為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 親子天地  > 父能量 2012 年 05 月 02 日

農夫陸永 湊女問網友

慣以通俗、生鬼歌詞Rap出社會現實的樂壇嘻哈組合農夫,成員之一的陸永兩個多月前榮升人父,強調身體力行幫忙湊女,「我鼻塞,所以換屎片嘅工作由我嚟做!老婆生咗個女,我冇乜特別改變,因為我本身就係一個有愛心、成熟而且好畀心機做嘢嘅男人!」

陸永將人生大事說得平常不過,實際上卻不斷上網搜尋資料,為做人夫、人父做足準備,「我嘅全部湊女知識都係嚟自網絡世界,有個親子討論區好有用,我連老婆陣痛都上網問網友係咪需要入院!」二十九歲仔要養妻活兒,表面上責任重大,但在他口中,卻變成一件趣事。

樂壇嘻哈組合農夫的成員陸永,兩個多月前榮升人父,直言自己鼻塞,所以換片工作一手包辦。

陸永與太太Rainah大半年前,在家中註冊結婚,立下誓盟,其時太太已懷孕四個月。

加入媽媽會

去年九月,陸永跟任職地產經紀的圈外女友Rainah註冊成婚,女兒陸一穎(Hannah)於今年二月七日剖腹誕生,重六磅十五安士。縱使寶貝女比預產期提前三個星期出世,但陸永卻絕無手忙腳亂,更上網詢問媽咪級網友何謂「真陣痛」,「我好多謝網絡世界,我全部湊女知識都係嚟自Baby Kingdom網站,我覺得所有夫婦,有BB又好、冇BB都好,都啱睇o架。嗰度平時都好多人問嘢、好多人答嘢;我都試過發問,你知陣痛有真有假o架嘛,你打畀醫生,都答唔到你咁多,都係叫你入醫院。嗰時老婆進入咗預產期,佢又真係有少少陣痛,唔知真定假喎,咁咪喺網度問人囉,有人答係真,咪call車入院囉,當然你唔好諗到個情況好緊急。」

去年九月,陸永與任職地產經紀的Rainah註冊結婚,女兒於今年二月七日出世。

陸永從網絡中吸收湊女心得,更認識了一班跟他差不多時候做父母的網友,還加入了「媽媽會」,「其實網上有好多呢啲『媽媽會』嘅嘢,生之前互相認識,到BB出世後就可以搞個playgroup一齊玩吓,大家互相照應;入呢個會係希望BB可以有一班同齡嘅小朋友一齊成長、一齊學嘢,一來可以慳番啲playgroup錢,二來,家長又可以交換一啲育兒心得啦!」

回想第一眼看見女兒,陸永有這樣的一個反應:「嘩,大鑊喇!搞到你咁,唔好意思!」他續說:「因為佢喺個肚入面咁耐,一出世個樣一pat pat,又腫又黑又多斑,你會覺得唔係幾似人類囉。不過,我又冇畀佢嚇親,我自己又唔係咩美貌。」這個爸爸真風趣。

陸永笑言,女兒只認得戴着帽子的他,為免女兒驚哭,他在家中也要帽不離頭。