為提供更方便的一站式服務與讀者,星島雜誌集團旗下的東周網、東TOUCH、PCM電腦廣場、CAZ Buyer車買家、JET及Spiral游絲腕表網站將歸納為My-Magazine網站,只需完成以下簡單登記程序,即可以一個電郵地址,享用以上各網站提供的各種會員服務及源源不絕的會員優惠!
submit
submit
主頁  > 時事  > 政官莊 2012 年 02 月 14 日

泛民對CY留手吊詭 唔出「法寶」有玄機

跑馬仔周二開始提名,好快就入閘開跑,有關參賽馬嘅風波亦高潮迭起,好似振英哥涉嫌利益衝突事件咁,政府回應本刊查詢,公開當年西九設計比賽部分機密資料,就掀起全城議論,佢要頻頻出嚟解畫,但事態日日新鮮日日甘,好戲仍在後頭。

過往泛民議員對呢類「疑似醜聞」都會窮追猛打,見血方休(如葛輝事件就死咬不放),但對今次事件就似乎唔多勇猛,相當之吊詭,睇嚟內有玄機。

泛民線人回報,政府上周三晚發出新聞稿後,何俊仁同黨核心連日來開過幾次會,討論應對策略,主要考慮係輕力處理抑或出動重武器狂攻,點樣做可以令民主黨得到最大利益。

線人話,經過一番討論後,佢哋決定暫時採取各打五十板策略,CY單嘢照追,但唔會去到盡要求立法會引用《權力及特權法》徹查事件真相。

根據呢個策略思維,仁哥同張文光都只係口頭質疑CY嘅誠信,李華明同卿姐就勇少少,提出立法會相關委員會召開特別會議,要求政府向議員公開當年設計比賽嘅資料,最後搵有關官員上立法會接受質詢。

西九單嘢雖然疑點重重,但仁哥同民主黨暫時唔會出撒手鐧對振英哥窮追猛打,皆因策略上對佢哋未必有利。不過佢哋仍留有一招「陰濕」後着。

據線人分析,民主黨核心暫時唔出動「法寶」(《權力及特權法案》)追殺CY,是出於幾個原因,其一係唔想令市民覺得佢哋係「唐營B隊」,幫唐唐攻對手;其二係部分公眾覺得政府今次有打擊CY之嫌,如果民主黨猛攻CY,可能被認為企喺政府嗰邊,對自己冇乜好處;其三係打梁唐力度差唔多,最可以表現佢哋反建制嘅立場,在選戰中凸顯到民主黨嘅位置,對今年九月立法會選舉最有利,在梁唐之間「歸邊」反而有壞效果。

更吊詭係,民主黨保留一招「陰濕」後着:如果CY爆冷當選成為候任特首,佢哋可以夾埋泛民其他政黨搞一場大龍鳳,趁CY未坐穩,即祭起《特權法》「法寶」強攻佢,政府屆時被迫要攞出可能對佢不利嘅機密資料,建制派幫又唔係,唔幫又唔係,陷於困境,如果chok chok吓搵出重要內情,成個政府班子同建制派將出現危機,咁嘅亂局當然對泛民最有利。

查清「西九疑案」真相 要靠《特權法》

泛民唔想出撒手鐧,政府呢個階段又暫時冇乜新料爆,雖然事件仍疑點重重,但要搵出成單嘢嘅真相,亦唔容易。

政圈知情人士指,事件關鍵證據,部分由政府掌握,部分則在戴德梁行,例如該行高層同參賽建築師行嘅書信往來、商討合作嘅口頭及文件細節、有冇作過交易,以至公司內嘅工作紀錄等等,呢啲資料因涉及公司內部運作,即使有,佢哋當然都唔公開,除非立法會運用《特權法》展開聆訊,召有關高層職員甚至CY上去作供,並呈交有關文件,否則永遠留在file中。

從政府披露嘅資料,戴德梁行幾個高層曾向參賽建築師行提供過實質協助,所以被對方視為參賽團隊一部分,咁大件事,佢哋理應向CY匯報,故CY講唔知都有啲奇怪,實情係點惟有向呢幾位高層查問,但目前冇人有法定權力咁做。

至於政府方面,部分重要內情仍然唔清唔楚,例如在選出入圍作品後,官員發現戴德梁行同參賽者有關,點解當時冇進行重選,只係取消該作品資格?係咪唔想成件事張揚?莫非有政府最高層想保住某啲人,唔想影響其聲譽?

如果立法會運用《特權法》,就可以召當時各有關官員(包括鬍鬚曾等),甚至老董去接受聆訊,謎團便有可能解開。

CY可能知道立法會「開庭」機會微,亦睇到政府公開資料有難處,所以一於「大」你一鋪,表現出理直氣壯,博對方唔奉陪,藉此保持民意得分。呢個策略暫時仍行得通,但只要更多事實浮現,形勢可能一朝逆轉。