羅仲謙服侍「家姐」
大隻仔羅仲謙同TVB花旦楊怡嘅緋聞鬧得熱烘烘，一時畀人話佢兩個喺將軍澳同居，一時又話佢哋八字好夾。雖然佢兩個死口唔認係拖友，但係大家都已經認定咗佢哋係一對嘞。
最近，楊怡飛咗去上海趕拍TVB新劇《名媛望族》，照計羅仲謙喺呢段期間，應該唔會畀人捉到佢同楊怡密會o架？不過，早排東姑去將軍澳探朋友嗰時，竟然撞到大隻謙做柴可夫接送一個疑似楊怡嘅女仔。東姑再擘大眼細心啲睇，個女仔原來係楊怡家姐楊娜。女友出咗埠，大隻謙愛屋及烏，連人哋個家姐都服侍埋，話畀人知你同楊怡冇嘢都冇人信喇！
大隻謙見到東姑影相，即時有啲尷尬，梗係啦！你載住「家姐」遊將軍澳，想話同楊怡冇嘢，搵鬼信喇！
楊怡（左）同家姐楊娜（右）無論高度與外形都好相似，離遠睇真係會認錯人。
