為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 娛樂放題  > 留星語 2012 年 03 月 15 日

百步穿楊自由行 羅仲謙

訪問羅仲謙,其經理人公司的高層第一句已開宗明義說:「喂,唔剝衫o架喎。」有令男女也垂涎的40吋巨胸,收埋絕對是暴殄天物,但經過傅穎、楊怡等事件過後,「大隻謙」亦並非空有「大隻」之名,收起巨胸,還是有其「獨特之處」。

「可能我份人貪玩又鍾意講笑,大家關係好,所以咁容易有緋聞,做得呢行,係要有啲娛樂性。」

娛樂性的重點,不止於你在《On Call 36小時》看到的「洋葱」,也不用一層層揭開,現在幾乎日日也看到他與楊怡隔空傳情,一時男方買花看鑽戒,一時女方甜笑嫌鑽戒細又為花束解話,娛樂性豐富過劇集劇情。

「我其實係一個鍾意簡單嘅人,亦比同年紀嘅人成熟一啲,拍戲拍劇試過做好多唔同嘅人,唔使工作嘅話簡單啲就好嘞!」

的確,二十七歲的羅仲謙說話時有點老氣,少了一般80後的嬉笑(非說笑時),要了解70後的心境,應該較easy。他最有童真的一刻,就是在看到單車時,雙眼發光那一句:「嘩!我好耐冇踩單車嘞!」踏單車不怕死火,夠自由也一切盡在掌握中。以後點踩?還看他本人。

隨緣 結交好朋友

說三十二歲的楊怡,羅仲謙說得大方得體。一問他跟「姐姐」的關係,八月將二十八歲的他答得斬釘截鐵:「好朋友囉!會約出嚟食飯嗰種,不過係同埋一大班朋友嘅,其他嘢都係隨緣啦!咁大家都明白,做娛樂圈呢行,正常社交啫,有時就咁出咗我哋兩個嘅相,就會講到拍拖。

「好似上次畀傳媒話我哋燒嘢食咁,其實在場嘅唔止我哋兩個o架,但係出咗嚟個focus就淨係我哋咁。好彩,我哋都好成熟,唔會因為報道而冇friend做,而楊怡亦係好女仔,係一個交得過嘅朋友嚟嘅。」

答案公式化得可以,盡在預期之內,而且世事往往有一百萬種可能,未必會離奇過小說,所以一位交得過的好朋友,大有可能已是一個冧得過的女朋友。訪問後傳出羅仲謙為楊怡買鑽戒,男方只謂「睇吓啫」,而女方則笑嫌戒指細,但又表示獲邀出席男方母親生日會,玄機處處,一切盡在不言中。

有傳羅仲謙與楊怡因拍《On Call》而拍拖,二人僅以「好朋友」稱呼對方,兩幀相隔半年的合照,有線索冇?

狠心封嘴 說再見

不認不認還須認,事例已在羅仲謙去年拍攝《On Call 36小時》的時候出現,當時他被指虐打前度傅穎,再爆出「腳踏13船」的緋聞,根據當事人的危機處理手法,當時的傅穎,亦是羅仲謙的「好朋友」,直至發生肢體碰撞,二人的關係才得見光。

相比起說楊怡,一提傅穎,羅仲謙便有所避忌:「過咗去嘅事我唔想再提,況且我之前都交代過啦!件事可能注定要我去面對、去經歷嘅,而經過呢件事之後,我學識咗要用正面嘅態度去面對將來嘅人生、工作,都係有所得着嘅。」

那傅穎呢?「我哋都仲係同事嚟嘅。」

去年八月,傅穎自爆被羅仲謙虐打,二人分別開記招交代事件。

從來 不是集郵王

由好朋友降呢成同事,傳聞指羅仲謙花弗集郵,傅穎不點名地坦言遇上「感情騙子」,才有一腳踏十三船事件出現。訪問時,羅仲謙情緒起伏不大,惟獨說到這十三條船,他顯得相當不忿。「個報道話我有成十三個女朋友,仲要擺喺報章C1版,我睇到眼都凸晒,佢哋將所有同我合作過嘅女藝人都放晒落去,就話個個我都追過,其實關我咩事?

「我明白娛樂圈嘅遊戲規則,但係話我集郵?老實講,我咁大個人拍過四次拖,我自問唔係花弗嘅人。識我嘅朋友都知,我份人好少出街蒲同social,同埋要應付咁多個女朋友,真係要講好多大話,我就未夠班嘞!」

有指羅仲謙的高峰期先後有十三位女友,包括周秀娜(上圖);當事人意難平,而且觀其座駕四年不換(下圖為他年前接送傅穎照),心並不太花。

非潮男 自我定位

羅仲謙人如其名的「謙厚」,同時他的自我定位亦拿揑得非常精準,為他的訪問準備的潮流指標捲腳褲,他也懶得去捲褲管,只道:「我唔行得潮男路線,一rou腳就出事o架!就咁簡簡單單就OK,着普通一百蚊有找嘅T-shirt最啱我嘞!」

反正有40吋巨胸,穿平價T-shirt亦可穿出格調,羅仲謙並非富二代,揸名車狂鎅女之輩,他的座駕從未換過,還是○八年他首成車主的日產Crossroad出車,亦只為實用。

「之前啱啱開始拍TVB嘅劇,日日就熬巴士,由大埔返將軍澳,要用兩個鐘又轉成幾次車,我試過收工搭N車(通宵車),企喺度都瞓得着,所以咪供架車代步囉。點知初時揸仲大鑊,拍到朝早五、六點,返屋企經過青山公路嘅時候又瞌着,一醒就係咁打自己,再開大啲音樂,唔畀自己再瞓,太危險嘞。」

行有車代步,住,羅仲謙則與家人居於大埔村屋,他自言仍在積極儲蓄中,「我不嬲都唔大使,衫唔使名牌,所以一出嚟做嘢已經開始儲錢,最好儲夠買樓,唔使村屋嘅,可以租畀人收租o架嘛。」

圖左至右,為羅仲謙的成長路,巨B、少年至巨胸王子,轉變之大,以有「少女」氣息的少年照為甚。

渴望 擁有的美「好」

理財概念傳統,跟羅仲謙的人生態度方向一致,「我係一個傳統嘅人,雖然爸爸媽媽喺我四年班嘅時候離婚,但唔會影響到我對家庭嘅睇法。只係可能佢哋太細個就結婚,媽咪十八歲嘅時候已經生我家姐、二十歲生我,所以未真正知道自己真正嘅需要啫。」

父母離婚後,羅仲謙有一段跟伯父生活的日子,他因而被灌輸傳統的觀念,「伯父做人好有擔戴,雖然佢冇結婚冇小朋友,但係都會照顧埋我阿爸嘅家庭,所以依家我都會幫家姐眼,睇吓佢之前啲男朋友得唔得o架。」

認真未必輸定了

前數頁提過的鑽戒贈楊怡,另一當事人羅仲謙於上周六解話說:「我行過望兩眼,冇話特登買咩,大家唔使咁認真。」

認真,不一定會輸,不少人認為不用認真處理娛樂雜誌的八卦新聞,看看楊怡回應羅仲謙買花給她時說:「花係送畀佢媽咪,因為佢媽咪生日。」

噢朋友的媽媽生日也瞭如指掌,相熟的程度也非比尋常,仍以朋友相稱,亦表現出認真對待對方的態度。同演劇集今周大結局,人生路則仍然漫長,要走到大團圓,不認真一點,有難度喎。