為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 娛樂放題  > 留星語 2012 年 03 月 23 日

郭晉安 四個人的晚餐

郭晉安說起他兩個孩子出世時的情景,七情上面,時而肉緊,時而甜笑,彷彿是昨天發生的事。

「生第一個(大仔郭令山),乜都好陌生,每一part每一個細節,我同Cindy(太太歐倩怡)都好緊張,就算見到個小朋友出嚟,我都唔相信係事實!佢早產咗三個星期,醫生叫我唔好搞剪臍帶嘅嘢,寧願盡快攞佢去check,睇下有冇嘢唔妥,嗰種擔心程度……(皺皺眉頭)好似好兒嬉咁,好驚佢冇咗,好患得患失……

「生第二胎(細女郭以雅),Cindy開刀,佢推咗入產房之後,我等咗半個鐘先入去,當時我太太個肚已經開咗刀,個醫生已經伸緊隻手入去攞嘢……(他睜大眼睛)間手術房好光,紅色特別紅,所有嘢都好似得特別清楚咁,呢個畫面好壯觀、好震撼、好深刻!我同Cindy講咗冇十句嘢,就聽到BB嘅喊聲嘞!」說罷,他展露出一副溫柔的笑容。

是的,縱使孩子會日漸長大,縱使他們將來會鬆開父母的手,走出自己的人生,但作為父親,郭晉安卻永遠不會忘記他們來到世上的那刻。無論如何,只要一家四口能在一起,就算是吃一頓簡單的家常便飯,那張飯桌,已經可以是他的全世界。

愛的教育

郭晉安的大仔郭令山,三月廿三日便四歲了,現就讀K1。這個孩子,兩年多前才於晚飯時看着燈開始叫了第一聲「爸爸」,今天他已好奇爸爸到底做甚麼工作。「我畀佢睇《東西宮略》嘅promote,同佢解釋我嘅工作,佢反而指住螢幕問我:『你嘔啲乜嘢出嚟呀?』」

我同Cindy(歐倩怡)對佢嘅教導好一致,例如佢扭計,我哋都會硬起心腸畀佢即管喊,開頭佢會夠膽死喊好耐,但依家,我叫佢唔開心就喊出嚟啦,佢就即刻講第二啲嘢,當冇事發生。

每晚臨瞓前,我都叫佢起身要記得換校服、刷牙、洗臉、飲水同叫人早晨,我講咗五十次啦,有晚婆婆同我講番,佢嗰朝早竟然話:「我要換校服先o架嘛,你同我換啦!」我當堂攬住佢大叫:「阿仔!我真係好愛你呀!」佢真係有聽我講嘢,唔係當我流o架!就算要我同佢講一百日,只要有一日佢肯做嘅時候,我真係會開心到喊,冇嘢好投資得過咁呀!

妹妹上年出咗世後,佢有段時間見我哋成日抱住妹妹,都會走嚟搣佢腳仔,覺得我哋唔理佢,我哋就灌輸畀佢知:「妹妹依家好脆弱,要好好保護o架!」跟住佢開始明白,但凡細過自己嘅,就算係貓貓狗狗,都要好好愛護。

跟歐倩怡拍拖七年後,○六年於廸士尼樂園拉埋天窗。

早已預備

妹妹郭以雅,去年六月廿九日出世,雖然至今她才不過是一個未夠一歲的BB女,但對於身為基督徒的郭晉安來說,她卻是神賜給他這個家的小天使,讓他更深深體會神對自己的愛。

妹妹出世,好似夾晒時間咁。我本來推咗一套大陸劇陪Cindy待產,但嗰邊竟然話可以就我,結果四十日就拍晒我啲戲份!

我返到嚟,重新裝修過間BB房,髹過晒油,又造咗個櫃,有花邊又有好齊全嘅儲物空間,好女仔好靚,一切都以為策劃得好好,點知啲油同個櫃好重甲醛,就算我搵人返嚟噴啲消甲醛嘅嘢都搞唔掂,結果所有嘢要重新整過買過,到最後出嚟,成間房所有嘢都好簡單、好樸實,亦都唔花巧。

搞掂好晒間房唔夠十日,阿妹就話出世,嗰日先照完ultra sound,照到佢仲坐咗喺媽咪個肚度,嗰晚十一點幾就已經話穿羊水,我打畀個醫生,個醫生十五分鐘就飛到醫院,仲好快就安排Cindy入產房開刀。

妹妹好好湊,阿仔以前每晚兩、三點就喊,但呢幾個月,我哋每晚都瞓得好好,佢係出奇地乖!可能因為佢有婆婆湊,婆婆上年六月正式退休,妹妹六月尾出世,啲時間全部都夾得好好。

然後我每次望見妹妹依家間房,我都會感受到,神其實係要透過妹妹話畀我哋知,佢根本早就已經為我哋預備好晒所有嘢,好多嘢根本唔使咁複雜,人嚟到呢個世界,本來就係好簡單。

○八年三月廿三日,大仔郭令山出世,令郭晉安和Cindy開展了學習為人父母的課題。

去年六月廿九日,誕下女兒郭以雅,從此郭家一家四口,更懂得互相愛護。

母性本能

太太歐倩怡,九九年拍攝旅遊特輯時認識,二人拍拖七年後,○六年於香港廸士尼舉行婚禮。郭晉安說,就如很多女性一樣,Cindy自從當了母親後,整個人也變得比從前更堅強。

其實我同Cindy一直都學習緊點做人父母,尤其是教導小朋友嘅感受同價值觀,對我哋嚟講,都係一個好大嘅課題!不過,我諗女性喺呢方面嘅概念會更加強,因為佢要經過十月懷胎,又要好痛苦先生到個小朋友出嚟。

在新劇《東西宮略》中,飾演皇上的郭晉安,周旋於陳法拉和陳敏之之間,惹人發笑。

每次當我喺教導方面需要求救時,我就會搵書睇,啟發一吓,印證一吓;但Cindy呢,有時見佢好似對個仔好放鬆、冇乜點理咁,我都會問佢點解唔理吓個仔,但佢會話:「其實係你緊張咗啫,你壓力太大啦!」例如我見到個仔無啦啦擒上張枱度,我叫極佢都唔應,我就會好緊張問個仔,喺學校係咪咁,但Cindy就會提醒我:「由佢啦,可能佢喺度摸索緊啲嘢,諗緊啲嘢。」

原來Cindy會知道幾時要畀個仔放鬆啲,幾時要畀個仔自己用腦去過濾啲嘢,唔好畀咁多壓力佢,呢樣嘢,係媽媽同個小朋友嘅一啲connection,做爸爸嘅係唔會有o架!

至於同個仔搵學校嘅嘢,我會同Cindy一齊去傾去煩,佢都有30、40%會依靠我,不過如果我要開工嘅時候,Cindy都會好叻,會自己處理好多嘢。

○三年《戇夫成龍》「阿旺」一角,穩定了他在觀眾心目中的地位。

自我價值

郭晉安,一九八六年入行以來,星途一直踏實平穩。他說,還未當上父親時,是個十分自我中心的人。「我係藝人嚟o架嘛,好有styleo架嘛!但我喺阿仔身上所體會到嘅,原來咁係錯o架!」

我好重視小朋友嘅自我價值觀,因為我覺得如果小朋友冇呢樣嘢,佢就會好畏縮,咁我就會畀更多讚賞同自由嘅空間佢。

然後,我就諗番自己:係喎,我入咗行咁耐,我幾時有肯定過我嘅價值呢?係咪《阿旺》呢?都好似冇喎,只不過係嗰一剎那,大家吹捧到我去嗰個位,得到兩個獎,但我郭晉安行出嚟,我嘅信心同power喺邊度呢?

同年,因為「阿旺」,令他成為了「我最喜愛的男主角」、「我最喜愛的電視角色」,以及跟宣萱成為「我最喜愛的拍檔」。

當我話畀阿仔聽,佢有佢嘅自我價值時,我會話畀佢聽,阿爸都有嘅!跟住我覺得自己就好似一棵樹嘅根,愈抓愈實,我好清楚,我嘅價值就喺度,呢個世界係唔會有兩個郭晉安!

有咗小朋友之後,我亦學識咗忍耐。小朋友表達能力唔高,我好多時都要估佢想要啲乜,當我真係講中咗佢心入面嗰樣嘢時,我見到佢開心嗰個樣,我自己都覺得好滿足。然後我就明白,其實同任何人相處都係咁咋嘛,只要我多啲去感受吓人哋嘅需要時,大家都會舒服啲!

因為咁,我依家已經成為咗TVB裏面最冇脾氣嘅一個藝人——呢樣嘢,係我個仔教我嘅!

愛Phone4

郭晉安的iPhone,用了他一家四口的照片做wallpaper,相簿內大部分相片和片段都是家人的,另外還下載了很多關於聖經、基督教的apps。

還記得詹瑞文曾說過,家裏多了一個小朋友後,即感覺到整個人「厚咗」。

是的,相對於數年前我訪問過的郭晉安,今天的他確實「厚咗」很多,尤其是他年前成了基督徒,尤其是去年女兒出世、變為一家四口後,他這種「厚度」更是滿有質感。

「阿囡出世,最大變化係間屋熱鬧咗。以前我同Cindy會將所有焦點擺喺個仔度,啲人都叫我哋唔好淨係生一個,咁樣會令大家都好大壓力。依家屋企多個人,感覺上真係平衡咗,對個仔壓力少咗,個仔又開心咗,我哋唔會再太規限佢好多嘢,反而更加識得點樣一家人互相愛護,大家平等。」

如果,大家還不明白何謂「厚咗」,大概可看看郭晉安那部應該改為國語名稱「愛(音:ai)Phone」的iPhone。