麥子豪)開設嘅港式串燒店,而Sunny嘅名模太太Angela(洪華),就不時以老闆娘身份幫手,加埋Sunny好友Bolie(黃偉雄,林莉經理人)、林莉(Carrie)以及本地知名婚紗設計師Noel Chu,令今次飯敍人才濟濟。

一眾好友聚首一堂,氣氛就如串燒咁熱辣辣,我以酒會友,先飲為敬。乾!

今晚我同Angela、Carrie(前排左至右)、Bolie、Sunny同Dennis(後排左至右)聚首一堂,品嘗最正嘅港式串燒。

拍住上

「皇鳳」係Sunny、Dennis同朋友合資嘅餐廳,後者仲每日準時返餐廳打點一切,務求盡善盡美。「08年我退出娛樂圈之後,就去咗瑞士讀酒店管理課程,好多時都會喺嗰度嘅餐廳實習,學同客人應對、學去serve佢哋,同以前好唔同,我發現自己細心咗。」

哈哈哈!力不到不為財, Dennis年紀輕輕(25歲)已經成為老闆之一,梗係要分外落力,Sunny話:「最初喺Four Seasons撞番Dennis,咁啱嗰時有朋友問我有冇興趣搞餐廳,我第一時間就諗起Dennis,講真,如果佢決定唔做,我都唔會做。後來Dennis肯一齊搞,有一個呢方面嘅專才,咁我自然放心好多。」

以我一貫嘅作風,梗係要以酒會友。

Dennis、Sunny同Angela(左至右)由好友變成戰友,感情有增無減。

講到Sunny同Dennis結緣,就不得不提Angela,原來阿嫂一直視Dennis為細佬,當佢好似家人一樣,「Dennis好純,佢第一次去蒲都係我帶佢去,我好記得帶佢去到蘭桂坊,佢好受女仔歡迎,哈哈!」

同Sunny、Angela拍住上,令科班出身嘅Dennis,有機會喺餐廳一展所學,佢話:「我喺瑞士學嘅嘢,到依家實踐當然係有一段距離,但係同我實習時嘅情況大同小異,所以都OK。」

蜜味雞翼($36)以蜜糖燒製雞翼,加上秘製醬料,惹味!

秋刀魚鳴門卷($148)係餐廳最新出品。

北海道特大扇貝($128)係用蜜糖、牛油、葱花吊出扇貝鮮味。

甜晒恩愛

飯敍期間,我見Dennis兼顧訪問、服務其他客人,手勢熟練,證明日子有功,而Sunny夫婦亦冇搵錯partner。有好幫手之外,其實Sunny都有提出意見,「我哋有一個豬油撈飯,係我細個嘅時候成日食嘅,豬油香口,加埋豉油、飯、肉鬆同葱花,食落去感覺好滿足,所以我特別要求加埋佢喺餐牌。」

Sunny同Angela夫婦恩愛到爆,Angela坦言:「我哋因為蒲而相識,依家有時間都會一齊蒲!」

Sunny一邊講,我一邊留意到坐喺佢身邊嘅Angela甜蜜地望住丈夫,佢哋喺2月啱啱慶祝過結婚3周年,仍然恩愛與日俱增,同Sunny毫無掩飾對太太嘅愛大有關係,「生活上,老婆係我嘅支柱,我喺屋企可以好Relax,所以我唔會怕喺好多人面前同老婆講我愛你,有時言語都好緊要嘅。」

而Angela就將丈夫之名繫於胸前,「呢條鏈係我喺台灣搵人造嘅,我好鍾意o架。」

Angela心繫丈夫,由內至外,將Sunny繫於胸前。

紫菜花枝脆($58)內裏有明太子、花枝肉、外脆內軟,具層次感。

鵝肝多士($68)係我嘅最愛,零肥膩感。

嚟自Sunny童年嘅懷舊肉鬆豬油飯($38),香而不膩。

好氣質

哈哈哈!Sunny夫婦恩愛得羨煞旁人,連見慣幸福愛侶嘅Noel都讚不絕口,近期佢為Carrie度身造舞衣,擔任我嘅戰友之一蘇永康嘅台北演唱會嘉賓,令兩位美女變得熟落。Carrie係「皇鳳」常客,佢向Noel同我推介佢嘅心水選擇,「我覺得呢度嘅燒海鮮好出色,除咗夠新鮮之外,我好欣賞佢哋燒海鮮嘅時候,都會以蜜糖、牛油同葱花呢啲好有港式風味嘅配料嚟烹調,更加提升到材料嘅鮮味。」

聽過Carrie嘅介紹,我品嘗燒北海道特大扇貝嘅時候,亦都特別留意味道嘅昇華,享受餐廳嘅獨有港式風味。

酒腳共聚,我先同Noel、Carrie(上圖左、右)乾杯,再與Bolie合照(下圖)。

為答謝Noel(右)相助,Carrie(左)送上喺康仔演唱會上,身穿Noel設計舞衣嘅巨型照。

燒鯛魚($148)用料新鮮,味道香濃。

鐵板花竹蝦($168)鮮味同賣相一樣出色。

牛牛心太軟($58)最啱佐酒。

皇鳳

地址:灣仔聖佛蘭士街9-11號寶豐大廈地下A舖
電話:2871 3388