玄學家批賽果大部分撻Ｑ
特首跑馬仔玩咗成年，由名嘴到茶餐廳阿叔，個個變咗政論家，連一眾星相命理專家（風水命理、星座、塔羅牌乜都有），亦加入估領袖，一個月前某報搵咗十七位師傅預測邊個跑出，當時唐唐民望已經偏低，但有十位話佢會贏，佔咗六成，估振英哥勝出嘅只有四位，結果大部分人撻咗Q。
睇好唐唐嘅師傅各有根據，有人同佢起卦，有人話佢有官相，又有人批佢條命有靠山，是非多但唔受損。正路嚟睇，上面種種講法都好啱，但大家睇唔到北大人最後發功，所謂「天機」難測，外力可以改變命運，只歎政治呢味嘢太複雜詭異，玄學大師都未必睇得透。
十七人當中，車婉婉憑星座睇好振英哥，話佢屬獅子座，奧巴馬都係獅子座，有優勢做領導人，咁講法，奧巴馬應該好有機會連任。
